ការកំរើកឡើងវិញរបស់វិស័យទេសចរណ៍ក្នុងស្រុកនេះ ត្រូវបានអាជ្ញាធរទេសចរណ៍តាមបណ្ដាខេត្តសក្ដានុពលជាច្រើនបានចាត់ទុកជាសញ្ញាល្អមួយក្នុងការឈានទៅស្តារអាជីវកម្ម ដែលរងផលប៉ះពាល់ដោយសារកូវីដ-១៩ និងការបើកតំបន់ទេសចរណ៍ទទួលភ្ញៀវទេសចរបរទេស ដែលបានចាក់វ៉ាក់សាំងកូវីដ-១៩ រួចនៅចុងឆ្នាំ២០២១។
លោក សយ ស៊ីណុល ប្រធានមន្ទីរទេសចរណ៍ខេត្តកំពតបានបញ្ជាក់ប្រាប់ខេមបូណូមីសថា គ្រប់គោលដៅទេសចរណ៍ទាំងអស់នៅខេត្តកំពតមានភ្ញៀវទេសចរជាតិនិងអន្តរជាតិក្នុងមកកម្សាន្តជាហូរហែនៅពីរសប្តាហ៍ចុងក្រោយនេះ បន្ទាប់ពីរាជរដ្ឋាភិបាលដកបម្រាម និងបន្ធូរបន្ថយវិធានការមួយចំនួន។ ជាក់ស្តែង នៅរយៈពេលពីរថ្ងៃកាលពីសប្តាហ៍មុន ខេត្តនេះ ទទួលបានភ្ញៀវទេសចរជាង ២ម៉ឺន៣ពាន់នាក់ កើនឡើងជាង២ពាន់នាក់បើធៀបនឹងសប្តាហ៍កន្លងទៅ។
ប្រធានមន្ទីរទេសចរណ៍រូបនេះ រំពឹងថា ការរើបឡើងវិញនូវសកម្មភាពទេសចរណ៍របស់ភ្ញៀវទេសចរក្នុងស្រុកនេះ វានឹងអាចចូលរួមចំណែកជួយដោះស្រាយ និងស្តារអាជីវកម្ម ដែលរងផលប៉ះពាល់ដោយសារវិបត្តិកូវីដ-១៩ កន្លងមក អាចបន្តដំណើរការ និងមានប្រតិបត្តិការល្អប្រសើរឡើងវិញ។
ងាកមកមើលខេត្តកែបឯណេះវិញ លោក សោម ចិន្តា ប្រធានមន្ទីរទេសចរណ៍ខេត្តកែបបានកត់សម្គាល់ឃើញថា ទោះបីកម្ពុជាកំពុងស្ថិតក្នុងវិបត្តិកូវីដ-១៩ តំបន់ទេសចរណ៍ក្នុងខេត្តជាប់មាត់សមុទ្រមួយនេះ មានភ្ញៀវទេសចរជាតិ និងអន្តរជាតិក្នុងស្រុកមកលេងកម្សាន្តជាហូរហែ។ ជាក់ស្តែង នៅរយៈពេលពីរថ្ងៃកាលពីសប្តាហ៍មុន ខេត្តនេះទទួលបានភ្ញៀវទេសចរមកកម្សាន្តជិត៥ពាន់នាក់។ លោករំពឹងថា តាមរយៈការកើនឡើងនូវលំហូរភ្ញៀវទេសចរក្នុងស្រុកនេះ ប្រាកដណាស់វានឹងក្លាយជាកត្តាមួយក្នុងការរួមចំណែកជួយស្តារអាជីវកម្មទេសចរណ៍ ដែលរងផលប៉ះពាល់ដោយសារកូវីដ-១៩ នៅខេត្តនេះឲ្យមានភាពល្អប្រសើរមួយកម្រិតឡើងវិញ។ ទន្ទឹមនឹងនេះ លោក ក៏បានបង្ហាញក្តីបារម្ភចំពោះកំណើនភ្ញៀវទេសចរ ដែលអាចនឹងចម្លងជំងឺកូវីដ-១៩ ផងដែរ។
អត្ថបទទាក់ទង
ក្រឡេកទៅមើលវិស័យទេសចរណ៍នៅខេត្តព្រះសីហនុឯនេះវិញ លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុបានបញ្ជាក់ប្រាប់ខេមបូណូមីសថា ក្រោយរាជរដ្ឋាភិបាលកម្ពុជា ក៏ដូចជារដ្ឋបាលខេត្តព្រះសីហនុបានអនុញ្ញាតឲ្យអាហារដ្ឋាន និងភោជនីយដ្ឋានអាចទទួលភ្ញៀវទេសចរឲ្យអង្គុយនៅកន្លែងឡើងវិញរួចមក មានភ្ញៀវទេសចរមកកម្សាន្តនៅខេត្តព្រះសីហនុកើនឡើងគួរឲ្យកត់សម្គាល់ បើធៀបនឹងកាលអនុញ្ញាតឲ្យលក់ជាលក្ខណៈវេចខ្ចប់។ ជាក់ស្តែង នៅសប្តាហ៍ទី១ក្នុងខែកញ្ញា ភ្ញៀវទេសចរបានទៅកម្សាន្តនៅខេត្តព្រះសីហនុមានចំនួនជាង២ពាន់៦នាក់ កើនឡើងជាង២៣% បើធៀបនឹងសប្តាហ៍មុន។
ជុំវិញទៅនឹងការរើបឡើងនៃចរន្ដទេសចរក្នុងស្រុកនេះដែរ ឯកឧត្តម តុប សុភ័ក អ្នកនាំពាក្យក្រសួងទេសចរណ៍បានសង្កេតឃើញថា ការធ្វើដំណើរកម្សាន្តក្នុងក្របខណ្ឌភ្ញៀវទេសចរផ្ទៃក្នុងបានចាប់ផ្តើមមានសកម្មភាពជាបណ្តើរៗហើយកាលពីចុងសប្តាហ៍មុន។ សម្រាប់ ឯកឧត្តម បើទោះបីចំនួនភ្ញៀវទេសចរដែលបានធ្វើដំណើរកម្សាន្តកាលពីសប្តាហ៍មុនមានចំនួនតិចតួចក៏ដោយ តែវាជាសញ្ញាណមួយដ៏ល្អក្នុងការឈានទៅស្តារវិស័យទេសចរណ៍របស់កម្ពុជា និងការបើកតំបន់ទេសចរណ៍ទទួលភ្ញៀវទេសចរបរទេសនៅចុងឆ្នាំនេះ។
បើតាមរបាយការណ៍របស់ក្រសួងទេសចរណ៍ដែលចេញផ្សាយកាលពីថ្ងៃទី៦ ខែកញ្ញា មានភ្ញៀវទេសចរជាតិ និងអន្តរជាតិផ្ទៃក្នុងជាង៥ម៉ឺន១ពាន់នាក់បានធ្វើដំណើរកម្សាន្តនៅតាមតំបន់ទេសចរណ៍ក្នុងខេត្តនានានៅកម្ពុជានៅរយៈពីរថ្ងៃកាលពីចុងសប្តាហ៍មុន។ ក្នុងនោះខេត្តកំពតឈរលំដាប់លេខ១មានភ្ញៀវទេសចរទៅកម្សាន្តច្រើនជាងគេរហូតជាង២ម៉ឺន៣ពាន់នាក់ ខណៈកែបឈរលេខរៀងទីពីរមានជិត៥ពាន់នាក់ និងតាមពីក្រោយ ដោយភ្នំពេញ និងខេត្តសៀមរាប៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
