សាលមហោស្រពអាណាចក្រអង្គរនេះ ជាការវិនិយោគរួមគ្នារវាងសម្ព័ន្ធកាណាឌីយ៉ា និង កាហេង អិនធើណេសិនណល។ សាលមហោស្រពនេះ នឹងលើកយករឿងកំណត់ត្រាប្រវត្តិសាស្ត្រធ្វើជាឆាកសម្តែង ក្នុងសម័យអាណាចក្រអង្គធ្វើជាស្នូល ដោយបញ្ចូលក្នុងឆាកសម្តែង ដូចជា ការធ្វើអាជីវកម្ម ទីកន្លែងកម្សាន្ត ភោជនីយដ្ឋាន ចំណុះភ្ញៀវទស្សនាបានជាង ១ពាន់នាក់។
អ្នកឧកញ៉ា ពុង ឃាវសែ ប្រធានក្រុមប្រឹក្សាភិបាល នៃក្រុមហ៊ុនសម្ព័ន្ធ កាណាឌីយ៉ា បានបញ្ជាក់អះអាងថា មហោស្រពនេះជានិមិត្តរូបថ្មីមួយរបស់ប្រទេសកម្ពុជា ដោយនឹងលើកស្ទួយកិត្យានុភាព ទីក្រុងសៀមរាប ឲ្យកាន់តែល្បីល្បាញ និងចូលរួមចំណែកទាក់ទាញភ្ញៀវទេសចរអន្តរជាតិឲ្យកាន់តែច្រើនថែមទៀត ពិសេស ភ្ញៀវទេសចរចិន។
អ្នកឧកញ៉ាបន្តថា ការវិនិយោគសាលមហោស្រពអាណាចក្រអង្គរ ដែលដាក់ឲ្យដំណើរការនាពេលនេះ វាស្របទៅនឹងយុទ្ធសាស្រ្តខ្សែក្រវាត់មួយ ផ្លូវមួយ របស់ចិន កាលពី៣ឆ្នាំមុន។ ហើយការសាងសង់សាលមហោស្រពដ៏ធំអស្ចារ្យនេះ គឺឆ្លើយតបទៅនឹងកំណើនទេសចរណ៍អន្តរជាតិចូលមកទស្សនាកម្ពុជាកើនជារៀងរាល់ឆ្នាំ។ ហើយជាពិសេសថែមទៀតនោះ មហោស្រពនេះ សង់ឡើងដើម្បីទទួលទាក់ទាញភ្ញៀវទេសចរចិនមកទស្សនាប្រាង្គប្រាសាទខ្មែរ ស្ថិតនៅក្នុងតំបន់ទេសចរណ៍វប្បធម៌ ប្រវត្តិសាស្រ្ត ក្នុងខេត្តសៀមរាប ខណៈនៅឆ្នាំ២០២០ខាងមុខ ទេសចរចិនចេញ ក្រៅប្រទេស ត្រូវគេប៉ាន់ប្រមាណថា នឹងកើនដល់២០០លាននាក់។
អ្នកឧកញ៉ា ពុង ឃាវសែ ប្រធានក្រុមប្រឹក្សាភិបាល នៃក្រុមហ៊ុនសម្ព័ន្ធ កាណាឌីយ៉ា
តើអ្នកបានអានអត្ថបទនេះ ឬនៅ?
លោក Zhou Xiao Heng ប្រធានគ្រប់គ្រងទូទៅនៃក្រុមហ៊ុន ជៀរហ៊ឹង បានថ្លែងនៅក្នុងពិធីសម្ពោធថា ការបើកឲ្យដំណើរការអាណាចក្រអង្គរនេះ លោកនឹងធ្វើការផ្សព្វផ្សាយបន្ថែមទៀត ទៅទីផ្សារអន្តរជាតិ និងប្រទេសចិន ដោយនឹងសហការជាមួយក្រុមហ៊ុនទេសចរណ៍ចិនដើម្បីនាំភ្ញៀវទេសចរពីចិនមកកម្ពុជាឲ្យបានកាន់តែច្រើនជាងនេះ។
លោកបន្តថា ទីផ្សារចិនគឺជាទីផ្សារដ៏ធំ ដែលមានប្រជាជនរហូត ១ពាន់ ៤០០លាននាក់ ហើយលោកជឿជាក់ថា ឆ្លងតាមរយៈសាលមហោស្រពនេះ នឹងអាចនាំភ្ញៀវទេសចរពីចិនមកកម្ពុជាកើនឡើងជាងមុន និងមានល្បឿនលឿនជាងមុន។
សៀមរាបជាខេត្តទេសចរណ៍វប្បធម៌ប្រវត្តិសាស្រ្តរបស់កម្ពុជា ដែលសម្បូរទៅដោយប្រាង្គប្រាសាទជាច្រើន និងមានភ្ញៀវទេសចរជាតិនិងអន្តរជាតិ រាប់លាននាក់ក្នុងមួយឆ្នាំៗ មកទស្សនាប្រាង្គប្រាសាទខ្មែរ ដែលជាសម្បតិ្តបេតិកភណ្ឌជាតិ។
ក្រុមរបាំនិងសិល្បករខ្មែរថតរូបអនុស្សាវរីយ៍ជាមួយអ្នកឧកញ៉ា ពុង ឃាវសែ និងវិនិយោគិនចិន។
តើអ្នកបានអានអត្ថបទនេះ ឬនៅ?
ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ប្រាប់អ្នកសារព័ត៌មានថា បច្ចុប្បន្ន ពិភពលោកកំពុងសម្លឹងមើលនិងចាត់ទុកវិស័យទេសចរណ៍ជាក្បាលម៉ាស៊ីនដើម្បីជំរុញកំណើនសេដ្ឋកិច្ចពិភពលោកមួយយ៉ាងធំ គឺវិស័យទេសចរណ៍នេះហើយ។
ឯកឧត្តមថា នៅក្នុងឆ្នាំ២០៣០ ទេសចរអន្តរជាតិដើរជុំវិញសកលលោកនឹងមានចំនួនដល់ទៅ ១ពាន់៨០០លាននាក់ ខណៈបច្ចុប្បន្ន ចំនួនភ្ញៀវមាន ១ពាន់២០០លាននាក់។ ក្នុងនោះ ចិនជាទីផ្សារមួយដ៏ធំដែលបានបញ្ចេញទេសចររបស់ខ្លួនទៅកាន់ពិភពលោក រាប់លាននាក់ដែលកាលពីឆ្នាំទៅមិញ ភ្ញៀវចិនមានរហូត ១២០លាននាក់ និងបានចំណាយរហូត១២០ប៊ីលានដុល្លារ និងឆ្នាំ២០២០ គេរំពឹងថា ភ្ញៀវចិនដើរចេញក្រៅប្រទេសមិនតិចជាង ២០០លាននាក់ឡើយ។
ដើម្បីទាក់ទាញភ្ញៀវទេសចរចិន អង្គការទេសចរណ៍ពិភពលោកបានគូសបញ្ជាក់ប្រាប់កម្ពុជា ថា ត្រូវត្រៀមយុទ្ធសាស្រ្តទាក់ទាញភ្ញៀវទេសចរចិនបន្ថែម បើទោះបីជាបច្ចុប្បន្ន កម្ពុជាយើងបានត្រៀមខ្លួនខ្លះៗហើយក៏ដោយ ព្រោះនៅថ្ងៃអនាគត ក្នុងចំណោម ១ពាន់៨០០លាននាក់ ចិននឹងក្លាយជាទីផ្សារធំជាងគេ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
