ប្រទេសមួយចំនួននៅអឺរ៉ុបកំពុងផ្តល់ជំនួយរាប់ពាន់លានដុល្លារក្នុងការគាំទ្រដល់ក្រុមហ៊ុនផ្គត់ផ្គង់ថាមពល ដែលបានជួបការលំបាកដោយសារតែការចំណាយច្រើនថែមទៀតទៅលើមុខជំនួញជួញដូររបស់ពួកគេ ដោយសារតែការហក់ឡើងនៃតម្លៃថាមពល។ ប៉ុន្តែបើតាមការប៉ាន់ប្រមាណរបស់ក្រុមផលិតថាមពល Equinor នៅប្រទេសន័រវេសបានបង្ហាញថា ការគាំទ្របែបនេះ គឺជាមួយផ្នែកតូចមួយនៃការចំណាយរួមតែប៉ុណ្ណោះ។
ក្រុមហ៊ុនផលិតថាមពលតែងតែដាក់លក់ថាមពលជាមុន ដើម្បីទទួលបានតម្លៃជាក់លាក់មួយក៏ប៉ុន្តែត្រូវតែរក្សាប្រាក់កក់«ក្នុងកម្រិតអប្បបរមា»ក្នុងករណីមានកំហុសណាមួយនៅមុនពេលពួកគេផ្គត់ផ្គង់ថាមពលទៅឱ្យអតិថិជនរបស់ខ្លួន។ ទង្វើបែបនេះបានកើតឡើងកាន់តែច្រើនដោយសារការកើនឡើងនៃតម្លៃថាមពល ដែលបង្កឡើងជាចម្បងដោយសារប្រទេសរុស្ស៊ីកាត់បន្ថយការផ្គត់ផ្គង់ឧស្ម័នទៅកាន់អឺរ៉ុប ទើបបណ្តាលឱ្យក្រុមហ៊ុនជួបការលំបាកក្នុងការស្វែងរកសាច់ប្រាក់បន្ថែមទៀតបែបនេះ។
មន្ត្រីជាន់ខ្ពស់ផ្នែកឧស្ម័ន និងថាមពលរបស់ក្រុម Equinor បានប្រាប់រ៉យទ័រថា នៅអឺរ៉ុបដោយមិនរាប់បញ្ចូលចក្រភពអង់គ្លេសនោះ ចំនួនសរុបនៃថវិកាប៉ះប៉ូវ លើការចំណាយលើវិស័យថាមពលនេះ អាចមានប្រហែលជាង ១,៥ ទ្រីលានដុល្លារ ដែលវាបានរឹតត្បិតសាច់ប្រាក់នៅលើទីផ្សារ និងធ្វើឱ្យក្រុមហ៊ុនខ្នាតតូច និងមធ្យមមួយចំនួនជួបការលំបាកផងដែរ។
អត្ថបទគួរអាន
តម្លៃឧស្ម័នបានឡើងដល់កម្រិតរបស់វា ៥ ដង ធៀបនឹងកាលពីឆ្នាំមុន បន្ទាប់ពីរុស្ស៊ីបានវាយលុយទៅលើអ៊ុយក្រែនកាលថ្ងៃទី២៤ ខែកុម្ភៈមក ហើយវាបានបន្តកើនឡើងថែមទៀតកាលនៅដើមសប្ដាហ៍នេះ បន្ទាប់ពីទីក្រុងម៉ូស្គូបានបិទបំពង់បង្ហូរឧស្ម័ន Nord Stream 1 ដ៏ធំមួយដោយគ្មានកំណត់ពេលវេលាថានឹងបើកវិញនៅពេលណានោះទេ។
ជុំវិញនឹងការផ្ដាច់ការផ្គត់ផ្គត់ឧស្ម័នទៅអឺរ៉ុប បង្កឲ្យតម្លៃថាមពលនៅប្លុកនេះហក់ឡើងកាន់តែខ្ពស់នេះដែរ ត្រូវបានក្រសួងការបរទេសរុស្ស៊ីអះអាងថា បញ្ហានេះកើតឡើង ក៏ដោយសារតែសហរដ្ឋអាមេរិក គឺជាអ្នកនៅពីក្រោយខ្នងនៃវិបត្តិដ៏ចាស់ស្រះទាំងអស់នេះ ព្រោះអាមេរិកគឺជាអ្នកជំរុញឲ្យមេដឹកនាំអឺរ៉ុបបោះជំហានកាត់ផ្ដាច់កិច្ចសហប្រតិបត្តិការសេដ្ឋកិច្ច និងថាមពលជាមួយទីក្រុងម៉ូស្គូ។
សូមបញ្ជាក់ថា ការកាត់ផ្ដាច់ឧស្ម័នទៅកាន់អឺរ៉ុប ដោយរុស្ស៊ីនេះ ធ្វើឡើងនៅក្រោយពេលដែលអាមេរិក និងមេដឹកនាំអឺរ៉ុបបើកកិច្ចប្រជុំរួមគ្នាមួយ ក្នុងការឈានទៅដាក់គំនាបតម្លៃប្រេងរបស់រុស្ស៊ី ដើម្បីកាត់ផ្ដាច់ប្រភពចំណូលដ៏ធំរបស់ប្រទេសនេះ។ ប៉ុន្ដែ រុស្ស៊ីបានអះអាងតបវិញថា ខ្លួននឹងបង្កើនការនាំចេញប្រេងទៅកាន់តំបន់អាស៊ីឲ្យកាន់តែច្រើនថែមទៀត ជំនួសទីផ្សារលោកខាងលិច៕
អត្ថបទ៖ សុខ ជា
