ទ្វីបអាហ្វ្រិកជាតំបន់ដែលចិននិងរុស្ស៊ីកំពុងពង្រីកឥទ្ធិពលរបស់ខ្លួនយ៉ាងលឿនរហ័ស និងមានប្រសិទ្ធិភាព តាមរយៈការបង្ហូរចូលនូវគម្រោងវិនិយោគយ៉ាងច្រើនសន្ធឹកសន្ធាប់។ លើសពីនេះឥទ្ធិពលអឺរ៉ុបក្នុងតំបន់នៅមួយរយៈចុងក្រោយហាក់រអិលចុះបន្តិច។ រអិលចុះក៏ដោយសារតែអាហ្វ្រិកធ្លាប់អន់ចិត្តនឹងអឺរ៉ុប ដែលមានការចែករំលែកវ៉ាក់សាំងកូវីដ១៩ស្តួចស្តើងមកកាន់ពួកគេ បើធៀបនឹងអ្វីដែលចិនបានធ្វើ។
ដើម្បីប៉ះប៉ូវបញ្ហានេះ សហភាពអឺរ៉ុបនៅក្នុងកិច្ចប្រជុំកំពូលកាលពីថ្ងៃព្រហស្បតិ៍បានសន្យា ផ្តល់កញ្ចប់ជំនួយជាច្រើន ដើម្បីទំនុកបម្រុងវិស័យសុខាភិបាល អប់រំ និងស្ថិរភាពសន្តិសុខនៅក្នុងទ្វីបអាហ្រ្វិក។ ទន្ទឹមនឹងនេះ ដើម្បីប្រជែងជាមួយគំនិតផ្តួចផ្តើមខ្សែក្រវ៉ាត់ និងផ្លូវរបស់ប្រទេសចិននៅក្នុងតំបន់ អឺរ៉ុបសន្យាបន្ថែមទំហំវិនិយោគនៅអាហ្វ្រិកជិត ៣៥០ពាន់លានដុល្លារទៀត។
អត្ថបទទាក់ទង!
គួរជម្រាបថា ភាពជាដៃគូរវាងអាហ្វ្រិក-អឺរ៉ុប ហាក់មិនសូវល្អូកល្អិននឹងគ្នាប៉ុន្មានទេនៅមួយរយៈចុងក្រោយ ពិសេសអំឡុងពេលមានជំងឺរាតត្បាតកូវីដ១៩។ បណ្តាប្រទេសនៅអឺរ៉ុប និងប្រទេសអ្នកមានផ្សេងទៀត ត្រូវបានគេរិះគន់យ៉ាងខ្លាំង នៅអំឡុងពេលកូវីដ១៩ផ្ទុះរាលដាដំបូង ដោយប្រទេសតំបន់នេះ មានស្តុកទុកឧបករណ៍ការពារនានា និងក្រោយៗមកទៀតស្តុកទុកវ៉ាក់សាំងប្រឆាំងកូវីដ១៩ មិនព្រមបែងចែកច្រើនទៅប្រទេសក្រីក្រដែលកំពុងខ្វះខាត។ មេដឹកនាំមកពីប្រទេសនៃទ្វីបអាហ្រ្វិកមួយចំនួន បានរអ៊ូរទាំពីការបែងចែកវ៉ាក់សាំងយឺតយ៉ាវដល់ពួកគេ ដែលគេចាត់ទុកជាសញ្ញារើសអើងមួយ ដូចកាលពីជំនាន់ជនជាតិអាហ្រ្វិក ត្រូវបានគេរើសអើងថាជាទាសករជាដើម។
ជាក់ស្តែង គិតត្រឹមដើមខែកុម្ភៈនេះ មានតែជនជាតិអាហ្រ្វិក ១១% ប៉ុណ្ណោះដែលបានចាក់វ៉ាក់សាំងការពារមេរោគកូវីដ១៩ទាំងពីរដូស ដែលនេះជាចំនួនមួយតិចតួចបំផុតបើធៀបនឹងប្រទេសផ្សេងទៀតជុំវិញពិភពលោក។
សូមបញ្ជាក់ថា ដោយសារតែភូមិសាស្រ្តនយោបាយ និងភាពសំបូរធនធានរ៉ែវត្ថុធាតុដើម ធ្វើឲ្យអាហ្វ្រិក ក្លាយជាគោលដៅចង់បានពីគ្រប់ទិសទី។ ក្នុងនោះ ប្រទេសអឺរ៉ុបត្រូវប្រឈមធំជាងគេ ជាមួយមហាអំណាចចិន ដែលកំពុងចាក់គ្រឹះឥទ្ធិពល ដើម្បីប្រយោជន៍សេដ្ឋកិច្ចខ្លួន ខណៈរុស្សី ដែលមានក្រុមទាហានស៊ីឈ្នូល នៅតាមបណ្តាប្រទេសនៅអាហ្វ្រិកមួយចំនួនសម្រាប់ការពារប្រយោជន៍ក្រុមហ៊ុនឯកជនរបស់ខ្លួន កំពុងបង្កអស្ថិរភាព នៅក្នុងតំបន់ខ្លះ ដែលមានសារៈសំខាន់ផងដែរសម្រាប់អឺរ៉ុប៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
