មេរោគកូវីដ-១៩ បំប្លែងថ្មីឈ្មោះ ឌែលតា នេះត្រូវបានគេរកឃើញជាលើកដំបូងនៅក្នុងប្រទេសឥណ្ឌាហើយបច្ចុប្បន្ន វាកំពុងបន្ដរាតត្បាតកាន់តែខ្លាំងនៅពាសពេញពិភពលោក ដោយសារតែវាមានកម្រិតឆ្លងខ្ពស់ជាងប្រភេទមេរោគកូវីដ-១៩ មុនៗ។
ទីភ្នាក់ងារគ្រប់គ្រងជំងឺរាតត្បាតរបស់សហភាពអឺរ៉ុប បានបញ្ជាក់ថា កន្លងមកមានតែមេរោគកូវីដ១៩បំប្លែងខ្លួនដែលមានប្រភពមកពីអង់គ្លេស ឈ្មោះថា «អាល់ហ្វា» ប៉ុណ្ណោះ ដែលបានរាតត្បាត និងលុកលុយខ្លាំងក្នុងតំបន់អឺរ៉ុប។ ប៉ុន្តែពេលនេះ អឺរ៉ុបកំពុងប្រឈមនឹងការរាតត្បាតពីមេរោគបំប្លែងខ្លួនថ្មី «ឌែលតា» ដែលអាចឈានទៅគ្របដណ្តប់ជាង ៩០%នៃករណីឆ្លងថ្មីក្នុងពេលឆាប់ៗ យ៉ាងយូរបំផុតត្រឹមខែសីហាខាងមុខ។
ការព្រមានពីសហភាពអឺរ៉ុប ធ្វើឡើងនៅចំពេលដែល ប្រទេសរុស្សីថ្មីៗនេះ ក៏បានទាញសញ្ញាព្រមានពីការផ្ទុះរាលដាលខ្លាំង នៅរដ្ឋធានីម៉ូស្កូ និង នៅតំបន់ជាច្រើនទៀតនៅរុស្សី ខណៈដែល យុទ្ធនាការចាក់វ៉ាក់សាំងនៅប្រទេសរុស្សី មានល្បឿនយឺតយ៉ាវ។
អត្ថបទទាក់ទង!
ដោយឡែក សម្រាប់ចក្រភពអង់គ្លេស គេសង្កេតឃើញថាមេរោគ «ឌែលតា»បំប្លែងខ្លួនថ្មី ទំនងជាមិនអាចគម្រាមកំហែងដល់ពលរដ្ឋអង់គ្លេសបានទេ ដោយហេតុថា ពួកគេភាគច្រើនបានចាក់វ៉ាក់សាំងបង្ការកូវីដ-១៩រួចរាល់ ពោលគឺមានពលរដ្ឋពេញវ័យប្រមាណ ៨២% ដែល បានចាក់វ៉ាក់សាំងមួយដូស និង ជាង ៦០% ទៀត ទទួលបានទាំងពីរដូសរួចរាល់។
ប្រការនេះត្រូវបានភ្នាក់ងារគ្រប់គ្រងជំងឺរាតត្បាតអឺរ៉ុប ទទូចឲ្យប្រទេសនៅតំបន់អឺរ៉ុបទាំងអស់ បន្ថែមល្បឿនលើយុទ្ធនាការចាក់វ៉ាក់សាំងដល់ពលរដ្ឋ ដើម្បីទប់ទល់ និង កាត់បន្ថយផលប៉ះពាល់មកលើសុខភាព ពីការឆ្លងរាលដាលរបស់មេរោគបំប្លែងខ្លួនថ្មី កាន់តែឆាប់តាមដែលអាចធ្វើទៅបាន។
ដោយឡែក នៅប្រទេសអ៊ីស្រាអែលឯណោះវិញ ដែលជាប្រទេសមួយក្នុងចំណោមប្រទេសមានការចាក់វ៉ាក់សាំងច្រើនជាងគេបំផុតក្នុងពិភពលោក ក៏កំពុងតែបារម្ភខ្លាំងពីការឆ្លងមេរោគបំប្លែងថ្មី ឌែលតា នេះដែរ។ ជាក់ស្ដែង បើតាមមន្ត្រីជាន់ខ្ពស់ នៃក្រសួងសុខាភិបាលអ៊ីស្រាអែលបាននិយាយថា មានករណីឆ្លងថ្មីប្រមាណ ៧០% ត្រូវបានរកឃើញថា ជាការឆ្លងមេរោគកូវីដ-១៩ បំប្លែងថ្មី ឌែលតា នេះ។ រដ្ឋាភិបាលអ៊ីស្រាអែលក៏អាចនឹងដាក់ឲ្យធ្វើចត្តាឡីស័កចំពោះអ្នកដែលជាប់ពាក់ព័ន្ធឆ្លងមេរោគ ឌែលតានេះផងដែរ បើទោះបីជាពួកគេបានចាក់វ៉ាក់សាំងរួចរាល់ហើយក៏ដោយ។ា
សូមបញ្ជាក់ថា កាលពេលថ្មីៗនេះ មន្ត្រីជាន់ខ្ពស់នៃអង្គការសុខភាពពិភពលោក ក៏ធ្លាប់បានលើកឡើងដែរថា មេរោគកូវីដ១៩បំប្លែងខ្លួនថ្មីប្រភេទ «ឌែលតា» កំពុងតែឆ្លងរាលដាលទៅពាសពេញពិភពលោកតែម្តង មិនមែនរាលដាលតែនៅតំបន់អឺរ៉ុបនោះទេ។
មេរោគបំប្លែងខ្លួននេះ ត្រូវបាន WHO ចាត់ថ្នាក់ថា ជាមេរោគ ដែលគួរឱ្យព្រួយបារម្ភជាសាកល កាលពីខែឧសភាកន្លងទៅ។ វីរុសបំប្លែងខ្លួនថ្មី ឌែលតា ត្រូវបានរកឃើញដំបូងនៅប្រទេសឥណ្ឌាកាលពីឆ្នាំ២០២០ ហើយវាជាវីរុសទីបួនហើយ ដែលត្រូវចាត់ទុកជាប្រភេទគួរឲ្យព្រួយបារម្ភ ក្នុងកម្រិតទូទាំងពិភពលោក និង ទាមទារឱ្យមានការតាមដាន ប្រុងប្រយ័ត្ន និង យកចិត្តទុកដាក់ឲ្យបានខ្ពស់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
