តើផែនការចាក់វ៉ាក់សាំងឲ្យបាន៧០% នៅមុនរដូវក្តៅរបស់អឺរ៉ុបអាចសម្រេចបានដែរ ឬយ៉ាងណា?

ស្នងការសុខភាពសាធារណៈរបស់សហភាពអឺរ៉ុប លោកស្រី ស្តេឡា គីរីឃីត (Stella Kyriakide) បានអះអាងថា តំបន់អឺរ៉ុបបានសម្រេចការចាក់វ៉ាក់សាំងយ៉ាងហោចណាស់មួយដូសដល់ពលរដ្ឋបាន ៧០% ហើយដែលក្នុងចំនួននេះ មាន ៥៧%ជាពលរដ្ឋដែលទទួលបានវ៉ាក់សាំងទាំងពីរដូស។ ដូចនេះ លោកស្រីជឿថា ផែនការចាក់វ៉ាក់សាំងទាំងពីរដូសដល់ពលរដ្ឋឲ្យបាន ៧០% និងអាចបានជោគជ័យតាមផែនការនៅមុនរដូវក្តៅចូលមកដល់។

គួររំឭកថា សហភាពអឺរ៉ុបដំបូងឡើយមានភាពយឺតយ៉ាវខ្លាំង ក្នុងការចាប់ផ្តើមយុទ្ធនាការចាក់វ៉ាក់សាំងរបស់ខ្លួន ដោយសារតែគ្រានោះ អឺរ៉ុបបានពឹងផ្អែកខ្លាំងពេកលើវ៉ាក់សាំង AstraZeneca របស់អង់គ្លេស ដែលសឹងតែផ្គត់ផ្គង់មិនទាន់តម្រូវសម្រាប់អង់គ្លេសខ្លួនឯងផងនោះ។ គេនៅចាំបានថា កាលនោះ អឺរ៉ុបថែមទាំងឈានដល់ការប្តឹងផ្តល់គ្នាជាមួយក្រុមហ៊ុន AstraZenecaរបស់អង់គ្លេស ជុំវិញករណីផ្គត់ផ្គង់វ៉ាក់សាំងនេះទៀតផង។

យ៉ាងណាមិញ នៅបន្ទាប់ពីអឺរ៉ុបបានបែរទៅរកវ៉ាក់សាំង Pfizer របស់អង់គ្លេសចាប់ពីដើមត្រីមាសទី២ឆ្នាំ២០២១មកឃើញថា យុទ្ធនាការចាក់វ៉ាក់សាំងនៅអឺរ៉ុបបានមានសន្ទុះឡើងវិញគួរឲ្យកត់សម្គាល់។

ប្រធានសហភាពអឺរ៉ុប លោកស្រី វ៉នឌឺ លីយ៉េន (von der Leyen) បាននិយាយថា យើងបានផ្តល់សន្ទុះឡើងវិញ ដល់ដំណើរការចាក់វ៉ាក់សាំងបានយ៉ាងជោគជ័យ ប៉ុន្តែយើងចាំបាច់បង្កើនកិច្ចខិតខំប្រឹងប្រែងបន្តទៀត។

សូមជ្រាបថា បើគេគិតពីចំនួនដូសនៃវ៉ាក់សាំងដែលត្រូវបានចាក់ឲ្យពលរដ្ឋ ប្រទេសចិននៅតែបន្តជាប្រទេសឈរកំពូលតារាង បានចាក់វ៉ាក់សាំងក្នុងចំនួនច្រើនជាងគេ ដល់ទៅ ១ពាន់៦រយលានដូស ខណៈអឺរ៉ុបនៅលំដាប់លេខ២ ក្នុងចំនួនវ៉ាក់សាំងប្រើប្រាស់អស់ជាង ៤៦០លានដូស និងឥណ្ឌាឈរនៅលេខ៣ ប្រើប្រាស់អស់ជាង៤៥០លានដូស។ នេះបើតាមទិន្នន័យដែលចងក្រងដោយសារព័ត៌មាន អាមេរិក Bloomberg៕