កំណើនសេដ្ឋកិច្ចអាមេរិក និងចិន ដែលកំពុងតែស្ទុះងើបឡើងខ្លាំងនេះ គឺជាក្ដីសង្ឃឹមខ្ពស់ណាស់ក្នុងជំរុញកំណើនសេដ្ឋកិច្ចពិភពលោកទាំងមូលឲ្យស្ទុះងើបឡើងវិញលឿនជាងការរំពឹងទុកទៅតាមគ្នាផងដែរ។
បើតាមរបាយការណ៍ការិយាល័យស្ថិតិអឺរ៉ុបដដែលបានឲ្យដឹងថា សេដ្ឋកិច្ចអឺរ៉ុបនៅ៣ខែ ដើមឆ្នាំ២០២១ ធ្លាក់ចុះ០,៦%។ មូលហេតុ គឺបណ្តាលមកពី ឥទ្ធិពលនៃវិធានការបិទខ្ទប់ ដើម្បីបង្ការការ រីករាលដាលនៃកូវីដ-១៩ បូករួមនឹងភាពយឺតយ៉ាវនៃកម្មវិធីចាក់វ៉ាក់សាំងផងដែរ។
អត្ថបទទាក់ទង
យ៉ាងណាមិញ ការធ្លាក់ចុះនេះមិនសូវធ្ងន់ធ្ងរដូចការធ្លាក់ចុះកាលពីត្រីមាសទី២ ឆ្នាំ២០២០ ធ្លាក់ចុះ ជាង ១១,៦% និងត្រីមាសទី៣ ឆ្នាំ២០២០ ធ្លាក់ចុះជាង ១២,៥%នោះទេ។ តាមទិន្នន័យបានបង្ហាញថា ក្នុងចំណោមប្រទេសចាយប្រាក់អឺរ៉ូ ប្រទេសព័រទុយហ្គាល់ ជាប្រទេសដែលរងគ្រោះខ្លាំងជាងគេដោយមានកំណើនសេដ្ឋកិច្ចអវិជ្ជមាន -៣,៣% នៅចន្លោះខែមករា និងមីនាឆ្នាំ ២០២១។ ដោយឡែក ប្រទេសបារាំងបែរជាមានកំណើនសេដ្ឋកិច្ចវិជ្ជមានចំនួន០,៤%ទៅវិញ ដោយសារតែតម្រូវការក្នុងស្រុកមានការកើនឡើង។
ទោះបីការស្រុតចុះនៃសេដ្ឋកិច្ចអឺរ៉ុបមានត្រឹម ០,៦%នៅត្រីមាសទី១ឆ្នាំ២០២១ ខុសពីការព្យាកររបស់សេដ្ឋវិទូកន្លងមកថា នឹងមានចំនួន១%ក្ដី ប៉ុន្តែបើប្រៀបធៀបទៅនឹងកំណើនសេដ្ឋកិច្ចរបស់មហាអំណាចចិន និង អាមេរិក គឺវាមានភាពខុសគ្នាឆ្ងាយណាស់។
ជាក់ស្តែង ប្រទេសមហាយក្សសេដ្ឋកិច្ចទាំងពីរអាមេរិក ហើយនឹងចិននេះ កំពុងរំកិលខ្លួនឡើងវិញនូវកំណើនសេដ្ឋកិច្ចខ្លាំងដូចគ្នា ។ រយៈពេល៣ខែថ្មីៗនេះ អាមេរិកមានកំណើនសេដ្ឋកិច្ចខ្ពស់ខ្លាំងមិនធ្លាប់មានគិតតាំងពីឆ្នាំ ២០០៣មក។ ចំនួនអ្នកអត់ការងារធ្វើនៅអាមេរិកក៏មានការធ្លាក់ចុះគួរឲ្យកត់សម្គាល់ផងដែរ ពោលគឺធ្លាក់ចុះមកត្រឹម ៦% បើធៀបនឹង១៥% គ្រាដែលអាមេរិកកំពុងមានការឆ្លងរាលដាលកូវីដ-១៩ខ្លាំង។ ចំណែកប្រទេសចិនវិញ ផលិតផលក្នុងស្រុកសរុប ហក់ឡើងដល់ទៅជាង ១៨% ក្នុងរយៈពេល៣ខែដើមឆ្នាំ២០២១ដូចគ្នា។
មូលហេតុចម្បងៗអ្វីខ្លះ ដែលធ្វើឲ្យសេដ្ឋកិច្ចអឺរ៉ុប ធ្លាក់ចុះដាច់ឆ្ងាយខ្លាំងពីសេដ្ឋកិច្ចអាមេរិក ហើយនឹង ចិននោះ?
មែនទែនទៅ មានមូលហហេតុធំៗពីរ ដែលធ្វើឲ្យសេដ្ឋកិច្ចតំបន់អឺរ៉ុប ដើរយឺតជាងអាមេរិក និងចិនឆ្ងាយដូចនេះ គឺទី១ដោយសារតែ ភាពយឺតយ៉ាវក្នុងការពន្លឿនផែនការទម្លាក់កញ្ចប់ថវិកា ដើម្បីស្រោចស្រង់សេដ្ឋកិច្ចនៅតំបន់អឺរ៉ុបឡើងវិញ។ ទី២ គឺដោយសារតែប្រទេសក្នុងតំបន់អឺរ៉ុបមួយនេះ មានភាពយឺតយ៉ាវ ក្នុងការចាក់វ៉ាក់សាំងបង្ការកូវីដ-១៩ រួមផ្សំនឹងវិធានការបិទខ្ទប់ប្រទេស ដើម្បីទប់ទល់នឹងជំងឺឆ្លងដ៏កាចសាហាវមួយនេះ។
ខុសពីរអាមេរិក យើងអាចសម្គាល់ឃើញថា ផែនការផ្តល់កញ្ចប់ថវិកាដើម្បីជំរុញកំណើនសេដ្ឋកិច្ចរាប់ពាន់លានដុល្លារដែលបានអនុម័តដោយរដ្ឋបាលអាមេរិកលោកចូ បៃឌិន បូករួមនឹងកម្មវិធីចាក់វ៉ាក់សាំងដ៏លឿនរហ័ស ពិតជាបានរួមចំណែកយ៉ាងសំខាន់ដល់ការងើបឡើងវិញនៃសេដ្ឋកិច្ចរបស់មហាអំណាចលេខ១លើពិភពលោកមួយនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
