ជាក់ស្ដែង នៅថ្ងៃអង្គារសប្ដាហ៍នេះ នៅក្រោយបិទម៉ោងជួញដូរ ភាគហ៊ុនរបស់ធនាគារអេស៊ីលីដាមានការជួញដូរដល់ទៅជាង ១៦ម៉ឺនភាគហ៊ុន មានតម្លៃកើនដល់ ១ម៉ឺន២ពាន់១រយរៀលក្នុងមួយភាគហ៊ុន មានអត្រាកំណើនដល់ទៅ១០% បន្ថែមទៀត បន្ទាប់ពីម្សិលមិញបានកើនឡើងជិត៧%។
ថ្នាក់ដឹកនាំក្រុមហ៊ុនមូលបត្រអេស៊ីលីដា ស៊ីឃ្យូរីធី ជឿជាក់ថា តម្លៃភាគហ៊ុនរបស់ធនាគារអេស៊ីលីដា នឹងអាចបន្តកើនឡើងដល់តម្លៃ IPO ឬអាចលើសពីនេះក្នុងរយៈពេលដ៏ខ្លីខាងមុខ បើផ្អែកលើសម្ទុះនៃការជួញដូរនៅប៉ុន្មានថ្ងៃចុងក្រោយនេះ ខណៈដែលតម្លៃ IPO ដំបូងរបស់ភាគហ៊ុនអេស៊ីលីដា មានតម្លៃ ១ម៉ឺន៦ពាន់២រយរៀលក្នុង១ភាគហ៊ុន។
Story: លោក ព្រំ វិសុទ្ធ អគ្គនាយកក្រុមហ៊ុនមូលបត្រអេស៊ីលីដា ស៊ីឃ្យូរីធី ភីអិលស៊ីបានចាត់ទុកការចូលខ្លួនមកវិនិយោគលើមូលបត្រកម្មសិទ្ធិរបស់ធនាគារអេស៊ីលីដាពីសំណាក់ក្រុមហ៊ុនអេស៊ីលីដាហ្វាយណាន់ហ្សល់ត្រាស់ ជាដំណឹងដ៏រីករាយសម្រាប់អ្នកវិនិយោគ និងអេស៊ីលីដាផ្ទាល់ក្នុងការស្តារតម្លៃភាគហ៊ុនដែលបានធ្លាក់ចុះមួយរយៈកន្លងមកនេះ។ អ្នកជំនាញរូបនេះអះអាងថា តម្លៃភាគហ៊ុនរបស់ធនាគារអេស៊ីលីដាបានហក់ឡើងខ្ពស់នៅប៉ុន្មានថ្ងៃចុងក្រោយនេះ។
អត្ថបទគួរអាន
តាមរយៈការវិនិយោគរបស់អេស៊ីលីដាហ្វាយណាន់ហ្សល់ត្រាស់ និងការរក្សាប្រតិបត្តិការរឹងមាំក្នុងវិបត្តិកូវីដ-១៩ គួបផ្សំការដាក់ចេញផែនការច្បាស់លាស់របស់អេស៊ីលីដា លោក ព្រំ វិសុទ្ធ ជឿជាក់ថា តម្លៃភាគហ៊ុនអេស៊ីលីដានឹងបន្តហក់ឡើងខ្ពស់ស្មើភាគហ៊ុនដែលបានបោះផ្សាយលក់លើកដំបូង ឬលើសពីនេះក្នុងរយៈពេលដ៏ខ្លីខាងមុខនេះ។
គួររំលឹកថា ធនាគារអេស៊ីលីដាកាលពីពេលថ្មីៗនេះ បានចេញសេចក្តីប្រកាសព័ត៌មានមួយស្តីពីផែនការវិនិយោគរបស់អេស៊ីលីដាហ្វាយណាន់ស្សល់ ត្រាស់ ក្នុងការទិញមូលបត្រកម្មសិទ្ធិរបស់ធនាគារអេស៊ីលីដារយៈពេល៥ឆ្នាំ។ ថ្នាក់ដឹកនាំធនាគារអេស៊ីលីដា និងអ្នកជំនាញក្នុងផ្សារមូលបត្រកម្ពុជា(CSX)អះអាងថា ការវិនិយោគនេះ គឺធ្វើឡើងស្របតាមផែនការ និងយុទ្ធសាស្ត្ររបស់ភាគហ៊ុនិក។
បើតាមលោកស្រី ម៉ារ អមរា អនុប្រធាននាយកប្រតិបត្តិធនាគារអេស៊ីដាបានឲ្យដឹងថា អេស៊ីលីដាហ្វាយណាន់ហ្សល់ ត្រាស់ ជាភាគហ៊ុនិកធំមួយរបស់ធនាគារ អេស៊ីលីដា ដែលបានបង្កើតឡើង អនុលោមតាមច្បាប់នៃកម្ពុជា ដែលមានគោលដៅលើកទឹកចិត្តដល់ធនាគារអេស៊ីលីដាឱ្យប្រកាន់ខ្ជាប់នូវគោលបំណង ដើម្បីគាំទ្រដល់សហគ្រាសខ្នាតតូចបំផុត ខ្នាតតូច និងមធ្យម និងរក្សានូវសញ្ជាតិជាក្រុមហ៊ុនខ្មែរ របស់អេស៊ីលីដា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
