លោកច្រឹក សុខនីម ប្រធានសមាគមភ្នាក់ងារអចលនវត្ថុកម្ពុជាបានមានប្រសាសន៍លើកឡើងថា វិស័យអចលនទ្រព្យនៅកម្ពុជានៅតែបន្តការរីកចម្រើនរបស់ខ្លួនដដែល បើទោះបីជាប្រឈមបញ្ហាវិបត្តិគ្រោះទឹកជំនន់ក្តី។
លោកបន្តថា លើសពីនេះទៀត បើប្រៀបធៀបតម្លៃអចលនទ្រព្យរបស់កម្ពុជា ទៅនឹងតំបន់អាស៊ានឃើញថា តម្លៃនៅកម្ពុជាគឺធូរថ្លៃជាងគេ ដូច្នេះរយៈពេល ៥ទៅ៦ឆ្នាំទៀត វិស័យអចលនទ្រព្យនៅកម្ពុជានៅបន្តកំណើនរបស់ខ្លួនដដែល។
ជាមួយគ្នានេះ លោក ឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ ស៊ីភីអិល បានឲ្យដឹងថា ស្ថិតនៅក្នុងស្ថានភាពនៃវិបត្តិផ្ទួនៗដូចជាជំងឺកូវីដ ១៩ នេះ ក្រុមហ៊ុនលោកនៅតែបន្តទាក់ទាញបានចំនួនអតិថិជនស្វែងរកទិញលក់អចលនទ្រព្យជាហូរហែរដដែល មិនដែលដាច់ភ្ញៀវនោះឡើយ។ បើតាមតួលេខពីខាងក្រសួង ក៏ដូចជាអគ្គនាយកដ្ឋានពន្ធដារបង្ហាញថា ការទិញដូរអចលនទ្រព្យនៅក្នុងរាជធានីភ្នំពេញក្នុងមួយថ្ងៃនៅរក្សាចំនួនបាន ២០០ ទៅ៣០០ករណីដែរ។
ជាការអះអាងរបស់អ្នកជំនាញ វិស័យអចលនទ្រព្យនៅកម្ពុជានៅតែជាសសរស្តម្ភមួយដ៏មានសារៈសំខាន់ដែលទ្រទ្រង់ដល់កំណើនសេដ្ឋកិច្ចកម្ពុជា។ វិស័យអចលនទ្រព្យនេះនៅតែបន្ដសកម្មភាពនៃការទិញលក់ ជាធម្មតា ដែលភាគច្រើនជាការទិញលក់រវាងអ្នកនៅក្នុងស្រុក ខណៈការទិញលក់រវាងវិនិយោគិនបរទេសបានដាំក្បាលចុះជាខ្លាំងដោយសារមានការរំខានពីការរីករាលដាលនៃជំងឺកូវីដ-១៩។
