អគ្គលេខាធិការអង្គការណាតូ លោក Jens Stoltenberg បាននិយាយជាមួយរដ្ឋមន្ត្រីការបរទេសនៃប្រទេសហ្វាំងឡង់ និងស៊ុយអែតថា «នេះគឺជាពេលវេលាប្រវត្តិសាស្ត្រមួយ» ហើយសម្ព័ន្ធមិត្តនឹងកាន់តែរឹងមាំជាមួយសមាជិកទាំង ៣២ របស់ណាតូ។
គួរបញ្ជាក់ថា ចុះហត្ថលេខាលើពិធីសារនេះមានន័យថា រដ្ឋាភិបាលនៃប្រទេសហ្វាំងឡង់ និងស៊ុយអែត អាចចូលរួមក្នុងកិច្ចប្រជុំនានារបស់អង្គការ NATO និងអាចចូលក្នុងដំណើរការស៊ើបការណ៍សម្ងាត់ផ្សេងទៀតផងដែរ។
ក៏ប៉ុន្តែ វាទំនងជាចំណាយពេលដល់ទៅមួយឆ្នាំឯណោះ ក្នុងការផ្តល់សច្ចាប័ន ដោយសមាជិកណាតូ ២៩ ផ្សេងទៀត ដើម្បីឲ្យប្រទេសទាំងពីរការពារដោយមាត្រាទី៥ របស់ណាតូ ដែលថ្លែងថា បើមានការវាយប្រហារលើសម្ព័ន្ធមិត្តណាមួយរបស់ណាតូ នោះជាការប្រកាសសង្គ្រាមលើសមាជិកទាំងមូលរបស់ណាតូតែម្តង។
ស្របពេលជាមួយគ្នានេះដែរ សភាកាណាដាបានសម្រេចជាឯកច្ឆ័ន្ទគាំទ្រលើពិធីសាររបស់ប្រទេសហ្វាំងឡង់ និងស៊ុយអែត ដែលបានអនុម័តផ្ដល់សច្ចាប័នឲ្យប្រទេសទាំងពីរនេះចូលជាសមាជិកពេញសិទ្ធិមុនគេតែម្តង។
អត្ថបទគួរអាន
ភាគីកាណាដាបានលើកឡើងថា៖ «កាណាដាចង់ក្លាយជាប្រទេសទីមួយ ដែលផ្តល់សច្ចាប័ននេះ»។ មួយវិញទៀត នាយករដ្ឋមន្ត្រីកាណាដា លោក Justin Trudeau បាននិយាយនៅក្នុងសេចក្តីថ្លែងការណ៍មួយថា៖ «កាណាដាពិតជាមានទំនុកចិត្តយ៉ាងខ្លាំងក្នុងការចូលជាសមាជិកណាតូពីសំណាក់ប្រទេសហ្វាំងឡង់ និងស៊ុយអែត ហើយកាណាដា គ្មានការស្ទាក់ស្ទើរនោះទេ ក្នុងការអនុម័តផ្ដល់សច្ចាប័ននេះ ដើម្បីរួមចំណែកដល់ការការពារសន្តិសុខរបស់សម្ព័ន្ធមិត្តទាំងមូល»។
ប្រទេសហ្វាំងឡង់ និងស៊ុយអែតគឺជាប្រទេសអព្យាក្រឹតរាប់ទស្សវត៍មកហើយ តែបានស្វះស្វែងចូលជាសមាជិកនៃអង្គការយោធាណាតូ ក្រោយពីបានមើលឃើញការឈ្លានពានរបស់រុស្សីទៅលើអ៊ុយក្រែន។
ដោយឡែក ទីក្រុងម៉ូស្គូបានព្រមានប្រទេសទាំងពីរនេះម្តងហើយម្តងទៀត មិនឱ្យចូលជាសមាជិកណាតូនោះទេ ដោយនិយាយថា «ប្រទេសទាំងពីរនឹងមានផលវិបាកធ្ងន់ធ្ងរខាងយោធា និងនយោបាយ» មិនដូចពីមុនតទៅទៀតទេ៕
