បើតាមលោក សុខ រ៉ាដែន បានអះអាងប្រាប់សារព័ត៌មានឌីជីថលខេមបូណូមីស ភាគីចិន និងកម្ពុជា កំពុងអនុវត្តនីតិវិធីនៃការវាយតម្លៃនិងត្រួតពិនិត្យត្រីប្រា ទៅកាន់ប្រទេសចិន ក្រោយចិន បានបើកភ្លើងខៀវ ដល់កម្ពុជា ដើម្បីអាចនាំចេញផ្លែមៀនប៉ៃលិន និងត្រីប្រាដោយផ្ទាល់ទៅទីផ្សារចិន។ បើតាមប្រធានសមាគមវារីវប្បករ ស្រះត្រីធំៗ ចំនួន៣ របស់កសិករត្រូវបានជ្រើសរើស ដើម្បីធ្វើការវាយតម្លៃនិងត្រួតពិនិត្យ វាយតម្លៃមុននឹងអាចនាំត្រីប្រាទៅប្រទេសចិនបាន។ លោក សុខ រ៉ាដែន បានគូសបញ្ជាក់ថា ជាដំណាក់កាលដំបូង សមាគមមិនទាន់មានការផ្សព្វផ្សាយទូលាយនោះទេ ជុំវិញការនាំចេញត្រីប្រាទៅចិននេះ ដោយលោកអះអាងថា រង់ចាំលទ្ធផលនៃការវាយតម្លៃ និងត្រួតពិនិត្យជាមុនសិន ដោយប្រធានសមាគមរូបនេះ បានបន្តថា នេះគឺជាការដាស់ស្មារតីដល់ក្រុមអ្នកចិញ្ចឹមត្រីប្រា ឱ្យពួកគាត់ត្រៀមខ្លួនជាមុន។
យ៉ាងណាក៏ដោយ សុខ រ៉ាដែន មិនទាន់មានការរំពឹងខ្លាំងពេកនោះទេថា ដំណាក់ដំបូងនឹងអាចនាំចេញត្រីប្រាក្នុងបរិមាណប៉ុន្មាន ប៉ុន្តែ ប្រធានសមាគមរូបនេះ សង្ឃឹមថា ទីផ្សារត្រីប្រាខ្មែរនឹងប្រសើរជាងពេលមុនៗ ដែលធ្លាប់ជួបបញ្ហាកកស្ទះ ព្រោះតែខ្វះទីផ្សារ។ ជាមួយគ្នានេះ លោកក៏សង្ឃឹមផងដែរថា ក្រោយត្រីប្រាអាចនាំចេញទៅចិន ត្រីប្រានឹងអាចមានតម្លៃសមរម្យ និងអាចឱ្យកសិករទទួលផលចំណេញ ខណៈសព្វថ្ងៃ ត្រីប្រា មានតម្លៃ ៤ពាន់រៀល ក្នុងមួយគីឡូក្រាម។ ទោះយ៉ាងណា តម្លៃនេះមិនទាន់អាចឱ្យកសិករចំណេញនៅឡើយ ព្រោះកសិករត្រូវចំណាយច្រើន លើថ្លៃចំណី និងការថែទាំ។ នេះជាការបញ្ជាក់បន្ថែមរបស់លោក សុខ រ៉ាដែន។
អត្ថបទគួរអាន
យោងតាមស្ថានទូតចិនប្រចាំកម្ពុជា កាលពីពេលថ្មីៗ ចិននិងកម្ពុជា បានរៀបចំកិច្ចប្រជុំវាយតម្លៃតាមរយៈវីឌីអូលើភូតគាមអនាម័យត្រីប្រាកម្ពុជា ដើម្បីនាំចេញទៅកាន់ប្រទេសចិន ដែលកិច្ចការនេះ មានរយៈពេល ៩ថ្ងៃ ចាប់ពីថ្ងៃទី២០ ដល់ថ្ងៃទី២៨ ខែមករា ឆ្នាំ២០២២។ កិច្ចប្រជុំនេះ គឺជាវិធានការដ៏សំខាន់មួយទៀតសម្រាប់ចិន និងកម្ពុជា ក្នុងការអនុវត្តកុងសង់ស៊ីសរបស់ថ្នាក់ដឹកនាំប្រទេសទាំង២ ក្នុងការពន្លឿននាំចេញកសិផលកម្ពុជា។ ខណៈប្រទេសទាំង ២ កំពុងខិតខំសម្រេចឆន្ទៈ និងការប្ដេជ្ញាចិត្តដ៏មុតមាំក្នុងការនាំចេញកសិផលកម្ពុជាទៅកាន់ប្រទេសចិន និងការជំរុញកិច្ចសហប្រតិបត្តិការជាក់ស្តែងកាន់តែច្រើន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
