ថ្លែងនៅក្នុងពិធីសម្ពោធសាខាថ្មីហាង BAR-B-Q Plaza លោក ងន សាំង នាយកប្រតិបត្តិក្រុមហ៊ុន RMA Cambodia ដែលជាក្រុមហ៊ុនមេរបស់ក្រុមហ៊ុន EFG បានលើកឡើងថា បច្ចុប្បន្ន មានក្រុមហ៊ុនមិនតិចជាង១០នោះទេ ដែលបាននាំចូល និងកំពុងប្រតិបត្តិអាជីវកម្ម Franchise នៅកម្ពុជា ដោយក្រុមហ៊ុនខ្លះមាននាំចូល ២ ឬ ៣ ម៉ាក Franchise ផ្សេងគ្នា។
ប៉ុន្ដែ សម្រាប់តែក្រុមហ៊ុន EFG មួយប៉ុណ្ណោះ បាននាំចូលភោជនីយដ្ឋាន Franchise រហូតដល់ ៧ម៉ាកផ្សេងគ្នា និងមានសាខាហាងសរុបរហូតដល់ជិត ៦០កន្លែងទូទាំងប្រទេស។
លោក ងន សាំង បន្ថែមថា ការហូរចូលនៃអាជីវកម្ម Franchise មកទីផ្សារក្នុងស្រុកកាន់តែច្រើននេះ គឺជាដំណើរការមួយដែលប្រទេសកំពុងអភិវឌ្ឍតែងមានការពេញនិយម និងមានតម្រូវការ។ ទោះយ៉ាងណា លោកបានគូសបញ្ជាក់ថា អ្នកនាំចូលអាជីវកម្ម Franchise ក៏គួរតែសិក្សាពីតម្រូវការទីផ្សារ ពិសេស សេចក្ដីត្រូវការរបស់អតិថិជនឲ្យបានជាក់លាក់ជាមុនសិន មុននឹងនាំចូលមក។
ភោជនីយដ្ឋាន BAR-B-Q Plaza ដែលមានទីតាំងនៅក្បែរផ្សារទំនើប TK Avenue រាជធានីភ្នំពេញ។
បន្ថែមពីនេះ ការនាំចូលអាជីវកម្ម Franchise នីមួយៗ ក៏មានចំណាយទុនច្រើនគួរសមដែរ តួយ៉ាង បើតាមការលើកឡើងរបស់លោក ងន សាំង គ្រាន់តែសាខាទី២ ហាង BAR-B-Q Plaza ដែលមានទីតាំងនៅក្បែរផ្សារទំនើប TK Avenue ដែលទើបសម្ពោធនាពេលថ្មីៗនេះ បានចំណាយដើមទុនប្រមាណកន្លះលានដុល្លារឯណោះ។
ត្បិតថា ការនាំចូល Franchise ត្រូវចំណាយទុនច្រើនគួរសមក៏ដោយក្ដី ប៉ុន្ដែ លោក ងន សាំង អះអាងថា អាជីវកម្មនេះក៏ជួយដល់សេដ្ឋកិច្ចកម្ពុជាយ៉ាងច្រើនផងដែរ តួយ៉ាង សហគ្រិនអាចរៀនសូត្រពីការគ្រប់គ្រងបែបស្ដង់ដារ បច្ចេកទេសសំខាន់ៗទាក់ទងនឹងប្រតិបត្តិការអាជីវកម្ម ផ្ដល់ការងារដល់ប្រជាពលរដ្ឋ និងចំណូលពន្ធសម្រាប់ជាតិផងដែរ។
ជាមួយគ្នានេះដែរ លោក គួច សុខលី នាយកប្រតិបត្តិក្រុមហ៊ុន CBM Corporation ដែលបាននាំចូលម៉ាកអាជីវកម្ម Franchise ៥ម៉ាកផ្សេងគ្នា និងមានសាខាហាងសរុបរហូតដល់ជាង៤០សាខានៅកម្ពុជា បានថ្លែងប្រាប់ ខេមបូណូមីស ដែរថា ម៉ាក Franchise ល្បីៗដែលបានហូរចូលមកទីផ្សារកម្ពុជា នៅមិនទាន់មានច្រើនណាស់ណានៅឡើយទេ ដោយសារតែចំនួនប្រជាជនកម្ពុជានៅមានតិច បើធៀបនឹងប្រទេសជិតខាង ប៉ុន្ដែ នៅពេលដែលចំណូលប្រជាជនកាន់តែកើនឡើងច្រើន នោះតម្រូវការអាជីវកម្ម Franchise ក៏នឹងមានកាន់តែច្រើនទៅតាមនោះដែរ។
លោក គួច សុខលី នាយកប្រតិបត្តិក្រុមហ៊ុន CBM Corporation។
លោក គួច សុខលី បានលើកឡើងពីហេតុផលមួយចំនួនដែលជំរុញឲ្យក្រុមហ៊ុនធំៗងាកមកដាក់ការចាប់អារម្មណ៍នាំចូល Franchise មកកម្ពុជា រួមមានដូចជា ស្ថិរភាពនយោបាយល្អ ស្ថិរភាពសង្គម ស្ថិរភាពកំណើនសេដ្ឋកិច្ច និងកំណើនការវិនិយោគពីក្រៅប្រទេស។
ដោយឡែក សម្រាប់អាជីវកម្ម Franchise នៅក្នុងស្រុកវិញ ហាក់នៅមានចំនួនតិចតួចនៅឡើយ ប៉ុន្ដែ បើតាមការលើកឡើងរបស់លោក គួច សុខលី កន្លងមក អាជីវកម្មក្នុងស្រុកក៏បានរៀនសូត្រច្រើនពីបទពិសោធន៍របស់អាជីវកម្ម Franchise ពីខាងក្រៅផងដែរ។ ហើយទោះបីជាការរីកលូតលាស់របស់អាជីវកម្ម Franchise ក្នុងស្រុកនៅមានកម្រិតក៏ដោយ ប៉ុន្ដែ ការបោះជើងមួយជំហានៗរបស់ពួកគេហាក់មានភាពនឹងនរច្រើន។
សូមបញ្ជាក់ដែរថា កាលពីពេលថ្មីៗនេះ ភោជនីយដ្ឋាន ផាកកាហ្វេ ដែលជាម៉ាក Franchise ក្នុងស្រុកធំជាងគេ ក៏ទើបតែលក់ Franchise លើកដំបូងរបស់ខ្លួនទៅឲ្យក្រុមហ៊ុន Sajibumi សម្រាប់បើកលក់នៅក្នុងព្រលានយន្តហោះអន្តរជាតិភ្នំពេញ និងគ្រោងពង្រីកការលក់ Franchise បន្ថែមទៀតជាបន្តបន្ទាប់ផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
