កិច្ចព្រមព្រៀងនេះនឹងក្លាយជាកិច្ចព្រមព្រៀងទី៣ហើយ ដែលបានសម្រេចដោយក្រុមប្រទេសជី៧ ខណៈដែលបច្ចុប្បន្ន កំពុងមានសម្ពាធកាន់តែខ្លាំងទៅលើក្រុមប្រទេសអ្នកមាន និងបំភាយឧស្ម័នខ្លាំង ក្នុងការជួយប្រទេសក្រីក្រទប់ទល់នឹងការប្រែប្រួលអាកាសធាតុ និងការផ្លាស់ប្តូរទៅប្រើថាមពលស្អាតមិនប៉ះពាល់បរិស្ថាន។
សហភាពអឺរ៉ុបធ្លាប់បានចុះហត្ថលេខាលើកិច្ចព្រមព្រៀងស្រដៀងគ្នានេះមួយចំនួនកាលពីឆ្នាំមុនជាមួយប្រទេសអាហ្វ្រិកខាងត្បូង ហើយកាលពីខែមុនក៏បានចុះកិច្ចព្រមព្រៀងជាមួយប្រទេសឥណ្ឌូនេស៊ីផងដែរ។
ការិយាល័យបរទេសរបស់អង់គ្លេសបាននិយាយនៅក្នុងសេចក្តីថ្លែងការណ៍ថា ថវិកាដំបូងចំនួន ១៥ពាន់៥រយលានដុល្លារ ជាហិរញ្ញវត្ថុទាំងសម្រាប់វិស័យសាធារណៈ និងឯកជន នឹងត្រូវបានបញ្ចេញក្នុង រយៈពេល ៣ ទៅ ៥ ឆ្នាំខាងមុខទៀត សម្រាប់ជួយវៀតណាមក្នុងការកាត់បន្ថយការប្រើប្រាស់ធ្យូងថ្មឲ្យងាកមកប្រើថាមពលស្អាតជំនួសវិញ។
កិច្ចព្រមព្រៀងនេះនឹងជួយប្រទេសវៀតណាមឱ្យឈានដល់ការបំភាយឧស្ម័នផ្ទះកញ្ចក់ខ្ពស់បំផុតនៅត្រឹមឆ្នាំ២០៣០ ពោលគឺនឹងដើរលឿនជាងការព្យាករដល់ទៅ៥ឆ្នាំ ហើយកិច្ចព្រមព្រៀងនេះទៀតសោត ក៏នឹងកម្រិតសមត្ថភាពប្រើប្រាស់ធ្យូងថ្មកំពូលរបស់វៀតណាមមកនៅត្រឹម ៣០,២ ជីហ្គាវ៉ាត់ (GW) ជំនួសឱ្យការគ្រោងទុកពីដំបូងថាមាន ៣៧ ជីហ្កាវ៉ាត់ និងទទួលបានប្រភពថាមពល ៤៧% ពីថាមពលកកើតឡើងវិញនៅត្រឹមឆ្នាំ២០៣០ផងដែរ។
អត្ថបទគួរអាន
ប្រធានាធិបតីអាមេរិកលោក ចូ បៃដិន បាននិយាយនៅក្នុងសេចក្តីថ្លែងការណ៍ថា ពេលនេះប្រទេសវៀតណាមបានបង្ហាញពីភាពជាអ្នកដឹកនាំក្នុងការរៀបចំតារាងផ្លាស់ប្តូរថាមពលស្អាតប្រកបដោយមហិច្ឆតាដែលនឹងផ្តល់នូវសន្តិសុខថាមពលរយៈពេលវែង។
ដើម្បីបញ្ចុះបញ្ចូលវៀតណាមឱ្យគាំទ្រការផ្តល់ជូននេះ ក្រុមអ្នកចរចាបស្ចិមលោកដែលដឹកនាំដោយសហភាពអឺរ៉ុប និងអង់គ្លេសបានបង្កើនចំនួនថវិកាដែលផ្តល់ជូនដល់ទីក្រុងហាណូយ ម្តងហើយម្តងទៀត។
ប្រភពដែលមិនបញ្ចេញឈ្មោះមួយចំនួនបាននិយាយថា ពាក់កណ្តាលនៃទឹកប្រាក់ចំនួន ដែល G7 ត្រៀមផ្ដល់ឲ្យទីក្រុងហានូយ នឹងបានមកពីវិស័យសាធារណៈ ហើយនៅសល់ប៉ុន្មានទៀតគឺបានមកពីក្រុមអ្នកវិនិយោគឯកជន។
ប្រភពមួយក្នុងចំណោមប្រភពទាំងនេះបាននិយាយថា ផ្នែកតូចមួយនៃការផ្តល់មូលនិធិនេះគឺជាជំនួយ ខណៈដែលការវិនិយោគសាធារណៈភាគច្រើន គឺជាកម្ចី។
កន្លងមកេះ G7 ក៏មានកិច្ចព្រមព្រៀងជាមួយប្រទេសឥណ្ឌូណេស៊ីដែរ ដោយបានសន្យាថា នឹងផ្តល់មូលនិធិសាធារណៈចំនួន ១០ ពាន់លានដុល្លារជាថ្នូរនឹងការបិទរោងចក្រធ្យូងថ្មនៅទីនោះ ហើយកាត់បន្ថយការបំភាយឧស្ម័នពុលខ្ពស់បំផុតនៅឆ្នាំ២០៣០ ចំណែកអាហ្រ្វិកខាងត្បូងវិញក៏ត្រូវបាន G7 សន្យាថានឹងផ្ដល់មូលនិធិចំនួន ៨ពាន់៥ រយលានដុល្លារផងដែរ៕
