យ៉ាងណាក៏ដោយ ឯកឧត្តម គង់ វិបុល ក៏បានបន្តអំពាវនាវ និងជំរុញឲ្យម្ចាស់អាជីវកម្មទាំងនោះមកចុះបញ្ជី និងត្រូវគោរពតាមច្បាប់សារពើពន្ធ បើមិនចង់រងការផាកពិន័យធ្ងន់ធ្ងរ។
នៅក្នុងកម្មវិធីផ្សាយផ្ទាល់ពិសេសស្តីពីពន្ធលើប្រាក់ចំណូលប្រចាំឆ្នាំ២០២២ របស់អគ្គនាយកដ្ឋានពន្ធដារ នៅថ្ងៃទី១៦ ខែមីនា ឆ្នាំ២០២៣ ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានពន្ធដារ បានបង្ហាញនូវលទ្ធផលនៃការស្រាវជ្រាវរបស់អគ្គនាយកដ្ឋានពន្ធដារលើសហគ្រាសធំៗ មួយចំនួនដែលមិនបានចុះបញ្ជីពន្ធដារ។ បើតាមឯកឧត្តម គង់ វិបុល តាមរយៈការស្រាវជ្រាវបឋមរបស់អគ្គនាយកដ្ឋានពន្ធដារ បានរកឃើញថា មានសហគ្រាសមួយចំនួនធំ បានមកចុះបញ្ជីបង់ពន្ធស្របតាមច្បាប់សារពើពន្ធ តែក៏មានសហគ្រាសមួយចំនួនបន្តអាជីវកម្មរបស់ខ្លួនដោយមិនបានបង់ពន្ធ នៅឡើយ ជាពិសេសក្លឹបកម្សាន្តធំៗមួយចំនួន នៅក្នុងរាជធានីភ្នំពេញ និងខេត្តព្រះសីហនុ។ ឯកឧត្តមបានកត់សម្គាល់ឃើញថា រាល់សហគ្រាសធំៗទាំងនោះ សុទ្ធតែមានចំណូលរាប់សិបលានដុល្លារ កំពុងដំណើរអាជីវកម្មរបស់ខ្លួនដោយមិនបានចុះបញ្ជី។ ជុំវិញបញ្ហានេះ អគ្គនាយកនៃអគ្គនាយកដ្ឋានពន្ធដារ ក៏បានព្រមាន ផងដែរ ដល់ម្ចាស់អាជីវកម្មណាដែលបន្តអាជីវកម្មដោយមិនបានចុះបញ្ជីបង់ពន្ធអាចនឹងប្រឈមការផ្អាកអាជីវកម្ម។
ជាមួយគ្នានោះ ឯកឧត្តម គង់ វិបុល ក៏បានបញ្ជាក់ទៀតថា ដ្បិតបច្ចុប្បន្ន នៅមានសហគ្រាសមួយចំនួនមិនទាន់បានចុះបញ្ជីបង់ពន្ធបានត្រឹមត្រូវនៅឡើយ តែតាមរយៈការធ្វើកំណែទម្រង់ពន្ធដារ បានធ្វើឲ្យការប្រមូលចំណូលរបស់អគ្គនាយកដ្ឋានពន្ធដាររក្សាបានកំណើនវិជ្ជមានគួរឲ្យកត់សម្គាល់។
សូមបញ្ជាក់ថា ដ្បិត នៅឆ្នាំ២០២២ កម្ពុជានៅជួបប្រទះបញ្ហាប្រឈម ដូចជា ការរាតត្បាតនៃមេរោគកូវីដ-១៩ និងបញ្ហាសង្រ្គាមរវាងរុស្សី និងអ៊ុយក្រែន ក៏ពិតមែន ប៉ុន្ដែ ការប្រមូលចំណូលរបស់អគ្គនាយកដ្ឋានពន្ធដារ នៅតែបន្តរក្សាបានកំណើជាវិជ្ជមាន។ ជាក់ស្ដែង នៅរយៈពេលពេញ១ឆ្នាំ២០២២ ចំណូលដែលប្រមូលបានពីអគ្គនាយកដ្ឋានពន្ធដារ មានជាង ៣ពាន់លានដុល្លារ ស្មើនឹងជាង ១២២% នៃច្បាប់ថវិកាឆ្នាំ២០២២។ នេះបើយោងតាមរបាយការណ៍របស់អគ្គនាយកដ្ឋានពន្ធដារ៕
