កាលពីថ្ងៃទី ១៦ ខែ កក្កដា
សមាគមរោងចក្រកាត់ដេរកម្ពុជា បានដាក់ពាក្យប្ដឹងជំទាស់សហភាពអឺរ៉ុប ទៅកាន់តុលាការយុត្តិធម៌អឺរ៉ុប
ក្នុងគោលបំណងជំរុញឲ្យមានការលុបចោលនៃការដកផ្នែកខ្លះនៃប្រព័ន្ធអនុគ្រោះពន្ធ
EBA
ពីកម្ពុជាចេញវិញ។ នេះបើតាមព្រឹត្តិបត្រព័ត៌មានមួយ ដែលបានចេញផ្សាយដោយសភាពអឺរុបកាលពីថ្ងៃទី
៣១ ខែសីហា ឆ្នាំ២០២០។
តាមប្រភពព័ត៌មានដដែលនេះ បានបញ្ជាក់ថា សមាគមរោងចក្រកាត់ដេរបានចោទប្រកាន់ថា ការសម្រេចរបស់សហភាពអឺរ៉ុប
គឺរំលោភលើគោលការណ៍សមាមាត្រ និងតម្រូវការនៃភាពស្ថិតស្ថិររវាងគោលនយោបាយ និងសកម្មភាពរបស់សហភាពអឺរ៉ុប។
អត្ថបទទាក់ទង!
លោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា បានអះអាងប្រាប់ខេមបូណូមីសថា ការប្ដឹងជំទាស់នៃការសម្រេចដក EBA ពីសំណាក់សហភាពអឹរ៉ុបនេះ គឺជាកិច្ចខិតខំប្រឹងប្រេអចុងក្រោយមួយ ក្នុងការការពារផលប្រយោជន៍របស់រោងចក្រកាត់ដេរ ដែលជាសមាជិកក្នុងសមាគម។ លោក ម៉ូនីកា បន្ថែមថា «នៅក្នុងសហភាពអឺរ៉ុប គ្មាននរណាម្នាក់នៅលើច្បាប់នោះទេ រួមទាំងគណៈកម្មការអឺរ៉ុប។ សមាគមរោងចក្រកាត់ដេរអាចដាក់ពាក្យបណ្ដឹងទៅតុលាការ ប្រសិនបើយើងយល់ថា យើងមិនបានទទួលការផ្ដល់ឲ្យនូវភាពយុត្តិធម៌ស្របតាមផ្លូវច្បាប់»។
ទោះយ៉ាងណា នៅមិនទាន់មានការឆ្លើយតបណាមួយពីខាងអឺរ៉ុបមកវិញនៅឡើយទេ គិតមកទល់ពេលនេះ។
សូមបញ្ជាក់ថា សហភាពអឺរ៉ុប បានសម្រេចចាប់ផ្ដើមអនុវត្តដក EBA ផ្នែកខ្លះ (២០% នៃទំនិញនាំទៅអឺរ៉ុបសរុប) ពីកម្ពុជា កាលពីថ្ងៃទី ១២ ខែសីហា បន្ទាប់ពីសហភាពអឺរ៉ុប បានបើកដំណើរការត្រួតពិនិត្យអស់រយៈពេល ១៨ ខែ តាំងពីខែកុម្ភៈ ឆ្នាំ២០១៩។
បើតាមសភាពអឺរ៉ុប ការដក EBA ពីកម្ពុជានេះ គឺដោយសារតែអឺរ៉ុបបានរកឃើញថា កម្ពុជាមានការរំលោភសិទ្ធមនុស្សធ្ងន់ធ្ងរ។
តាមតួលេខពីសហភាពអឺរ៉ុបបានឲ្យដឹងថា ទំហំពាណិជ្ជកម្មទ្វេភាគីរវាងអឺរ៉ុបនិងកម្ពុជាកាលពីឆ្នាំ២០១៩ សម្រេចបានដល់ទៅ ជាង៦ពាន់លានដុល្លារអាមេរិក ក្នុងនោះ កម្ពុជានាំចេញទៅអឺរ៉ុបប្រមាណជាង៥ពាន់លានដុល្លារ ខណៈដែលអឺរ៉ុបនាំចូលមកកម្ពុជាវិញប្រមាណ១ពាន់លានដុល្លារអាមេរិក។ ក្នុងចំណោមការនាំចេញសរុបរបស់កម្ពុជាទៅកាន់សហភាពអឺរ៉ុបនៅឆ្នាំ២០១៩ គឺមានរហូតដល់ទៅ ៩៨% ទទួលបានការអនុគ្រោះពន្ធ EBA។ អឺរ៉ុប ក៏ជាដៃគូពាណិជ្ជកម្មធំបំផុតទី២របស់កម្ពុជាផងដែរ បន្ទាប់ពីប្រទេសចិនផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
