លោក ស៊ួ ប៊ុននី ដែលជាកសិករដាំដុះទំពាំងបារាំងនៅក្នុងខេត្តបាត់ដំបងបានរៀបរាប់ប្រាប់ក្រុមការងារខេមបូណូមីសថា លោកបានចាប់ផ្ដើមដាំដុះទំពាំងបារាំងនេះរយៈពេល៥ឆ្នាំមកហើយ។ បើគិតមកពេលនេះផ្ទៃដីដាំដុះទំពាំងបារាំងរបស់លោកបានពង្រីកដល់៤ហិកតាហើយ។
កសិកររូបនេះ បានបន្ថែមថា ការដាំដំណាំទំពាំងបារាំងនេះ មិនមែនជារឿងចៃដន្យនោះទេ គឺលោកធ្លាប់ទៅសិក្សាពីពិធីសាស្រ្តនៃការដាំដំណាំមួយប្រភេទនេះនៅក្នុងប្រទេសថៃ បន្ទាប់មកក៏បានយកមកដាំដុះនៅកម្ពុជា ហើយរហូតមកដល់ពេលនេះគឺមានការគាំទ្រខាំ្លងពីសំណាក់អតិថិជនក៏ដូចជាកសិករផងដែរ។ ជាក់ស្ដែង បើទោះជាស្ថិតនៅក្នុងស្ថានភាពកូវីដ១៩ក៏ដោយ ប៉ុន្ដែ ម្លៃទីផ្សារទំពាំងបារាំង នៅតែលក់បានតម្លៃខ្ពស់គួរសម ដោយមួយ១គីឡួក្រាមអាចលក់បានចន្លោះពី១ម៉ឺន ទៅ១ម៉ឺន២ពាន់រៀល។
សម្រាប់ទីផ្សារវិញ គឺលោកភាគច្រើនលក់តែនៅទីផ្សារក្នុងស្រុកតែប៉ុណ្ណោះ ខណៈដែលទំពាំងបារាំងនេះ បច្ចុប្បន្នក៏កំពុងមានតម្រូវការច្រើននៅរាជធានីភ្នំពេញផងដែរ ដោយផ្សារទំនើបជាច្រើនក៏មានប្រមូលទិញទំពាំងបារាំងនេះ ទៅដាក់លក់ផងដែរ។
អត្ថបទគួរអាន
លោក ស៊ួ ប៊ុននី បន្តថាការដាំដំណាំប្រភេទនេះងាយនឹងទទួលបានទិន្នផល និងអាចប្រមូលផលបានជារៀងរាល់ថ្ងៃផងដែរ។ប្រសិនបើយើងបានសិក្សាពីពិធីសាស្រ្តដាំដុះ និងការជ្រើសរើសពូជយកមកដាំឲ្យបានត្រឹមត្រូវ។ លោកបានគូសបញ្ជាក់ថា ការដាំដុះដំណាំប្រភេទនេះគឺត្រូវការ ធ្វើផ្ទៃដីអោយរាបស្មើ ដាក់កំបោរនិងជី ហើយបន្ទាប់មកចាប់ផ្ដើមកាយដាក់ដាំតែម្ដង និងជាពិសេសទៀតនោះសិក្សាអំពីបច្ចេកទេសនៃការថែទាំវាផងដែរ។មិនតែប៉ុណ្ណោះ ទំពាំងបារាំង ក៏មានអត្ថប្រយោជន៍ច្រើនសម្រាប់សុខភាព ហើយវាអាចយកទៅធ្វើម្ហូបបានច្រើនមុខទៅតាមចំណង់ចំណូលចិត្តអ្នកទទួលទាន។
សូមជម្រាបថា បច្ចុប្បន្ន លោក ស៊ួ ប៊ុននី មិនត្រឹមតែដំាំដុះទំពាំងបារាំងនោះទេ គឺថែមទាំងមានទទួលទិញបន្ត ព្រមទាំងមានការចែករំលែកពីពិធីសាស្ត្រនៅក្នុងការដាំដុះ ការជ្រើសរើសពូជ ដើម្បីទទួលបានទិន្នផលលឿននិងមិនសូវជួបបញ្ហានៅពេលដាំផងដែរ៕
អត្ថបទ៖ ហួន ស្រីនីត
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
