គួរអានអត្ថបទទាំងនេះផង !
នៅក្នុងឆ្នាំ២០១៦ កន្លងទៅនេះ វិនិយោគិនហុងកុង បានធ្វើស្នើសុំអនុញ្ញាតិវិនិយោគនៅកម្ពុជាដែលមានគម្រោងវិនិយោគសរុបចំនួន ១៤គម្រោង។ គម្រោងដែលវិនិយោគិន ហុងកុង ចូលចិត្តវិនិយោគនៅប្រទេសកម្ពុជាច្រើនជាងគេ មានដូចជា គម្រោងផលិតកម្មស៊ីម៉ងត៍ ឧស្សាហកម្មកាត់ដេរសម្លៀកបំពាក់ និង ស្បែកជើង រោងចក្រផលិតកាបូប កសិឧស្សាហកម្ម និងឧស្សាហកម្មផ្សេងៗទៀត។
ចំនួនគម្រោងនិងទឹកប្រាក់វិនិយោគនេះ បានធ្វើឲ្យក្រុមប្រឹក្សាអភិវឌ្ឍន៍កម្ពុជា កត់ត្រាថា វិនិយោគិនមកពីទីក្រុង ហុងកុង ស្ថិតនៅក្នុងលំដាប់ថ្នាក់លេខ៣ បន្ទាប់ពីចិន ដែលជាវិនិយោគិនធំជាងគេទី១ និងជប៉ុនឈរលំដាប់ថ្នាក់លេខ២ ដែលបានចាប់អារម្មណ៍បោះទុនវិនិយោគនៅកម្ពុជាក្នុងឆ្នាំ២០១៦។
បើយោងតាមតួលេខដែលកត់ត្រាដោយ CDC ការវិនិយោគរបស់ហុងកុងនៅកម្ពុជា គិតចាប់ពីឆ្នាំ១៩៩៤ ដល់ឆ្នាំ២០១៦ មានចំនួនគម្រោង ២៤៤ គម្រោង មានទុនវិនិយោគសរុប ១,២៥ពាន់លានដុល្លារអាមេរិក ស្មើនឹងជាង ២ភាគរយនៃទុនវិនិយោគផ្ទាល់សរុបពីក្រៅប្រទេស។
ឯកឧត្តម សុខ ចិន្តាសោភា រដ្ឋមន្រ្តីប្រតិភូអមនាយករដ្ឋមន្រ្តី បានឲ្យដឹងថា នៅក្នុងឆ្នាំ២០១៧នេះដែរ ប្រតិភូហុងកុងមួយក្រុម មានបំណងមកធ្វើការវិនិយោគនៅកម្ពុជា ទៅលើវិស័យសេវាកម្ម វិស្វកម្ម ស្ថាបត្យកម្ម សេវាកម្មពាក់ព័ន្ធនឹងសំណង់ និងសេវាកម្មអាជីព មានច្បាប់ និងគណនេយ្យ។
ឯកឧត្តម សុខ ចិន្តាសោភា បញ្ជាក់ថា កម្ពុជានឹងខិតខំបន្តជំរុញឲ្យការវិនិយោគរបស់ហុងកុងដែលមានវត្តមាននៅកម្ពុជា ឲ្យចាប់យកឱកាសមាសដែលកម្ពុជា បានផ្សារភ្ជាប់ខ្លួនជាមួយនឹងគោលនយោបាយ វិថីមួយ ខ្សែក្រវាត់មួយ ដែលផ្ដួចផ្តើមឡើងដោយចិន ដែលប្រការនេះនឹងជួយឲ្យក្រុមហ៊ុន ហុងកុង អាចទទួលបានការគាំទ្របន្ថែមទៀត ពីគោលនយោបាយរបស់ចិនតែមួយ៕
