លោក លឹម អូន អគ្គនាយកធនាគារសហគ្រាសធុនតូច និងមធ្យម (SME Bank) បានគូសបញ្ជាក់ថា ដោយមើលឃើញថា ប្រភពទុនរបស់វិស័យសហគ្រាសធុនតូច និងមធ្យម (SME) ហាក់នៅមានភាពទន់ជ្រាយ និងជួបនូវបញ្ហាប្រឈមនៅឡើយនោះ ខណៈដែលរាជរដ្ឋាភិបាល បាននិងកំពុងបន្ដដាក់ចេញវិធានការគាំទ្រជាច្រើនដល់វិស័យនេះ។ ក្នុងនោះ ធនាគារ SME បានចូលរួមចំណែកជាច្រើនក្នុងការផ្តល់ប្រភពទុនសម្រាប់វិស័យ SME ជាក់ស្តែង ធនាគារ SME ចាប់តាំងពីបានបង្កើតមក បានបោះទុនទៅក្នុងសេដ្ឋកិច្ចជាតិដើម្បីជួយដល់វិស័យ SME តាមរយៈគម្រោងសហហិរញ្ញប្បទានចំនួន៣ ដែលមានចំនួនទឹកប្រាក់ប្រមាណ ២៦០លានដុល្លារ។ ជាងនេះទៅទៀត ធនាគារ SME បានធ្វើការផ្តល់ឥណទានដោយផ្ទាល់ គឺការផ្តល់ឥណទានចេញពីធនាគារ SME ទៅកាន់ SME តែម្តងនោះ គឺមានទំហំទឹកប្រាក់ប្រមាណ ៣៥លានដុល្លារទៀតផងដែរ ។
ក្រៅតែបញ្ហាខ្វះប្រភពទុន លោក លឹម អូន បានមើលឃើញផងដែរនូវបញ្ហាមួយចំនួនទៀត ដែលវិស័យសហគ្រាសធុនតូច និងមធ្យម (SME) កំពុងជួបប្រទះ ជាក់ស្តែងដូចជា បញ្ហាទីផ្សារ ពោលគឺលទ្ធភាពក្នុងការចាប់យកចំណែកទីផ្សារទាំងក្នុង និងក្រៅប្រទេស ជាពិសេសទីផ្សារក្រៅប្រទេសតែម្តង។ ក្នុងន័យនេះ គឺដោយសារតែបច្ចុប្បន្ន SME នៅមានភាពខ្វះខាតនូវគុណភាព និងសមត្ថភាពក្នុងការផលិតឱ្យត្រូវតាមស្តង់ដារទីផ្សារក្រៅប្រទេស និងលទ្ធភាពក្នុងការប្រកួតប្រជែងផងដែរ។ លើសពីនេះ សមត្ថភាពក្នុងការគ្រប់គ្រងអាជីវកម្មរបស់SME ក៏ជាបញ្ហាប្រឈមមួយដែលត្រូវដោះស្រាយផងដែរ ដោយសារតែវិស័យSME ភាគច្រើនជាអាជីវកម្មតូចៗ ជាលក្ខណៈគ្រួសារជាដើម ដែលនាំឱ្យសមត្ថភាពក្នុងការរៀបចំផែនការអាជីវកម្ម ការរៀបចំរបាយការណ៍ហិរញ្ញវត្ថុឱ្យបានត្រឹមត្រួវជាដើមនោះ គឺនៅមានកម្រិតនៅឡើយ។ លោក លឹម អូន បញ្ជាក់បន្ថែមដែរថា វិស័យSME ក៏ហាក់នៅមានការខ្វះខាតនូវការប្រើប្រាស់បច្ចេកវិទ្យាឌីជីផល អាយធី តិចណូឡូជីផ្សេងៗដើម្បីជួយដល់ការដំណើរការគ្រប់គ្រង ដឹកនាំអាជីវកម្មរបស់ពួកគាត់ឱ្យកាន់តែមានប្រសិទ្ធភាពផងដែរ។
អត្ថបទគួរអាន
ជាងនេះទៅទៀត បើតាម លោក លឹម អូន ការចុះបញ្ជីរបស់សហគ្រាសធុនតូច និងមធ្យម (SME) ក៏ហាក់នៅមានចំនួនតិចតួចនៅឡើយ ពោលគឺមានចំនួនប្រមាណជាង ១០% ប៉ុណ្ណោះ ដែលនេះជាបញ្ហាលំបាកមួយដែរ ក្នុងការធ្វើសកម្មភាពអាជីវកម្ម ក៏ដូចជាការពង្រីក និងស្វែករកដៃគូសហការក្នុងការជួយ ក៏ដូចជាស្វែករកប្រភពទុនរបស់ពួកគាត់ផងដែរ។
របាយការណ៍ពីធនាគារជាតិនៃកម្ពុជាបង្ហាញថា គិតត្រឹមឆ្នាំ២០២១ កម្ពុជាមានមីក្រូសហគ្រាស ខ្នាតតូច និងមធ្យមសរុបប្រមាណ ៥០ម៉ឺនសហគ្រាស សមមូល នឹងប្រមាណ ៩៩,៨% នៃក្រុមហ៊ុនទាំងអស់ ដែលផ្ដល់ការងារដល់ទៅប្រមាណ ៧០% នៃកម្លាំពលកម្មសរុប និងចូលរួមក្នុងសេដ្ឋកិច្ចជាតិស្មើនឹង៥៨% នៃផលិតផលិតក្នុងស្រុកសរុប។ ភាគច្រើន សហគ្រាសទាំងនោះ ស្ថិតក្នុងសេដ្ឋកិច្ចក្រៅប្រព័ន្ធ និងមិនទាន់បានចុះបញ្ជីផ្លូវការនៅឡើយទេ៕
