ក្រុមហ៊ុនទាំងនេះ បាននាំចេញទំនិញទៅកាន់ទីផ្សារអន្តរជាតិចំនួនតាមរយៈកិច្ចព្រមព្រៀង RCEPក្នុងតម្លៃតម្លៃសរុបជិត៥០ម៉ឺនដុល្លារអាមេរិក ជាមួយនឹងការទទួលបានលិខិតបញ្ជាក់ប្រភពដើមទំនិញសម្រាប់នាំចេញ (CO) ពីក្រសួងពាណិជ្ជកម្មសរុបចំនួន ២៣COs។ ទន្ទឹមនឹងនេះ មានក្រុមហ៊ុនមួយចំនួនទៀតក៏កំពុងសួរនាំពីនីតិវិធីក្នុងការនាំចេញក្រោមកិច្ចព្រមព្រៀងនេះផងដែរ។
ឯកឧត្តម ស៊ាង ថៃ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មបានបញ្ជាក់ប្រាប់សារព័ត៌មានខេមបូណូមីសថា គិតត្រឹមថ្ងៃទី៧ ខែមេសា ឆ្នាំ២០២២ មានក្រុមហ៊ុនចំនួន៦ហើយ បានស្នើសុំលិខិតបញ្ជាក់ប្រភពដើមទំនិញ (CO) ដើម្បីនាំទំនិញចេញទំនិញក្រោមកិច្ចព្រមព្រៀង ភាពជាដៃគូសេដ្ឋកិច្ចគ្រប់ជ្រុងជ្រោយថ្នាក់តំបន់ (RCEP)។ ទំនិញទាំងនោះ ត្រូវបានក្រុមហ៊ុនទាំងទាំង៦ នាំចេញទៅកាន់គោលដៅទីផ្សារធំៗចំនួនរួមមានចិន កូរ៉េខាងត្បូង និងជប៉ុន ដែលមាន Cos សរុប ២៣ ជាមួយទំហំប្រាក់ជិត ៥០ម៉ឺនដុល្លារអាមេរិក។
អត្ថបទគួរអាន
បើតាមឯកឧត្តម ស៊ាង ថៃ ការនាំចេញទំនិញទៅប្រទេសចិនមានចំនួន៧ Cos គិតជាប្រាក់ជាង៣៦ម៉ឺនដុល្លារ ខណៈនាំចេញទៅទីផ្សារសាធារណរដ្ឋកូរ៉េចំនួន១៤ COs គិតជាទឹកប្រាក់ជាង៦ម៉ឺនដុល្លារ និងទៅទីផ្សារជប៉ុនមានចំនួន ២ COs ដែលមានទឹកប្រាក់ជាង៦ម៉ឺន៤ពាន់ដុល្លារអាមេរិក។
ក្រុមហ៊ុនទាំង៦ ដែលបានស្នើសុំ COs នាំទំនិញចេញក្រោមកិច្ចព្រមព្រៀង RCEP ភាគច្រើនជាក្រុមហ៊ុនផលិតផលិតផលសម្លៀកបំពាក់ និងស្បែកជើង។
គួររំលឹកថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយថ្នាក់តំបន់ ឬហៅកាត់ថា RCEP បានចូលជាធរមាននៅដើមខែមករា ឆ្នាំ២០២២ ដំណាលកិច្ចព្រមព្រៀងពាណិជ្ជកម្មសេរីកកម្ពុជា-ចិន។ កិច្ចព្រមព្រៀង RCEP មាន១៥ប្រទេសជាសមាជិករួមមានប្រទេសក្នុងតំបន់អាស៊ានទាំង១០ រួមជាមួយចិន ជប៉ុន កូរ៉េខាងត្បូង អូស្ត្រាលី និងញ៉ូហ្សេលេន។
ជាមួយនឹងកិច្ចព្រមព្រៀង RCEP កម្ពុជារំពឹងថា នឹងជំរុញកំណើននាំចេញចន្លោះពីជាង៩% ទៅ ១៨% ចំណូលពន្ធរំពឹងកើនឡើងចន្លោះពី ២ ទៅជិត៤% និងជំរុញបន្ថែមកំណើនសេដ្ឋកិច្ចចន្លោះពី ៣,២% ទៅ៦,២%៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
