ទីក្រុងវូហាន ជាទីកន្លែងដែលកកើតវីរុសកូរ៉ូណាដំបូងគេបំផុត នៅឆ្នាំ២០១៩ ហើយដែលជំងឺនេះបានសម្លាប់មនុស្សជិត ៥០០នាក់ហើយ និងភាគច្រើនស្ថិតក្នុងទីក្រុងវូហាន នៃខេត្តហ៊ូប៉ី ហើយប្រទេសជាច្រើនផ្សេងទៀត បានបញ្ជូនយន្តហោះទៅដឹក ពលរដ្ឋរបស់ពួកគេចេញពីទីនោះ។
ក៏ប៉ុន្តែ សម្តេចតេជោ ហ៊ុន សែន បានប្រកាសកាលពីសប្តាហ៍មុនថា លោកមិនខ្លាចនឹងធ្វើដំណើរទៅទីក្រុងវូហាន ដើម្បីសួរសុខទុក្ខនិស្សិតខ្មែរចំនួន ២៣នាក់ដែលកំពុងសិក្សានៅទីនោះទេ ក៏ប៉ុន្តែ រដ្ឋាភិបាលចិនមិនបានអនុញ្ញាតឲ្យលោកធ្វើដំណើរទៅ។
សម្តេចក៏បានមានប្រសាសន៍ផងដែរថា កម្ពុជានឹងអនុញ្ញាតឱ្យមានការហោះហើរពីប្រទេសចិនជាបន្ត ហើយនឹងមិនធ្វើមាតុភូមិនិវត្តន៍និសិ្សតខ្មែរ ពីទីនោះមកកម្ពុជាវិញឡើយ។
អត្ថបទទាក់ទង
សម្តេចតេជោ ហ៊ុន សែន បានសរសេរនៅលើទំព័រហ្វេសប៊ុក នៅថ្ងៃទី៥ ខែកុម្ភៈ ឆ្នាំ២០២០នេះ ដូច្នេះថា "ដោយសារមិត្តចិនយល់អំពីការព្រួយបារម្ភរបស់ខ្ញុំចំពោះពលរដ្ឋ និងនិស្សិតខ្មែរដែលកំពុងរស់នៅក្នុងប្រទេសចិន នៅព្រឹកមិញនេះ ខាងរដ្ឋាភិបាលចិនបានអនុញ្ញាតឲ្យខ្ញុំធ្វើដំណើរទៅកាន់ទីក្រុងប៉េកាំង ដើម្បីបានជួបសម្តែងការគួរសមជាមួយភាគីមិត្តចិន និងបានស្វែងយល់អំពីការយកចិត្តទុកដាក់របស់រដ្ឋាភិបាលចិនចំពោះបងប្អូននិងកូនក្មួយសិស្សនិស្សិតខ្មែរយើងដែលកំពុងរស់នៅនិងសិក្សានៅក្នុងទីក្រុងវូហាន ក៏ដូចជានៅទូទាំងប្រទេសចិន។"
ការប្រកាសរបស់សម្តេចនេះក៏មានការកោតសរសើរជាច្រើន នៅលើបណ្តាញសង្គមថា នេះជាការរួមសុខរួមទុក្ខជាមួយកូនចៅ ជាឪពុកម្នាក់ដែលមានគុណធម៌ មានទំនួលខុសត្រូវខ្ពស់ ជាឪពុកម្នាក់ដែលមិនមានទម្លាប់រត់និងទុកចោលកូនចៅម្តងណាឡើយ។
ការកោតសរសើរផ្សេងទៀត រួមមាន ថា នេះជាការឆ្លុះបញ្ចាំងពីវីរភាព និងមិត្តភាពដ៏ស្មោះត្រង់របស់សម្តេចចំពោះប្រទេសចិន ដែលកំពុងមានទុក្ខ ជាចេតនាមួយដែលគ្មានមេដឹកនាំប្រទេសណាហ៊ានធ្វើដូច។
ក៏ប៉ុន្តែទន្ទឹមនឹងនេះ ក៏មានការរិះគន់ខ្លះដែរ ចំពោះទស្សនកិច្ចរបស់សម្តេច ហ៊ុន សែន ទៅប្រទេសចិន ដោយសារតែរដ្ឋាភិបាលចិនកំពុងតែមមាញឹកខ្លាំងដើម្បីប្រយុទ្ធប្រឆាំងនឹងការរីករាលដាលនៃមេរោគនេះ។
លោក Phil Robertson ដែលជានាយករងនៃអង្គការឃ្លាំមើលសិទ្ធិមនុស្ស បានសរសេរនៅលើ Twitter ដែលមានន័យជាភាសាខ្មែរ ថា សម្តេច ហ៊ុន សែន កំពុងតែធ្វើឱ្យមានការរំខាន នៅពេលដែលទីក្រុងប៉េកាំងកំពុងស្ថិតនៅក្នុងស្ថានភាពវិបត្តិពេញលេញ ហើយមិនត្រូវការភ្ញៀវអន្តរជាតិទេ នៅពេលនេះ។
អ្នកប្រើប្រាស់ហ្វេសប៊ុកដែលមានឈ្មោះថា Kim Jymin បានសរសេរនៅលើទំព័រហ្វេសប៊ុកសម្តេច ដោយបានចោទសួរថា តើកម្ពុជាមានយន្តហោះឬអត់ ដើម្បីទៅយកនិស្សិតខ្មែរចេញពីទីក្រុងវូហាន ដោយបានលើកឡើងថា ប្រទេសផ្សេងៗទៀតបានយកយន្តហោះទៅយកប្រជាជនគេចេញពីវូហានរួចហើយ៕
