ឯកឧត្តមរដ្ឋមន្ត្រីក្រសួងកសិកម្ម បន្ថែមថា ការអនុវត្តគំនិតផ្ដួចផ្ដើមរៀបចំយន្តការដេញថ្លៃនាំចូលជ្រូករស់ពីក្រៅប្រទេស ដូចដែលលិខិតក្រសួងសេដ្ឋកិច្ចផ្ញើមកក្រសួងកសិកម្មនោះ គឺអាចធ្វើទៅបាន លុះត្រាណា កម្ពុជា គ្មានលទ្ធភាពគ្រប់គ្រាន់ក្នុងការផ្គត់ផ្គង់ជ្រូករស់ និងមិនប៉ះពាល់ដល់ក្រុមចិញ្ចឹមជ្រូកក្នុងស្រុកតែប៉ុណ្ណោះ ខណៈដែលបច្ចុប្បន្នកម្ពុជា មានលទ្ធភាពគ្រប់គ្រាន់ហើយ សម្រាប់ការផ្គត់ផ្គង់ជ្រូកលើទីផ្សារក្នុងស្រុក។
ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី៨ ខែកុម្ភៈ បានគូសបញ្ជាក់ឆ្លើយតបទៅនឹង សំណើសុំផ្អាកការផ្ដួចផ្ដើមលើនីតិវិធីដេញថ្លៃនាំចូលជ្រូករស់កមកម្ពុជារបស់ក្រសួងកសិកម្មថា ការរៀបចំយន្តការដេញថ្លៃនាំចូល ជ្រូករស់ផ្គត់ផ្គង់មកកម្ពុជា នឹងជួយលើកកម្ពស់ការប្រកួតប្រជែង ប្រកបដោយតម្លាភាព ក្នុងអាជីវកម្មនាំចូលជ្រូករស់ ដែលនឹងចូលរួមចំណែកយ៉ាងសំខាន់ ក្នុងការធានាឱ្យបាននូវស្ថិរភាពថ្លៃជ្រូករស់ និងថ្លៃសាច់នៅលើទីផ្សារ។ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច បានបន្តថា ការរៀបចំយន្តការដេញថ្លៃនាំចូលជ្រូករស់ផ្គត់ផ្គង់មកកម្ពុជា គឺជាឧបករណ៍មួយចាំបាច់សម្រាប់រាជរដ្ឋាភិបាល ដើម្បីរួមចំណែកដោះស្រាយបញ្ហាក្នុងវិស័យជ្រូកជារួម និងម្យ៉ាងទៀតធានានិរន្តភាពនៃការចិញ្ចឹមជ្រូករបស់កសិករ និងក្រុមហ៊ុនក្នុងស្រុក ដើម្បីធានាស្ថិរភាពថ្លៃសាច់ជ្រូកក្នុងទីផ្សារ ស្របនឹងគោលដៅរបស់រាជរដ្ឋាភិបាល ក្នុងការកាត់បន្ថយសម្ពាធថ្លៃម្ហូបអាហារនៅលើទីផ្សារ ក្នុងបរិបទនៃប្រក្រតីភាពថ្មី ក្នុងការរស់នៅជាមួយនឹងជំងឺកូវីដ១៩។
ឆ្លើយតបបញ្ហានេះ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ បានគូសបញ្ជាក់ប្រាប់សារព័ត៌មានឌីជីថលខេមបូណូមីសដូច្នេះ បច្ចុប្បន្ន នេះក្រសួងបានសង្កេតឃើញថា សមាគមចិញ្ចឹមជ្រូក បានធានាអះអាងថា អាចផ្គត់ផ្គង់ជ្រូករស់ក្នុងស្រុកបាន ដូច្នេះមិនចាំបាច់នោះទេ ដែលត្រូវដេញថ្លៃសម្រាប់នាំចូលជ្រូករស់។ រដ្ឋមន្ត្រីកសិកម្មរូបនេះបន្តថា ស្ថិតក្នុងបរិបទកូវីដ១៩ វិស័យចិញ្ចឹមជ្រូកនៅកម្ពុជា មានការរីកចម្រើនគួរឱ្យកត់សម្គាល់ ពិសេសដោយមានការជំរុញពីរាជរដ្ឋាភិបាលកម្ពុជា បច្ចុប្បន្ន ក្រុមហ៊ុនចិញ្ចឹមជ្រូកបានកើនឡើងរហូតប្រមាណ ២០០ក្រុមហ៊ុន ធ្វើឱ្យកម្ពុជា មានលទ្ធភាពផ្គត់ផ្គង់ជ្រូកដោយខ្លួនឯង១០០%។
ដោយឡែក លោក ស្រ៊ុន ពៅ ប្រធានសមាគមចិញ្ចឹមសត្វកម្ពុជា បានអះអាងថា សព្វថ្ងៃ សមាគមមានលទ្ធភាពគ្រប់គ្រាន់ ក្នុងការផ្គត់ផ្គង់ជ្រូករស់លើទីផ្សារក្នុងស្រុក ហើយមកដល់ពេលនេះ តម្លៃជ្រូករស់ហាក់មិនទាន់មានការប្រសើរ និងមិនទាន់ទទួលបានផលចំណេញពីការចិញ្ចឹមជ្រូក នៅឡើយទេ បើទោះបីកន្លងមក ក្រសួងបានផ្អាកទាំងស្រុងនូវការនាំចូលជ្រូករស់ពីខាងក្រៅមួយរយៈ ក៏ពិតមែន។ បើតាមលោក ស្រ៊ុន ពៅ បច្ចុប្បន្ន ជ្រូករស់មានតម្លៃចាប់ពី ១ម៉ឺនរៀល ទៅ១ម៉ឺន២ពាន់រៀល អាស្រ័យតាមតំបន់ ដែលតម្លៃនេះ មិនទាន់អាចឱ្យកសិករ ចំណេញនៅឡើយ។
អត្ថបទគួរអាន
សូមរំឭកថា ផ្អែកលើស្ថានភាពជាក់ស្ដែងលើវិស័យចិញ្ជឹមជ្រូកនៅកម្ពុជា រដ្ឋមន្ត្រីក្រសួងកសិកម្ម កាលពីខែវិច្ឆិកា ឆ្នាំ២០២១ បានដាក់លិខិតទៅក្រសួងសេដ្ឋកិច្ច និងហិរញ្ញវត្ថុ ដើម្បីសុំផ្អាកការផ្តួចផ្ដើមលើការរៀបចំនីតិវិធីដេញថ្លៃជ្រូករស់សម្រាប់នាំចូល ដើម្បីលើកកម្ពស់ការចិញ្ចឹមជ្រូកក្នុងស្រុក ដោយយន្តការនេះអាចអនុវត្តបានលុះត្រាតែមិនប៉ះពាល់ដល់អ្នកចិញ្ចឹមជ្រូកក្នុងស្រុក និងនៅពេលកម្ពុជា ខ្វះការផ្គត់ផ្គង់ជ្រូក ប៉ុណ្ណោះ។
យ៉ាងណាមិញ នៅក្នុងលិខិតឆ្លើយតបពីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី ៨ ខែកុម្ភៈ ត្រង់ចំណុចទី៣ ក៏បានបញ្ជាក់ដែរថា យន្ដការដេញថ្លៃនាំចូលជ្រូករស់នេះ គឺនឹងត្រូវប្រើប្រាស់តែនៅពេលមានកង្វះការផ្គត់ផ្គង់ក្នុងស្រុកតែប៉ុណ្ណោះ ពោលពុំត្រូវបានយកមកអនុវត្តជាប្រចាំនោះឡើយ ហើយជ្រូកនាំចូលក៏ត្រូវកំណត់ក្នុងកម្រិតមួយ ដើម្បីធានាមិនឲ្យប៉ះពាល់ដល់ការប្រកួតប្រជែងថ្លៃ ក្នុងទីផ្សាររបស់អ្នកចិញ្ចឹមក្នុងស្រុកនោះដែរ។
សូមបញ្ជាក់ថា កម្ពុជា ត្រូវការជ្រូករស់ប្រមាណ៨ពាន់ក្បាល ក្នុងមួយថ្ងៃ ខណៈបច្ចុប្បន្នសមាគមចិញ្ចឹមសត្វកម្ពុជា អាចផ្គត់ផ្គង់ជ្រូករស់ស្ទើលើតម្រូវការទៅហើយ សម្រាប់ផ្គត់ផ្គង់នៅលើទីផ្សារក្នុងស្រុក។ នេះបើតាមការបញ្ជាក់របស់លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
