ការលក់រថយន្តថ្មីៗក្នុងប្រទេសឥណ្ឌាកាលពីឆ្នាំ២០២២ មានចំនួនសរុបជាង ៤លាន ២៥ម៉ឺនគ្រឿង ដោយមានចំនួនច្រើនជាងជប៉ុនបន្តិច ដែលលក់បានប្រមាណ ៤លាន ២០ម៉ឺនគ្រឿង។ នេះបើយោងតាមទិន្នន័យរបស់អង្គការសង្គមនៃក្រុមហ៊ុនរថយន្តឥណ្ឌា (SIAM)។
កំណើននៃការលក់រថយន្តនៅឥណ្ឌា គឺបានការចូលរួមចំណែកដ៏សំខាន់ ពីក្រុមហ៊ុន Maruti Suzuki ដែលជាក្រុមហ៊ុនរថយន្តដ៏ធំបំផុតរបស់ប្រទេសមួយនេះ។ លើសពីនេះ ចំនួននៃការលក់ក៏ត្រូវបានរំពឹងថា នឹងកើនឡើងបន្ថែមទៀតផងដែរ ដោយសារតែតួលេខនៃការលក់ក្នុងត្រីមាសទី៤សម្រាប់រថយន្តអាជីវកម្មមិនទាន់ត្រូវបានបង្ហាញ ហើយក្រុមហ៊ុនរថយន្តឥណ្ឌាដូចជា Tata Motors ក៏មិនទាន់ប្រកាសទិន្នន័យរបស់ពួកគេនៅឡើយដែរ។
ទីផ្សាររថយន្តឥណ្ឌា បានឡើងចុះក្នុងប៉ុន្មានឆ្នាំចុងក្រោយនេះ។ កាលពីឆ្នាំ២០១៨ ទីផ្សារនេះលក់រថយន្តបាន ៤លាន៤សែនគ្រឿង ប៉ុន្ដែដល់ឆ្នាំ២០១៩ ធ្លាក់ចុះក្រោម ៤លានគ្រឿង ហើយដល់ពេលបិទខ្ទប់ដោយសារកូវីដ១៩ នៅឆ្នាំ២០២០ បានរអិលចុះក្រោម ៣លានគ្រឿងទៀត។ ទើបតែមកដល់ឆ្នាំ២០២១ ទើបការលក់រថយន្តនៅឥណ្ឌានេះ បានកើនឡើងវិញដល់ ៤លានគ្រឿង។
អត្ថបទគួរអាន
ប្រភេទរថយន្តដែលលក់ដាច់នៅក្នុងប្រទេសឥណ្ឌា ភាគច្រើនជាប្រភេទរថយន្តសាំង និង Hybrid ពោលគឺមិនសូវមានរថយន្តអគ្គិសនីនោះទេ។ ជាមួយគ្នានេះ ឧស្សាហកម្មយានយន្តនៅឥណ្ឌា មានតម្រូវការឈីបតិចតួចប៉ុណ្ណោះ បើធៀបនឹងប្រទេសធំៗ ដូច្នេះក៏មិនសូវរងផលប៉ះពាល់ពីកង្វះខាតឈីប ឬខ្សែចង្វាក់ផ្គត់ផ្គង់ កាលពីឆ្នាំ២០២២នោះដែរ។
ចំនួនលក់រថយន្តនៅជប៉ុនប្រមាណ ៤លាន ២០ម៉ឺនគ្រឿងនេះ គឺធ្លាក់ចុះ ៥,៦% ពីឆ្នាំ២០២១។ ការធ្លាក់ចុះនេះ បណ្តាលមកពីការបិទខ្ទប់នៅប្រទេសចិន ដែលប៉ះពាល់ដល់ខ្សែចង្វាក់ផ្គត់ផ្គង់របស់ក្រុមហ៊ុនរថយន្តជប៉ុន។
គួររំលឹកថា ក្នុងឆ្នាំ២០២១កន្លងទៅ ប្រទេសចិនបានបន្តនាំមុខគេក្នុងទីផ្សាររថយន្តសាកលដែលលក់បានជាង ២៦លានគ្រឿង។ អាមេរិកក៏នៅតែឈរលេខ២ លក់បានជាង ១៥លានគ្រឿង និងតាមពីក្រោយដោយជប៉ុនជាង ៤លាន ៤សែនគ្រឿង៕
