បន្ទាប់ពីបានទទួលការអនុម័តឲ្យប្រើប្រាស់បន្ទាន់នៅក្នុងប្រទេសឥណ្ឌូនេស៊ី នាយកប្រតិបត្តិក្រុមហ៊ុនផលិតវ៉ាក់សាំងណូវ៉ាវ៉ាក់ របស់អាមេរិក បានបង្ហាញនូវក្ដីរំពឹងថា និយយ័តករនៅប្រទេសឥណ្ឌា ហ្វីលីពីន និងប្រទេសផ្សេងៗទៀត អាចនឹងសម្រេចអនុម័តឲ្យប្រើប្រាស់វ៉ាក់សាំងនេះ នៅក្នុងប្រទេសរបស់ខ្លួនដូចគ្នាដែរ។
យ៉ាងណាមិញ ប្រភេទណូវ៉ាវ៉ាក់ ដែលត្រូវបានអនុម័តឲ្យប្រើប្រាស់បន្ទាន់នៅឥណ្ឌូនេស៊ីនេះ គឺជាវ៉ាក់សាំងដែលផលិតដោយវិទ្យាស្ថានសេរ៉ូមរបស់ប្រទេសឥណ្ឌា ក្រោយការទទួលបានសិទ្ធិផលិតបន្ដពីក្រុមហ៊ុន ណូវ៉ាវ៉ាក់របស់អាមេរិក។ វ៉ាក់សាំងដែលផលិតដោយវិទ្យាស្ថានសេរ៉ូមរបស់ឥណ្ឌានេះទៀតសោត នឹងត្រូវបានដាក់លក់ក្រោមឈ្មោះយីហោថ្មីរបស់ក្រុមហ៊ុនឥណ្ឌាគឺឈ្មោះ កូវ៉ូវ៉ាក់។ វ៉ាក់សាំងនេះ ត្រូវបានគេរំពឹងថា នឹងនាំចេញដំបូងទៅកាន់ប្រទេសឥណ្ឌូនេស៊ីចំនួន ២០ លានដូស ក្នុងពេលឆាប់ៗនេះ។ នេះបើយោងតាមការចុះផ្សាយដោយសារព័ត៌មានរ៉យទ័រ។
អង្គការសុខភាពពិភពលោក ក៏កំពុងពិនិត្យមើលឯកសារបទប្បញ្ញត្តិរបស់ក្រុមហ៊ុនវ៉ាក់សាំងណូវ៉ូវ៉ាក់ដែរ ហើយក្រុមហ៊ុននេះរំពឹងថា ការពិនិត្យមើលឡើងវិញនេះ នឹងត្រូវបានសម្រេចនៅក្នុងប៉ុន្មានសប្តាហ៍ខាងមុខនេះ។អត្ថបទគួរអាន
ទន្ទឹមនេះ តាមរយៈការផ្ដល់នូវសញ្ញាវិជ្ជមានពីអង្គការសុខភាពពិភពលោកនេះ ក៏នឹងអាចផ្ដល់ឱកាសឲ្យវ៉ាក់សាំងរបស់ក្រុមហ៊ុន ណូវ៉ាវ៉ាក់ ផ្គត់ផ្គង់ទៅឲ្យយន្ដការកូវ៉ាក់ ដើម្បីចែកចាយទៅកាន់ប្រទេសដែលមានប្រាក់ចំណូលទាបផងដែរ។ ក្នុងនោះ ក្រុមហ៊ុន ណូវ៉ាវ៉ាក់ របស់អាមេរិក និង វិទ្យាស្ថានសេរ៉ូមរបស់ឥណ្ឌា ដែលបានសិទ្ធិផលិតវ៉ាក់សាំងនេះបន្ដ ក៏បានប្តេជ្ញាចិត្តរួមគ្នាថា នឹងផ្ដល់វ៉ាក់សាំងថ្មីនេះជាង ១ ពាន់លានដូសដល់យន្តការកូវ៉ាក់ផងដែរ។
បើតាមការចាក់សាកល្បងនៅសហរដ្ឋអាមេរិក បង្ហាញថា វ៉ាក់សាំង Novavax មានប្រសិទ្ធភាពការពារការឆ្លងមេរោគកូវីដ១៩ជាង ៩០% និងមានសមត្ថភាពទប់ទល់នឹងមេរោគបំប្លែងថ្មីផងដែរ នៅក្នុងដំណាក់កាលសាកល្បងដ៏ធំ ចុងក្រោយរបស់សហរដ្ឋអាមេរិកផងដែរ៕អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
