ការចាប់ផ្ដើមសំណុំរឿងពុករលួយនេះបានធ្វើឡើងស្របពេលដែលរដ្ឋាភិបាលឥណ្ឌូនេស៊ីដែលជាប្រទេសនាំចេញប្រេងដូងធំជាងគេបំផុតក្នុងពិភពលោកនេះ បានប្រឈមនឹងសម្ពាធឱ្យតាមដាននិងត្រួតពិនិត្យមើលតម្លៃប្រេងឆា ដែលចេះឡើងថ្លៃគ្មានឈប់ឈរ។
កាលពីចន្លោះចុងខែមករាដល់ពាក់កណ្ដាលខែមីនាមន្ត្រីអាជ្ញាធរបានរឹតបន្តឹងការនាំចេញប្រេងដូង និងឯកសារពាក់ព័ន្ធផ្សេងៗទៀតដោយតម្រូវឱ្យក្រុមហ៊ុនមួយចំនួនបំពេញតាមតម្រូវការនៅក្នុងស្រុកមុនពេលពួកគេត្រូវបានអនុញ្ញាតឱ្យនាំចេញប្រេងដូងទៅកាន់ទីផ្សារក្រៅប្រទេស។
អគ្គមេធាវីលោក សានីតា ប៊ូហានូដឌីន (Sanitiar Burhanuddin) បាននិយាយនៅក្នុងសេចក្តីថ្លែងការណ៍តាមទូរទស្សន៍ថា ពួកគេបានធ្វើការស៊ើបអង្កេតមួយ និងបានរកឃើញពីតម្រុយជាក់លាក់នៃការប្រព្រឹត្តអំពើពុករលួយជាបទល្មើសព្រហ្មទណ្ឌមួយទាក់ទងនឹងការចេញលិខិតអនុញ្ញាតឱ្យនាំចេញប្រេងដូងទៅក្រៅប្រទេស។
អត្ថបទគួរអាន
លោក សានីតា បានបន្ថែមទៀតថា មានភស្តុតាងមួយដែលបានបង្ហាញថា ការអនុញ្ញាតឱ្យនាំចេញប្រេងដូងនេះត្រូវបានចេញឱ្យសម្រាប់ក្រុមហ៊ុនមួយចំនួន ដែលមិនទាន់បានបំពេញតាមតម្រូវការ ដើម្បីបំពេញការផ្គត់ផ្គង់នៅក្នុងស្រុកឱ្យបានគ្រប់គ្រាន់នៅឡើយទេ។
អាជ្ញាធរឥណ្ឌូនេស៊ីបានប្រាប់ថា មានជនសង្ស័យចំនួន ៤ នាក់ពាក់ព័ន្ធនឹងករណីនេះ ប៉ុន្តែមិនបានលម្អិតនោះទេ ដោយលោកគ្រាន់តែបង្ហើបថា ជនសង្ស័យទាំង៤នាក់នេះ គឺម្នាក់ជាអគ្គនាយកនៃនាយកដ្ឋានពាណិជ្ជកម្មអន្តរជាតិនៅក្រសួងពាណិជ្ជកម្ម និង៣នាក់ទៀត គឺជាមន្ត្រីនៅក្រុមហ៊ុនផ្សេងៗគ្នាគឺក្រុមហ៊ុន Permata Hijau Group ក្រុមហ៊ុន PT Wilmar Nabati Indonesia និងក្រុមហ៊ុន Musim Mas។
រដ្ឋមន្ត្រីពាណិជ្ជកម្មលោក Muhammad Lutfi បាននិយាយនៅក្នុងសេចក្តីថ្លែងការណ៍មួយថា ក្រសួងរបស់លោកគាំទ្រដំណើរការផ្លូវច្បាប់ដែលកំពុងដំណើរការនេះដោយលោកបាននិយាយថា ក្រសួងពាណិជ្ជកម្មក៏ត្រៀមខ្លួនជាស្រេចក្នុងការផ្តល់ព័ត៌មានតាមការចង់បានរបស់មន្ត្រីអនុវត្តន៍ច្បាប់នៅក្នុងដំណើរការស៊ើបអង្កេតនេះផងដែរ៕
