ក្រុមហ៊ុនឱសថរបស់រដ្ឋឥណ្ឌូនេស៊ីឈ្មោះ Kimia Farma បាននិយាយថាខ្លួនបានដាក់ផែនការក្នុងការលក់វ៉ាក់សាំង Sinopharm រួចហើយ គ្រាន់តែរង់ចាំពេលវេលាសមស្របណាមួយដើម្បីពន្យល់ដល់សាធារណជនក្នុងការប្រើប្រាស់តែប៉ុណ្ណោះ។ គម្រោងលក់វ៉ាក់សាំងនេះ ធ្វើឡើងនៅក្រោយពេលដែលករណីឆ្លងកូវីដ១៩ និង ករណីស្លាប់មានការកើនឡើងកាន់តខ្លាំងនៅក្នុងប្រទេសឥណ្ឌូនេស៊ី។ប៉ុន្ដែ បន្ទាប់ពីរងការរិះគន់យ៉ាងចាស់ដៃពីសំណាក់អ្នកជំនាញផ្នែកសុខាភិបាល គម្រោងលក់វ៉ាក់សាំងចិននេះ ក៏ត្រូវបានផ្អាកសិន។
សូមបញ្ជាក់ថា ក្រុមហ៊ុនឱសថរបស់រដ្ឋឥណ្ឌូនេស៊ី Kimia Farma បានឲ្យដឹងថា គ្រោងការណ៍លក់វ៉ាក់សាំងកូវីដនៅតាមឱសថស្ថានមានតម្លៃ ៦០ដុល្លារ៥៣សេន សម្រាប់វ៉ាក់សាំងចំនួនពីរដូស ដែលវ៉ាក់សាំងទាំងពីរដូសនេះ នឹងបង្កើតភាពស៊ាំក្នុងរាងកាយមនុស្ស។ ប៉ុន្តែអ្នកជំនាញផ្នែកសុខភាពបាននិយាយថា ការលក់វ៉ាក់សាំងបែបនេះអាចនឹងធ្វើឱ្យប៉ះពាល់ដល់ក្រុមជនងាយរងគ្រោះ ដោយពួកគេអាចនឹងមិនមានលទ្ធភាពក្នុងការទទួលបានវ៉ាក់សាំង ស្របពេលដែលអាទិភាពក្នុងការទទួលវ៉ាក់សាំងដោយឥតគិតថ្លៃគួរតែផ្ដល់ជូនជនក្រុមងាយរងគ្រោះជាមុនសិន។
អត្ថបទគួរអាន
ទន្ទឹមនេះ ទីប្រឹក្សាជាន់ខ្ពស់របស់អគ្គនាយកអង្គការសុខភាពពិភពលោកលោក ដៀ សាមីនណាស៊ី (Diah Saminarsih) បាននិយាយថា “ប្រសិនបើវ៉ាក់សាំងកូវីដមានការផ្គត់ផ្គង់ច្រើនប្រហែលជាពេលនោះ អាចមានជម្រើសសម្រាប់ការដាក់លក់វ៉ាក់សាំង ប៉ុន្តែឥឡូវនេះមិនទាន់សមស្របក្នុងការដាក់លក់វ៉ាក់សាំងនោះទេ’’។គួររំលឹកបន្តិចដែរថា ប្រទេសឥណ្ឌូនេស៊ីធ្លាប់មានរួចមកហើយនូវកម្មវិធីដែលអនុញ្ញាតឱ្យក្រុមហ៊ុនឯកជនទិញវ៉ាក់សាំងវ៉ាក់សាំង Sinopharm សម្រាប់និយោជិក។ តែយ៉ាងណាក៏ដោយរដ្ឋមន្ត្រីសុខាភិបាលឥណ្ឌូនេស៊ីបាននិយាយកាលពីថ្ងៃច័ន្ទសប្តាហ៍នេះថា ក្រុមហ៊ុនមួយចំនួនមិនអាចទិញវ៉ាក់សាំងបង្ការកូវីដ-១៩ ចាក់ជូនបុគ្គលិកនោះទេ ដោយពួកគេ គិតថា នៅពេលខាងមុខ ការផ្គត់ផ្គង់វ៉ាក់សាំងនឹងផ្ដល់ជូនដោយឥតគិតថ្លៃ។
យ៉ាងណាមិញ គម្រោងដាក់លក់វ៉ាក់សាំងកូវីដដល់សាធារណជននេះ បានលេចឡើងនៅចំពេលដែលប្រទេសឥណ្ឌូនេស៊ីបានកត់ត្រាករណីឆ្លងកូវីដ-១៩ ជាង ២លាន៥សែនលាននាក់ និង មានជាង៦ម៉ឺន៤ពាន់នាក់បានស្លាប់ដោយសារជំងឺផ្លូវដង្ហើមដ៏កាចសាហាវមួយនេះ៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
