សារព័ត៌មានធំៗនៅលើពិភពលោកបានរាយការណ៍ថា សង្គមអាល្លឺម៉ង់អាចនឹងត្រូវរងគ្រោះ នៅដើមសប្តាហ៍នេះតទៅដោយសារតែការគំរាមធ្វើកូដកម្មពីសំណាក់កម្មករនៅក្នុងវិស័យដឹកជញ្ជូនរបស់ប្រទេស រាប់ចាប់តាំងពីអ្នកបើករថយន្តក្រុងរហូតដល់បុគ្គលិកនៅតាមអាកាសយានដ្ឋាននានា ។
ក្រុមអ្នកវិភាគបានអះអាងថា ប្រសិនបើកម្មករនៅក្នុងវិស័យដឹកជញ្ជូនពួកគេគ្រោងធ្វើកូដ កម្មចាប់នៅដើមសប្តាហ៍នេះមែននោះ សម្ពាធសង្គមអាល្លឺម៉ង់នឹងកាន់តែធ្ងន់ធ្ងរឡើងថែមទៀត ខណៈដែលប្រជាជននៅក្នុងប្រទេសនេះកំពុងតែតស៊ូនិង អតិផរណ និង ការកើនឡើងថ្លៃនៃទំនិញជាពិសេស គឺថាមពល ពីព្រោះតែអាល្លឺម៉ង់គឺជា ប្រទេសមួយដែលពឹងផ្អែកខ្លាំងលើប្រភពថាមពលពីរុស្ស៊ី ។
កាលពីខែកុម្ភៈកន្លងទៅនេះសន្ទស្សន៍នៃតម្លៃទំនិញប្រើប្រាស់នៅក្នុងប្រទេសអាល្លឺម៉ង់បាន កើនដល់ ៩,៣% ជាហេតុនាំឲ្យកម្មករទាមទារឡើងថ្លៃប្រាក់ឈ្នួល ដើម្បីទប់នឹង ការចំណាយ ប៉ុន្តែក្រុមហ៊ុនស្ទាក់ស្ទើរដោយសារតែមិនមានផលចំណេញ ។
អត្ថបទគួរអាន
លោក Frank Werneke ប្រធានសហជីពការងារមួយ ដែលមានឈ្មោះថា Verdi ជាសហជីព ដែលមានមូលដ្ឋាននៅទីក្រុងប៊ែឡាំង បានអះអាងថា ស្ថានភាពពិតជាពិបាក ពីព្រោះវាគឺជាបញ្ហានៃការរស់រានមានជីវិតសម្រាប់បុគ្គលិកជាច្រើនពាន់នាក់ ដើម្បីទទួលបានប្រាក់ឈ្នួលសមរម្យ ប៉ុន្តែការទាមទារនេះនឹងធ្វើឲ្យក្រុមហ៊ុនត្រូវចំណាយរាប់រយលានអឺរ៉ូ ចំពោះការទាម ទារនេះ ។
មកដល់ពេលបច្ចុប្បន្នសហជីព Verdi នេះមានសមាជិកប្រមាណជា ២លាន៥សែននាក់ ដែល កំពុងតែបម្រើការនៅក្នុងវិស័យដឹកជញ្ជូនសាធារណៈ និងនៅព្រលានយន្តហោះ ហើយ នៅពេលនេះពួកគេកំពុងតែទាមទារដំឡើងប្រាក់ឈ្មួលពី ១០,៥% ទៅ ១២% ដោយជាមួយនឹងបរិមាណនេះ ក្រុមហ៊ុននឹងត្រូវចំណាយបន្ថែមយ៉ាងហោចណាស់ ពី ៥៣៨ ដុល្លារទៅដល់ ជិត ៧០០ ដុល្លារ នៅក្នុងកម្មករម្នាក់នៅក្នុងមួយខែ៕
