ការកើនឡើងនៃតម្រូវការផលិតផលបន្ទះឈីប ចំពេលមានជំងឺរាតត្បាតកូវីដ១៩ រួមជាមួយនឹងការរអាក់រអួលផលិតកម្ម បានបង្កឱ្យមានការឈឺក្បាលយ៉ាងខ្លាំងចំពោះខ្សែចង្វាក់ផ្គត់ផ្គង់សម្រាប់ឧស្សាហកម្មមួយចំនួនដែលពឹងផ្អែកលើបន្ទះអេឡិចត្រូនិកតូចៗ ដែលគេហៅថា បន្ទះឈីបនោះ។ បញ្ហានេះ បានធ្វើឱ្យក្រុមហ៊ុន Intel និងក្រុមហ៊ុនផលិតផ្សេងទៀតកំពុងប្រជែងគ្នាកាន់តែខ្លាំងឡើង ដើម្បីបង្កើនការផលិតបំពេញតម្រូវការដែលកំពុងខ្វះខាតខ្លាំងនេះ។
ការវិនិយោគបង្កើតរោងចក្ររបស់ក្រុមហ៊ុន Intel នៅប្រទេសម៉ាឡេស៊ី ក្នុងតម្លៃដល់ទៅជាង៧ពាន់លានដុល្លារអាមេរិក គឺជាការពង្រីកប្រតិបត្តិការក្នុងការវេចខ្ចប់បន្ទះឈីប ដែលជាជំហានចុងក្រោយដ៏សំខាន់នៅក្នុងដំណើរការផលិតឧបករណ៍អេឡិចត្រូនិក។
យ៉ាងណាមិញ ក្រៅតែពីការបោះទុនវិនិយោគនៅប្រទេសម៉ាឡេស៊ី ថ្មីៗនេះក្រុមហ៊ុន Intel បានចាប់ផ្តើមដំណើរការរោងចក្រផលិតបន្ទះឈីបចំនួនពីរទៀតនៅក្នុងរដ្ឋ អារីហ្សូណា សហរដ្ឋអាមេរិក ក្នុងទំហំវិនិយោគចំនួន ២០ ពាន់លានដុល្លារៀងដែរ។
អត្ថបទគួរអាន
គួរបញ្ជាក់ថា សម្រាប់ការវិនិយោគនេះ ក្រុមហ៊ុន Intel ប្តេជ្ញានឹងក្លាយជារោងចក្របន្ទះអេឡិចត្រូនិករបស់អាមេរិកដ៏ធំតែមួយគត់ ដែលខ្លាំងទាំងផ្នែករចនា និងផលិតបន្ទះឈីប ដើម្បីផ្គត់ផ្គងទៅកាន់ទីផ្សារពិភពលោក។
សូមជម្រាបថា នៅតំបន់អាស៊ានមានតែ ២ ប្រទេសប៉ុណ្ណោះ ដែលត្រូវបានក្រុមហ៊ុន Intel ជ្រើសរើសជាទីតាំងវិនិយោគក្នុងការផលិតបន្ទះឈីប ដែលក្នុងនោះរួមមាន ប្រទេសវៀតណាម និងប្រទេសម៉ាឡេស៊ី។
តែយ៉ាងណាមិញ នៅក្នុងទ្វីបអាស៊ី ក្រៅតែពីក្រុមហ៊ុន Intel ក៏មានក្រុមហ៊ុនផលិតសម្ភារៈបន្ទះឈីបរបស់សហរដ្ឋអាមេរិកមួយទៀត គឺ ក្រុមហ៊ុន Entegris ក៏បានប្រកាសឡើងថ្មីៗនេះដែរថា ខ្លួនគ្រោងនឹងវិនិយោគច្រើនជាងទ្វេដងនៅកោះតៃវ៉ាន់ និងសាងសង់កន្លែងផលិតដ៏ធំបំផុតរបស់ខ្លួននៅលើកោះនេះផងដែរ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
