ស្ថាប័នស្រាវជ្រាវសេដ្ឋកិច្ចដ៏ល្បីគឺ Moodys’ ក៏បានចេញរបាយការណ៍ថ្មីចុងក្រោយរបស់ខ្លួន ដោយបានព្យាករថា សេដ្ឋកិច្ចពិភពលោកនៅឆ្នាំ២០២១នេះ នឹងកើនដល់ ៥,៤%។ ការព្យាកររបស់ Moody’s គឺធ្វើឡើងនៅក្រោយគ្នាបន្តិចនៃការព្យាកររបស់ក្រុមប្រឹក្សាសន្និសីទអង្គការសហប្រជាជាតិស្តីពីពាណិជ្ជកម្ម និងការអភិវឌ្ឍ ដែលបានឲ្យដឹងថា សេដ្ឋកិច្ចពិភពលោកនៅឆ្នាំ២០២១ នឹងកើនដល់ ៤,៧% ខណៈដែល អង្គការមូលធិនិរូបិយវត្ថុអន្តរជាតិ (IMF) បានព្យាករថា នឹងកើនដល់៥,៥%។
ចំពោះកំណើនសេដ្ឋកិច្ចនៅតំបន់អាស៊ីវិញ ត្រូវបានស្ថាប័ន Moody’sរំពឹងខ្ពស់ថានឹងងើបឡើងក្នុងរង្វង់ ៧% ដោយមានការគាំទ្រពីក្រោយយ៉ាងខ្លាំងក្លាដោយការលូតលាស់លឿននៃសេដ្ឋកិច្ចចិន និងការវិលត្រឡប់មកប្រសើរឡើងជាងមុននៃសេដ្ឋកិច្ចរបស់ឥណ្ឌា។
ការព្យាកររបស់ស្ថាប័ន Moody’s នេះ គឺអាស្រ័យលើភាពជោគជ័យនៃការចាក់វ៉ាក់សាំងកូវីដ-១៩ នៅទូទាំងសកលលោក។ គួបផ្សំនឹងថ្មីៗនេះ អាមេរិកក៏ទើបតែអនុម័តកញ្ចប់ថវិកាជំរុញសេដ្ឋកិច្ចជិត២ទ្រីលានដុល្លារ ខណៈបណ្ដាប្រទេសមួយចំនួននៅអឺរ៉ុបក៏មានវិធានការជំរុញសេដ្ឋកិច្ចនេះដែរ ដែលវាគឺជាក្ដីរំពឹងខ្ពស់ថា នឹងធ្វើឲ្យសេដ្ឋកិច្ចពិភពលោកស្ទុះងើបលឿនជាងមុន។
អត្ថបទទាក់ទង
ជាមួយគ្នានេះ ស្ថាប័នទីភ្នាក់ងារវាយតម្លៃឥណទានរបស់អាមេរិក Fitch Ratings ឯណោះវិញ ថ្មីៗនេះ ក៏បានបង្កើនការព្យាករកំណើន GDP របស់សកលលោកនៅឆ្នាំ២០២១នេះថា នឹងមានជាង ៦%ផងដែរ ដោយសម្អាងទៅលើហេតុផលចម្បង គឺការចាក់វ៉ាក់សាំងកូវីដ-១៩ កំពុងកើនឡើងនៅទូទាំងសកលលោកដែរ។
សម្រាប់ប្រទេសមហាអំណាចសេដ្ឋកិច្ចយក្សៗ នៅឆ្នាំ២០២១ ប្រទេសចិនត្រូវបានព្យាករថានឹងមានសេដ្ឋកិច្ចកើនឡើងជាង៨% ខណៈដែលសហរដ្ឋអាមេរិកនឹងមានជាង ៦% ខណៈដែលប្រទេសមានទីផ្សារកំពុងរីកចម្រើន ក្រៅពីប្រទេសចិន ត្រូវបានរំពឹងថានឹងមានកំណើនសេដ្ឋកិច្ច ៦% ស្របពេលដែលកំណើនសេដ្ឋកិច្ចរបស់អឺរ៉ុបវិញវិញ នឹងមាន៤,៧%។ នេះបើតាមការព្យាករណ៍របស់ស្ថាប័ន Fitch Ratings ។
អ្នកជំនាញរបស់ស្ថាប័នដដែលនេះ បានឲ្យដឹងថា ការរាតត្បាតនៃមេរោគមិនទាន់ផុតរលត់ទៅណាទេ ប៉ុន្ដែ វាកំពុងតែចាប់ផ្ដើម ដែលទំនងជាយើងបាននិងកំពុងចូលដល់ដំណាក់កាលចុងក្រោយនៃវិបត្តិសេដ្ឋកិច្ចហើយ។
ដោយឡែក ការស្រាវជ្រាវរបស់អង្គការស្រាវជ្រាវសេដ្ឋកិច្ច ING Economics ដែលមានមូលដ្ឋាននៅប្រទេសហូឡង់ឯណោះវិញ ក៏បានព្យាករកំណើនសេដ្ឋកិច្ចសកលនៅឆ្នាំ២០២១នេះដែរថា នឹងកើន៦% ដោយសម្អាងលើហេតុផលថា សេដ្ឋកិច្ចពិភពលោកនឹងវិលត្រឡប់ប្រសើរឡើងវិញលឿន នៅកម្រិតមុនពេលមានមេរោគរាតត្បាត ក៏ដូចជាការបើកដំណើរការសេដ្ឋកិច្ចឡើងវិញ។
អ្នកជំនាញសេដ្ឋកិច្ចអន្តរជាតិបានមើលឃើញដែរថា ការគាំទ្រសារពើពន្ធ ដែលជាកញ្ចប់ថវិការជំរុញសេដ្ឋកិច្ចជិត២ទ្រីលានដុល្លារអាមេរិក របស់រដ្ឋបាលលោកចូបៃឌិន ប្រធានាធិបតីអាមេរិក គឺជាកូនសោរដ៏សំខាន់មួយ ដោយសារតែកញ្ចប់ថវិកា ដែលមានទំហំធំជាង ២,៥% នៃទំហំ GDP របស់សកលលោកនេះ នឹងមានឥទ្ធិពលខ្លាំងជួយឲ្យសេដ្ឋកិច្ចពិភពលោកស្ទុះងើបឡើង ព្រមជាមួយការគាំទ្រដោយការបន្ធូរបន្ថយផ្នែកសារពើពន្ធនៅក្នុងប្រទេសអង់គ្លេស, ជប៉ុន, ឥណ្ឌា និងសភាពអឺរុបផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
