ក្រៅពីនេះកិច្ចព្រមព្រៀងដដែល ក៏នឹងផ្សាភ្ជាប់តួនាទីរបស់អង់គ្លេស នៅក្នុងការការពារសន្តិសុខ ក្នុងតំបន់ឥណ្ឌូប៉ាស៊ីហ្វិក ពិសេសគឺនៅស្របពេល ដែលតំបន់មួយនេះកំពុងប្រឈមគ្រោះថ្នាក់ ដោយសារតែការពង្រីកដែនអំណាចយោធារបស់ចិន ហើយដែលកំពុងធ្វើឲ្យជប៉ុនព្រួយបារម្ភយ៉ាងខ្លាំង។ នេះបើតាមការចុះផ្សាយដោយសារព័ត៌មានអន្តរជាតិធំៗជាច្រើន។
នាយករដ្ឋមន្ត្រីជប៉ុនលោក ហ្វីមីអូ គីស៊ីដា (Fumio Kishida) និងនាយករដ្ឋមន្ត្រីអង់គ្លេសលោក រ៉ីស៊ី ស៊ូណាក (Rishi Sunak) បានចុះហត្ថលេខាលើកិច្ចព្រមព្រៀងសហប្រតិបត្តិការកងទ័ពរវាងជប៉ុន-ចក្រភពអង់គ្លេស កាលពីថ្ងៃពុធទី១១ខែមករាឆ្នាំ២០២៣ អំឡុងដំណើរទស្សនកិច្ចរបស់ប្រមុខដឹកនាំជប៉ុនរួបនេះទៅកាន់ទឹកដីអង់គ្លេសជាលើកដំបូង។
កិច្ចព្រមព្រៀងនេះ នឹងពង្រីកបណ្តាញនៃកតិសញ្ញាការពារជាតិសម្រាប់ជប៉ុន ព្រមទាំងធ្វើឱ្យកាន់តែស៊ីជម្រៅនូវកិច្ចសហប្រតិបត្តិការ របស់ចក្រភពអង់គ្លេសនៅក្នុងតំបន់ឥណ្ឌូប៉ាស៊ីហ្វិក ពិសេសគឺទប់ទល់នឹងការពង្រីកខ្លួនរបស់ចិនក្នុងតំបន់។ ក្រោយចុះហត្ថលេខា កិច្ចព្រមព្រៀងនេះនឹងត្រូវបញ្ចូនទៅសភាជាតិនៃប្រទេសទាំងពីរ រង់ចាំការអនុម័ត និងប្រកាសចូលជាធរមាន។
គួរជម្រាបថា នេះជាកិច្ចព្រមព្រៀងការពារជាតិ ដ៏ធំនិងចំបាច់បំផុតសម្រាប់ប្រទេសទាំង២ ក្នុងពេលមួយសតវត្សរ៍មកនេះ។ សន្ធិសញ្ញាស្រដៀងគ្នានេះ ដែលរដ្ឋាភិបាលក្រុងតូក្យូ និងក្រុងឡុងដ៏ធ្លាប់មាន គឺសន្ធិសញ្ញាសម្ព័ន្ធភាពអង់គ្លេស-ជប៉ុន ឆ្នាំ១៩០២ ដើម្បីទប់ទល់ជាមួយនឹងការឈ្លានពានរបស់រុស្ស៊ី។
នាយករដ្ឋមន្ត្រីអង់គង់គ្លេស លោក ស៊ុនណាក់ បាននិយាយថា កិច្ចព្រមព្រៀងនេះ បានពង្រឹងការប្តេជ្ញាចិត្តរបស់ចក្រភពអង់គ្លេសចំពោះតំបន់ឥណ្ឌូប៉ាស៊ីហ្វិក។ នៅក្នុងពិភពលោកដែលប្រកបដោយការប្រកួតប្រជែងកាន់តែខ្លាំងឡើងនេះ វាមានសារៈសំខាន់ជាងពេលណាៗទាំងអស់ ដែលសង្គមប្រជាធិបតេយ្យនៅតែបន្តឈរទន្ទឹមគ្នា ដើម្បីស្វែងរក និងដោះស្រាយបញ្ហាប្រឈមជាសាកល ដែលមិនធ្លាប់មានពីមុនមក។
អត្ថបទគួរអាន
ដោយឡែក នាយករដ្ឋមន្ត្រីជប៉ុន លោក គីហ្សីដា បាននិយាយថា កិច្ចព្រមព្រៀងនេះ នឹងក្លាយជាមូលដ្ឋានគ្រឹះ សម្រាប់កិច្ចសហប្រតិបត្តិការលើវិស័យការពារជាតិរវាងប្រទេសទាំងពីរ។ ប្រទេសជប៉ុននិងចក្រភពអង់គ្លេសកំពុងសហការគ្នា ដើម្បីទទួលខុសត្រូវក្នុងការដោះស្រាយបញ្ហាជាយុទ្ធសាស្ត្រមិនមែនសម្រាប់តែប្រទេសទាំងពីរនោះទេ តែគឺដោះស្រាយបញ្ហាសម្រាប់សហគមន៍អន្តរជាតិ ដែលកំពុងប្រឈមមុខផងដែរ។
មែនទែនទៅ កិច្ចព្រមព្រៀងខាងលើនេះត្រូវបានផ្តួចផ្តើមឡើង ដោយប្រទេសជប៉ុនជាមួយចក្រភពអង់គ្លេស ជាលើកដំបូងតាំងពីឆ្នាំ២០២១មក ហើយបានឆ្លងកាត់ការជជែកចរចាគ្នាអស់ពេលជាច្រើនឆ្នាំ ទើបត្រូវបានយល់ព្រមជាគោលការណ៍កាលពីខែឧសភាឆ្នាំ២០២២ បន្តរហូតដល់ការចុះហត្ថលេខានៅដើមឆ្នាំ២០២៣នេះ។ កិច្ចព្រមព្រៀងនេះគឺជាសញ្ញាមួយនៃការពង្រឹងទំនាក់ទំនងសន្តិសុខរវាងប្រទេស ទាំងពីរ ដែលសុទ្ធសឹងជាសមាជិកនៃក្រុមប្រទេសមានសេដ្ឋកិច្ចជឿនលឿនទាំង៧ ឬហៅកាត់ថា G7។
បើតាមការឱ្យដឹងពីការិយាល័យរដ្ឋាភិបាលអង់គ្លេស Downing Street កិច្ចព្រមព្រៀងសហប្រតិបត្តិការកងទ័ពនេះ នឹងអនុញ្ញាតឲ្យកងទ័ពទាំង២ រៀបចំគម្រោងផែនការ ព្រមទាំងដាក់ចុះការអនុវត្តហ្វឹកហាត់សមយុទ្ធ និងពង្រាយកម្លាំងទ័ព ក្នុងទ្រង់ទ្រាយធំ។ បន្ថែមពីនេះទៀត អង់គ្លេស និងជប៉ុន និងរួមគ្នាជាមួយសម្ព័ន្ធអ៊ីតាលី ដើម្បីផលិតយន្តហោះចម្បាំងទំនើបមួយប្រភេទថ្មីទៀត ឱ្យបានត្រឹមឆ្នាំ២០៣៥។
សូមជម្រាបថា ក្រៅតែពីបញ្ហាយោធា លោកនាយករដ្ឋមន្ត្រី ស៊ូណាក់ បាននិយាយជាមួយលោក គីស៊ីដា អំពីការរឹតចំណងសហការពាណិជ្ជកម្ម ដោយអង់គ្លេសមានបំណងចូលរួមនៅក្នុង កិច្ចព្រមព្រៀងពាណិជ្ជកម្មសេរីអន្តរប៉ាស៊ីហ្វិក ឬហៅកាត់ថា CP TPP។ បន្ថែមពីនេះ ក្នុងនាមជប៉ុនជាប្រធានដឹកនាំកិច្ចប្រជុំ G7 ក្នុងឆ្នាំ២០២៣នេះ អង់គ្លេសមានបំណងជំរុញឲ្យការជជែកគ្នាអំពីផែនការផ្តល់ជំនួយដល់អ៊ុយក្រែន ប្រឈមនឹងការឈ្លានពានរបស់រុស្ស៊ី ដែលជិតដល់គម្រប់មួយឆ្នាំទៅហើយ៕
