ក្រសួងការពារជាតិជប៉ុនបាននិយាយឱ្យដឹងថា យន្តហោះចម្បាំងប្រភេទ F-2 និង F-15 ប្រហែលបួនគ្រឿងបានចូលរួមក្នុងសមយុទ្ធ ដែលបានធ្វើឡើងកាលពីថ្ងៃចន្ទទី១៦ ខែមករា ដែលជាថ្ងៃដំបូង ស្ថិតនៅឯមូលដ្ឋានទ័ពអាកាសក្នុងខេត្ត Ibaraki ភាគឦសាននៃទីក្រុងតូក្យូ ប្រទេសជប៉ុន។
មែនទែនទៅ សមយុទ្ធនេះបានចាប់ផ្តើមនៅពេលដែលនាយករដ្ឋមន្រ្តីជប៉ុនលោក Fumio Kishida បានបញ្ចប់ការធ្វើដំណើរទស្សនកិច្ចទៅកាន់ប្រទេសអ៊ីតាលី ចក្រភពអង់គ្លេស កាណាដា និងសហរដ្ឋអាមេរិក ដើម្បីពង្រឹងសម្ព័ន្ធភាពរបស់ជប៉ុនពីការគំរាមកំហែងពីសំណាក់ក្រុងប៉េកាំង។ ទោះយ៉ាងណា គេមិនបានឃើញទស្សនកិច្ចរបស់នាយករដ្ឋមន្ត្រីជប៉ុនទៅកាន់ប្រទេសឥណ្ឌាឡើយ កាលពីបេសសកម្មរបស់លោកនៅសប្តាហ៍មុន។
គួរជម្រាបថា ប្រទេសជប៉ុនដែលជាសមាជិកនៃសម្ព័ន្ធភាពចតុភាគី Quad ដែលរួមមានឥណ្ឌា អូស្ត្រាលី និងសហរដ្ឋអាមេរិក ហើយត្រូវបានគេមើលឃើញថា ដែលសម្ព័ន្ធនេះ គឺជាយុទ្ធសាស្ត្ររបស់ប្រទេសសម្ព័ន្ធអាមេរិកក្នុងការត្រួតពិនិត្យមើលការកើនឡើងនៃឥទ្ធិពលចិនក្នុងតំបន់ឥណ្ឌូប៉ាស៊ីហ្វិក។
អត្ថបទគួរអាន
បើយោងតាមសារព័ត៌មាន Kyodo របស់ជប៉ុនបានរាយការណ៍ថា សមយុទ្ធរួមគ្នាជាមួយប្រទេសឥណ្ឌានេះកើតចេញពីកិច្ចប្រជុំសន្តិសុខនៅទីក្រុងញូវដេលី តាំងតែពីខែវិច្ឆិកាឆ្នាំ២០១៩កន្លងទៅ ប៉ុន្តែត្រូវបានផ្អាកដោយសារជំងឺរាតត្បាតជំងឺកូវីដ១៩។
បើតាមកាសែតក្យូដូដដែល ឥណ្ឌាគឺជាប្រទេសទី៥ហើយ ដែលជប៉ុនបានធ្វើសមយុទ្ធទ្វេភាគីបែបនេះរួមគ្នា បន្ទាប់ពីសហរដ្ឋអាមេរិក អូស្ត្រាលី អង់គ្លេស និងអាល្លឺម៉ង់។
អ្នកនាំពាក្យកងទ័ពអាកាសឥណ្ឌាលោក អាស៊ីស មុកហេ(Ashish Moghe) បាននិយាយថា ប្រទេសឥណ្ឌាកំពុងដាក់យន្តហោះចម្បាំងប្រភេទ Su-30MKI ដែលជាផលិតផលរុស្ស៊ី និងយន្តហោះដឹកជញ្ជូនធុនធ្ងន់ C-17Globemaster ផលិតដោយសហរដ្ឋអាមេរិក នៅក្នុងសមយុទ្ធលើកដំបូងនេះ។ លោកបានបន្ថែមថា ភាគីទាំងពីរនឹងធ្វើសមយុទ្ធប្រយុទ្ធតាមផ្លូវអាកាស ដែលមានលក្ខខណៈ ស្មុគស្មាញ និងផ្លាស់ប្តូរបទពិសោធន៍ល្អៗបំផុតពីគ្នាទៅវិញទៅមកផងដែរ។
មិនមែនតែជប៉ុននោះទេ ដែលភ័យព្រួយចំពោះយោធាចិន ភាពតានតឹងរវាងឥណ្ឌា និងចិននៅតាមបណ្តោយព្រំដែននៃប្រទេសទាំងពីរដែលបានផ្ទុះឡើងកាលពីខែមិថុនាឆ្នាំ២០២០ និងនៅចុងឆ្នាំ២០២២កន្លងទៅ ក៏បានញ៉ាំងឱ្យទីក្រុងញូដេលីមានការប្រុងប្រយ័ត្ន ស្វះស្វែងពង្រឹងទំនាក់ទំនងយោធាជាមួយនឹងប្រទេសសម្ព័ន្ធមិត្ត ដើម្បីជាខ្នងបង្អែក សម្រាប់ប្រឈមមុខនឹងរដ្ឋអំណាចប៉េកាំងផងដែរ។
សូមបញ្ជាក់ថា បច្ចុប្បន្ននេះការពារជាតិជាវិស័យអាទិភាពដែលរដ្ឋាភិបាលទីក្រុងតូក្យូបានធ្វើកំណែទម្រង់ទ្រង់ទ្រាយធំនិងស៊ីជ្រៅ។ កាលពីចុងឆ្នាំ២០២២ តូក្យូបានអនុម័តនូវយុទ្ធសាស្រ្តសន្តិសុខជាតិថ្មីមួយដែលគ្រោងបង្កើនថវិកាការពារជាតិប្រចាំឆ្នាំទ្វេដង ពីពេលនេះទៅឆ្នាំ ២០២៧៕
