លោក Hagiuda ដែលជារដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និង ឧស្សាហកម្មបានប្រាប់សន្និសីទសារព័ត៌មានមួយថា គម្រោងទាញយកប្រេង និង ឧស្ម័ន Sakhalin-1 នៅក្នុងប្រទេសរុស្ស៊ីបានរួមចំណែកយ៉ាងសំខាន់ដល់ការធ្វើពិពិធកម្មការផ្គត់ផ្គង់ថាមពលរបស់ប្រទេសជប៉ុន។ លោក Haguida បាននិយាយថា គម្រោង Sakhalin-1 គឺជាប្រភពផ្គត់ផ្គង់ថាមពលដ៏មានតម្លៃសម្រាប់ប្រទេសជប៉ុនបន្ទាប់ពីតំបន់តំបន់មជ្ឈិមបូព៌ា ខណៈខ្លួនមានការពឹងផ្អែកលើតំបន់មជ្ឈិមបូព៌ាសម្រាប់ការនាំចូលប្រេងឆៅចំនួន ៩០% រួចទៅហើយ។ លោកបន្តថា ជប៉ុននឹងមិនមានការផ្លាស់ប្តូរភាគហ៊ុនក្រុមហ៊ុនជប៉ុននៅក្នុងគម្រោងនេះនោះទេ ហើយនៅតែបន្តរក្សាផលប្រយោជន៍របស់ខ្លួននៅក្នុងគម្រោងនេះដដែល។ គួររំឭកថា រុស្ស៊ីបានហាមប្រាមអ្នកវិនិយោគមកពីប្រទេសដែលបានប្រឆាំងនឹងទីក្រុងម៉ូស្គូជុំវិញបញ្ហាសង្គ្រាមនៅអ៊ុយក្រែន ដោយជំរុញឱ្យលក់ភាគហ៊ុន និង គម្រោងថាមពលសំខាន់ៗចេញពីទីក្រុងម៉ូស្គូ រួមទាំង គម្រោងទាយយកប្រេង និង ឧស្ម័ន Sakhalin-1 ត្រូវតែលក់ភាគហ៊ុនចេញនៅត្រឹមដំណាច់ឆ្នាំនេះតែម្ដង ដើម្បីជាការឆ្លើយតបទៅនឹងការដាក់ទណ្ឌកម្មរបស់លោកខាងលិច។
អត្ថបទគួរអាន
គួរបញ្ចាក់ថា គម្រោងអភិវឌ្ឍន៍ប្រេង និង ឧស្ម័ន Sakhalin ដែលមាន ២ គម្រោង គឺ មានសម្ព័ន្ធក្រុមហ៊ុនជប៉ុនបានកាន់កាប់ភាគហ៊ុន ៣០% នៃគម្រោង Sakhalin-1 និង មានភាគហ៊ុន ២៧,៥% នៅក្នុងគម្រោង Sakhalin-2។ កាលពីថ្ងៃទី ២ ខែ សីហា គម្រោងឧស្ម័នធម្មជាតិរាវ Sakhalin-2 ដែលត្រូវបានសម្រេចផ្ទេរទៅឱ្យប្រតិបត្តករថ្មី រដ្ឋាភិបាលរុស្ស៊ីចេញសេចក្តីថ្លែងការណ៍ផ្តល់ឱ្យអ្នកវិនិយោគបរទេសនៅគម្រោងឧស្ម័នធម្មជាតិរាវ Sakhalin-2 មានរយៈពេល ១ ខែ ដើម្បីធ្វើការសម្រេចចិត្តលើភាគហ៊ុនរបស់ពួកគេ ថាតើគួរបន្តរក្សារភាគហ៊ុននៅក្នុងគម្រោងថ្មី ឬ ត្រូវលក់ភាគហ៊ុនចេញ។ ក្នុងនោះ វិនិយោគិនបរទេស ដែលមានភាគហ៊ុនក្នុងគម្រោង Sakhalin-2 រួមមាន ក្រុមហ៊ុន Shell ដែលជារបស់ចក្រភពអង់គ្លេសមានភាគហ៊ុន ២៧,៥% និង ក្រុមហ៊ុនរបស់ជប៉ុន គឺ Mitsui & Co មានភាគហ៊ុន ១២,៥% និង ក្រុមហ៊ុន Mitsubishi Corp កាន់កាប់ ១០%។
លោក Hagiuda បានរំលឹកឡើងវិញថា ប្រទេសជប៉ុនមានបំណងចង់ឱ្យពាណិជ្ជកម្មរបស់ជប៉ុនរក្សាភាគហ៊ុននៅក្នុង Sakhalin-2 ផងដែរ។ លោក Hagiuda បាននិយាយថា លោកនឹងត្រូវពិចារណាវិធានការជាក់លាក់បន្ទាប់ពីបានបញ្ជាក់ពីព័ត៌មានលម្អិតនៃការសម្រេចចិត្តរបស់រុស្ស៊ី ដោយសារគោលការណ៍ជាមូលដ្ឋានស្តីពីការរក្សាភាគហ៊ុនដើម្បីចាប់ផ្តើមនីតិវិធីសម្រាប់ការផ្លាស់ប្តូរទៅជាអង្គភាពថ្មីគឺត្រូវតែបំពេញតាមលក្ខខណ្ឌរបស់រុស្ស៊ី។ រដ្ឋមន្ត្រីក្រសួងឧស្សាហកម្មជប៉ុនរូបនេះ បានអះអាងថា វិស័យសាធារណៈ និង ឯកជននឹងធ្វើការរួមគ្នាដើម្បីធានាឱ្យមានស្ថិរភាពនៃការផ្គត់ផ្គង់ឧស្ម័នធម្មជាតិពីរុស្ស៊ីទៅកាន់ប្រទេសជប៉ុន៕
