តាមការរាយការណ៍ពីរដ្ឋាភិបាលវៀតណាមដែលបានផ្សាយនៅក្នុងសារព័ត៌មានក្នុងស្រុកនៃប្រទេសនេះបានឲ្យដឹងថា ផ្លែគូលែនដែលនាំចេញទៅជប៉ុន ត្រូវតែប្រាកដថា បានដាំនៅក្នុងចម្ការថែរក្សា និងត្រួតពិនិត្យដោយនាយកដ្ឋានការពាររុក្ខាជាតិ ក្រោមក្រសួងកសិកម្ម និងអភិវឌ្ឍន៍ជនបទ ហើយត្រូវគោរពតាមស្ដង់ដារវេចខ្ចប់ជីវសាស្ត្រវេចខ្ចប់របស់ប្រទេសជប៉ុន។
ជប៉ុន គឺជាប្រទេសមួយ ស្ថិតនៅក្នុងចំណោមប្រទេស ដែលមានបទប្បញ្ញត្តិសុវត្ថិភាពស្បៀងអាហារតឹងរឹងបំផុតនៅក្នុងពិភពលោក។ ការសម្រេចចិត្តចុងក្រោយដែលបើកផ្លូវឲ្យវៀតណាមនាំចូលផ្លែគូលែននេះ ត្រូវបានធ្វើឡើង បន្ទាប់ពីមានការចរចាគ្នាអស់រយៈពេលជាង ៥ ឆ្នាំ រវាងនាយកដ្ឋានការពាររុក្ខាជាតិវៀតណាម និងក្រសួងកសិកម្ម រុក្ខាប្រមាញ់ និងនេសាទជប៉ុន។ នៅអំឡុងពេលនោះក៏មានការធ្វើតេស្ដយ៉ាងម៉ត់ចត់ជាច្រើន ដើម្បីធានាថា ផ្លែគូលេនវៀតណាម គឺអាចត្រូវតាមស្ដង់ដារជប៉ុនបាន។
អត្ថបទទាក់ទង!
នាយកដ្ឋានការពាររុក្ខាជាតិវៀតណាម បានជូនដំណឹង និងគាំទ្រដល់អ្នកនាំចេញនិងម្ចាស់ចម្ការឲ្យប្រញាប់ស្វែករកដៃគូជាក្រុមហ៊ុននាំចូលជប៉ុន ដូច្នេះ វៀតណាមអាចចាប់ផ្ដើមនាំចេញផ្លែឈើនេះ នៅដើមរដូវក្រោយ ដែលចន្លោះពីខែឧសភា ដល់ខែកក្កដាឆ្នាំ២០២០ខាងមុខ។
យោងតាមក្រសួងកសិកម្មវៀតណាម បានឲ្យដឹងដែរថា ផ្លែគូលែន គឺត្រូបាននាំចេញទៅកាន់ទីផ្សារចំនួន៣០ប្រទេស ដោយទីផ្សារធំៗមានដូចជា ចិន អឺរ៉ុប រុស្ស៊ី សហរដ្ឋអាមេរិក និងកាណាដាជាដើម។
ដោយឡែក សម្រាប់ទីផ្សារប្រទេសជប៉ុនវិញ គឺមាន៣,២% ប៉ុណ្ណោះ នៃការនាំចេញផ្លែឈើ និងបន្លែសរុបរបស់វៀតណាម ដែលមានតម្លៃជាទឹកប្រាក់ប្រមាណ ៣ពាន់៥រយលានដុល្លារអាមេរិក នៅ១១ខែឆ្នាំ២០១៩នេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
