នាយករដ្ឋមន្ត្រីជប៉ុន គីហ្សីដា បានផ្តើមទស្សនកិច្ចកាលពីថ្ងៃសុក្រទី២៩មេសា នៅក្រុងចាកាតា ប្រទេសឥណ្ឌូនេស៊ី។ នៅទីនោះ លោកបានជួបពិភាក្សាជាមួយ ប្រធានាធិបតី ចូកូ វីដូដូ ដែលនឹងធ្វើជាប្រធានដឹកនាំកិច្ចប្រជុំកំពូល G20 នៅចុងឆ្នាំនេះផងដែរ។
នៅក្នុងសុន្ទរកថារួមមួយទៅកាន់អ្នកសារព័ត៌មាន លោកគីហ្សីដាបាននិយាយថា ប្រទេសជប៉ុននៅតែប្តេជ្ញាចិត្ត ក្នុងការអំពាវនាវឱ្យបញ្ឈប់អរិភាពក្នុងប្រទេសអ៊ុយក្រែន។ ប្រធានាធិបតីឥណ្ឌូណេស៊ី Joko Widodo បាននិយាយដែរថា សង្គ្រាមនៅអ៊ុយក្រែនត្រូវតែបញ្ឈប់។ បើតាមប្រមុខដឹកនាំឥណ្ឌូនេស៊ីរូបនេះ លោកក៏បានអញ្ជើញទាំងមេដឹកនាំអ៊ុយក្រែន និងរុស្ស៊ីរួចហើយដែរ ឱ្យមកចូលរួមក្នុងកិច្ចប្រជុំកំពូល G20 ក្នុងខែវិច្ឆិកាខាងមុខ បើទោះបីជាមានសម្ពាធពីប្រទេសលោកខាងលិចមួយចំនួន ដើម្បីឲ្យដករុស្ស៊ីចេញក៏ដោយ។
ក្រោយបញ្ចប់បេសសកម្មនៅឥណ្ឌូនេស៊ីកាលពីថ្ងៃសុក្រ លោកគីហ្សីដា បានទៅដល់ប្រទេសវៀតណាម កាលពីថ្ងៃសៅរ៍ទី៣០មេសា រួចបន្តដំណើរកាលពីថ្ងៃទី០១ឧសភាទៅប្រទេសថៃ។ ថៃដែលនឹងធ្វើជាម្ចាស់ផ្ទះនៃវេទិកាសេដ្ឋកិច្ចអាស៊ីប៉ាស៊ីហ្វិក ហៅកាត់ថា APEC ក្នុងឆ្នាំ២០២២នេះផងដែរ។
អត្ថបទគួរអាន
លោកនាយករដ្ឋមន្ត្រីជប៉ុន បានរំលឹកប្រាប់គ្រប់ប្រទេសក្នុងតំបន់អាស៊ីអាគ្នេយ៍ម្តងហើយម្តងទៀតថា ការដែលរុស្ស៊ីបានឈ្លានពានលើអ៊ុយក្រែន ជាការរំលោភច្បាប់អន្តរជាតិដ៏ធ្ងន់ធ្ងរ។ លោកគីហ្សីដាចាត់ទុក សង្គ្រាមរុស្ស៊ីនៅអ៊ុយក្រែន ថាបានធ្វើឱ្យខូចខាតសណ្តាប់ធ្នាប់អន្តរជាតិ និងជារឿងមិនអាចទទួលយកបានទេ។ លោកបានឆ្លៀតលើកយកប្រទេសចិន មកនិយាយថា បានដាក់សម្ពាធលើប្រទេសក្នុងតំបន់ផងដែរ តាមរយៈសំណុំរឿងជម្លោះដែនសមុទ្រ និងសំណុំរឿងកោះតៃវ៉ាន់ជាដើម។
ក្នុងនាមជាប្រទេសអាស៊ីតែមួយគត់ ដែលជាសមាជិករបស់ក្រុមប្រទេសមហាអំណាចទាំងពីរ ឬ G7 ជប៉ុនសង្ឃឹមថា នឹងអាចរៀបចំកិច្ចពិភាក្សាស្តីពីសង្គ្រាមលើអ៊ុយក្រែន ក៏ដូចជាបង្រួបបង្រួមជំហររបស់ប្រទេសនៅអាស៊ីអាគ្នេយ៍ ឲ្យឆ្លើយតបដូចគ្នាទៅនឹងប្រតិបត្តិការឈ្លានពានរបស់រុស្ស៊ី ។ ជាក់ស្តែង មកទល់នឹងពេលនេះ ក្នុងចំណោមប្រទេសក្នុងតំបន់ មានតែមួយសិង្ហបុរីមួយគត់ដែលបានចូលរួមដាក់ទណ្ឌកម្មប្រឆាំងនឹងម៉ូស្គូ។
សូមជម្រាបថា ដំណើរទស្សនកិច្ចជាបន្តបន្ទាប់បែបនេះ គឺស្ថិតក្រោមកម្មវត្ថុតែមួយប៉ុណ្ណោះ ពោលគឺតូក្យូចង់ជំរុញឱ្យមេដឹកនាំប្រទេសក្នុងតំបន់អាស៊ីអាគ្នេយ៍ ដកខ្លួនចេញពីគោលការណ៍ អព្យាក្រិត្យភាពមិនចូលបក្សសម្ព័ន្ធ។ ប៉ុន្តែមិនមែនមានន័យថា ជប៉ុន ស្វែងរកការបង្កើតសមរភូមិរួមនៅអាស៊ីអាគ្នេយ៍ប្រឆាំងរុស្ស៊ី និងចិននោះទេ។ ជប៉ុនចង់ឱ្យតែប្រទេសទាំងអស់នេះ មានទស្សនវិស័យ ព្រមគាំទ្រជំហរនយោបាយសន្តិសុខរួម ដើម្បីធ្វើយ៉ាងណាឱ្យតំបន់ឥណ្ឌូប៉ាស៊ីហ្វិក បើកចំហ មានសេរីភាព និងអាចធ្វើនាវាចរបានដោយសេរី។
គួរបញ្ជាក់ថា នៅចុងខែឧសភានេះជប៉ុននឹងធ្វើជាម្ចាស់ផ្ទះកិច្ចពិភាក្សាសម្ព័ន្ធមិត្ត ខ្វត (Quad) ស្តីពីសន្តិសុខក្នុងតំបន់ ដែលលោកប្រធានាធិបតីអាមេរិក Joe Biden មេដឹកនាំអូស្ត្រាលី និងឥណ្ឌាក៏នឹងបង្ហាញវត្តមាននៅទីនោះផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
