របាយការណទ៍ចេញផ្សាយនៅថ្ងៃព្រហស្បតិ៍ទី១៩ ប្រទេសជប៉ុនបានរាយការណ៍ថា ឱនភាពពាណិជ្ជកម្មប្រចាំឆ្នាំ២០២២មានតម្លៃ១៥៥ពាន់លានដុល្លារអាមេរិក។ កំណើននេះដោយសារតែតម្លៃទំនិញកើនខ្ពស់ បូករួមនឹងតម្លៃប្រាក់យេន ដែលជារូបិយបណ្ណជប៉ុនធ្លាក់ចុះផងនោះ ទើបតម្លៃនាំចូលនៃម្ហូបអាហារ វត្ថុធាតុដើម និងទំនិញផ្សេងទៀតត្រូវបានកើនខ្ពស់។
យោងតាមទិន្នន័យបឋមដែលចេញផ្សាយដោយក្រសួងហិរញ្ញវត្ថុជប៉ុន ការនាំចេញរបស់ប្រទេសជប៉ុនក្នុងឆ្នាំ២០២២បានកើនឡើងប្រមាណ១៨%ដែលគិតជាទឹកប្រាក់ គឺកើនដល់ជាង ៧៧០ពាន់លានដុល្លា ខណៈដែលការនាំចូលបានកើនឡើងប្រមាណ ៣៩% គិតជាទឹកប្រាក់ គឺកើនដល់ជាង ៩២០ពាន់លានដុល្លា។
យោងតាមរបាយការណ៍ដដែល ឱនភាពពាណិជ្ជកម្មប្រចាំឆ្នាំរបស់ជប៉ុនក្នុងរយៈ´ពេល២ឆ្នាំជាប់ៗគ្នា គឺមានទំហំច្រើនលើសពីកម្រិតខ្ពស់បំផុត ដែលធ្លាប់បានកត់ត្រាកាលពីឆ្នាំ២០១៤ ដែលកាលនោះឱនភាពពាណិជ្ជកម្មមានចំនួនត្រឹមតែ ៩៩ពាន់លានដុល្លាប៉ុណ្ណោះ។
អត្ថបទគួរអាន
សូមជម្រាបថាការធ្លាក់ចុះនៃតម្លៃប្រាក់យេនចាប់ពីខែតុលាឆ្នាំ២០២២ គឺដោយសារតែធនាគារកណ្តាលជប៉ុនបានអុវត្តគោលនយោបាយបន្ទាបអត្រាការប្រាក់ ក្នុងបំណងជ្រោមជ្រែងសេដ្ឋកិច្ចឡើងវិញ ស្របពេលដែលមានការដំឡើងអត្រាការប្រាក់ទូទាំងពិភពលោកផងនោះ ទើបធ្វើឲ្យរូបិយប័ណ្ណជប៉ុនធ្លាក់ចុះខ្លាំងដល់កម្រិតទាបបើធៀបនឹងប្រាក់ដុល្លារ។
សូមជម្រាបថា ការនាំចូលបានកើនឡើងក្នុងរង្វង់ជាង ៣៩% ដោយសារតែមានការកើនឡើងនៃតម្លៃប្រេងឆៅ ធ្យូងថ្ម និងផលិតផលផ្សេងទៀត។ ដោយឡែក ការនាំចេញយានយន្តបានងើបឡើងក្នុងរង្វង់ជាង ២១% ខណៈដែលការនាំចេញដែកបានកើនឡើងក្នុងរង្វង់ជាង ២៤,២%។
ដោយឡែក ការនាំចេញរបស់ជប៉ុនទៅកាន់ប្រទេសចិនបានកើនឡើង ៥,៧%ប៉ុណ្ណោះ យឺតជាងការនាំចេញទៅកាន់តំបន់អាស៊ាន ដែលមានកំណើនជិត២៥% រីឯការនាំចេញទៅអាមេរិកវិញកើនជាង ២៣% និងការនាំចេញទៅសហភាពអឺរ៉ុបកើនឡើងជាង២២%។ ការនាំចេញរបស់ជប៉ុន ទៅកាន់ទីផ្សារចិន មានកំណើនយឺត ដោយសារតែការអូសបន្លាយនៃគោលនយោបាយសូន្យកូវីតរបស់ទីក្រុងប៉េកាំង៕
អត្ថបទ ៖ សារៀម លក្ខិណា
