ឱនភាពពាណិជ្ជកម្មដែលកំពុងកើនឡើងបង្ហាញពីភាពងាយរងគ្រោះរបស់ប្រទេសដែលមានសេដ្ឋកិច្ចធំទី ៣ របស់ពិភពលោកមួយនេះ ដូចជាការកើនឡើងនៃថ្លៃទំនិញ និងការធ្លាក់ចុះនៃតម្រូវការពីប្រទេសចិន ដែលជាប្រទេសជិត ជាដៃគូពាណិជ្ជកម្មដ៏ធំរបស់ខ្លួន ខណៈដែលសេដ្ឋកិច្ចប្រទេសចិនក៏នៅតែជួបនូវបញ្ហាក្នុងរក្សាសន្ទុះកំណើនឡើងវិញផងដែរ។
ទិន្នន័យរបស់ក្រសួងហិរញ្ញវត្ថុជប៉ុន បានបង្ហាញថា ការនាំចូលទំនិញនៅខែមករាបានកើនឡើងជិត ៤០%បើធៀបទៅនឹងខែមករាឆ្នាំមុន ដែលការនាំចូលនះ បានឈានដល់កម្រិតខ្ពស់បំផុតរហូតដល់ជិត ៧៤ពាន់លានដុល្លារ ពោលគឺការនាំចូលទំនិញមានលើសការនាំចេញជិត ១០% ដែលវានាំឲ្យជប៉ុនមានឱនភាពពាណិជ្ជកម្មនៅខែមករាជិត ២០ពាន់លានដុល្លារ ដែលជាចំនួនដ៏ធំបំផុត គិតចាប់តាំងពីខែមករា ឆ្នាំ ២០១៤។
អត្ថបទគួរអាន
យ៉ាងណាមិញ ជុំវិញបញ្ហានេះ អ្នកជំនាញបាននិយាយថា ការនាំចេញមានទំនោរធ្លាក់ចុះកាលពីខែមករានេះ ដោយសារកត្តាតាមរដូវកាល ដែលអត្រាប្រតិបត្តិការរបស់រោងចក្រជាធម្មតាមានកម្រិតទាប នៅថ្ងៃឈប់សម្រាកចូលឆ្នាំថ្មីចិន ហើយ កត្តាដ៏ធំមួយនៅក្នុងឱនភាពនេះ គឺការធ្លាក់ចុះនៃការនាំចេញរថយន្ត។ ការនាំចេញរថយន្តមានការធ្លាក់ចុះ ក៏ព្រោះតែ ក្រុមហ៊ុនផលិតជាច្រើននៅជប៉ុនត្រូវបានបង្ខំឱ្យបិទរោងចក្រមួយចំនួនជាបណ្ដោះអាសន្ន បន្ទាប់ពីប្រឈមនឹងការរំខាននៃខ្សែចង្វាក់ផ្គត់ផ្គង់ និងសម្ពាធពីការកើនឡើងកំណត់ត្រានៃការឆ្លងជំងឺកូវីដ១៩។ ខណៈការនាំចូលមានការកើនឡើង ដោយសារតែត្រូវបានជំរុញដោយការកើនឡើងនៃការការនាំចូលប្រេង ធ្យូងថ្ម និងឧស្ម័នធម្មជាតិយ៉ាងច្រើន។
ទិន្នន័យរបស់រដ្ឋាភិបាល បានបង្ហាញកាលពីថ្ងៃអង្គារសប្ដាហ៍នេះថា សេដ្ឋកិច្ចរបស់ប្រទេសជប៉ុនបានកើនឡើងតិចជាងការរំពឹងទុកនៅក្នុងត្រីមាសទី ៤ ឆ្នាំ ២០២១ ខណៈការធ្លាក់ចុះនៃករណីឆ្លងមេរោគកូវីដ១៩ក៏បានជួយជំរុញដល់ការប្រើប្រាស់មួយចំនួន។ ទោះយ៉ាងណា ការរំពឹងទុកនេះ ក៏ត្រូវបានប្រឈមនឹងការកើនឡើងនូវមេរោគអូមីក្រុង និងតម្លៃវត្ថុធាតុដើមខ្ពស់ផងដែរ៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
