កាលពីខែមេសាកន្លងទៅ អង្គការណាសាបានផ្ដល់កិច្ចសន្យាដល់ក្រុមហ៊ុន SpaceX របស់មហាសេដ្ឋីអាមេរិក Elon Musk ក្នុងការកសាងប្រព័ន្ធចុះចតនៅឋានព្រះចន្ទ ក្នុងទំហំទឹកប្រាក់ជិត ៣ពាន់លានដុល្លា ស្របពេលដែលក្រុមហ៊ុន Blue Originរបស់មហាសេដ្ឋី Jeff Bezos ក៏បានដាក់សំណើដេញថ្លៃក្នុងគម្រោងនេះដែរ ប៉ុន្ដែត្រូវបានបដិសេធ។ ប្រការនេះបានធ្វើធ្វើឱ្យក្រុមហ៊ុន Blue Origin មិនសុខចិត្តទេ ព្រោះយល់ថា នេះជារឿងអយុត្តិធម៌ និងបានប្ដឹងអង្គការណាសា ទៅកាន់តុលាការអាមេរិក។ នេះបើយោងតាមការចុះរបស់សារព័ត៌មាន BBC។
ក្រុមហ៊ុន Blue Origin បានដាក់ពាក្យបណ្តឹងទៅតុលាការកាលពីថ្ងៃសុក្រដើម្បី ជំទាស់នឹងកិច្ចសន្យាគម្រោងយានអវកាសចុះចតនៅឋានព្រះចន្ទរបស់អង្គការណាសា ដែលផ្តល់ជូនសម្រាប់តែក្រុមហ៊ុនគូប្រជែងរបស់ខ្លួន គឺ SpaceX ខណៈដែលអង្គការណាសាធ្លាប់លើកឡើងក្នុងការរំពឹងថា នឹងអាចផ្ដល់ជូនក្រុមហ៊ុនចំនួនពីរ។ ការផ្ដល់ជូនកិច្ចសន្យាបានសម្រាប់តែក្រុមហ៊ុនតែ១នេះ ត្រូវបានអង្គការណាសា អះអាងថាដោយសារការខ្វះខាតថវិកា។
សូមជម្រាបថា លោក ខេធី ឡឺដឺ (Kathy Lueders) ប្រធានផ្នែកស្រាវជ្រាវរបស់អង្គការណាសាបានឲ្យដឹងថា ថវិកាបច្ចុប្បន្នរបស់ទីភ្នាក់ងារអវកាសត្រូវបានសភាបានផ្តល់ថវិកាត្រឹមតែ ៨៥០ លានដុល្លារ នៃទំហំទឹកប្រាក់សរុប ៣ពាន់៣រយលានដុល្លារ ដែលខ្លួនបានស្នើសុំសម្រាប់គម្រោងចុះចតឋានព្រះចន្ទនេះ។ ប្រការនេះ បានរារាំងដល់ការជ្រើសរើសចំនួនក្រុមហ៊ុនជាដៃគូ និង តម្រូវឲ្យជ្រើសរើសយកតែ១ ក្រុមហ៊ុនប៉ុណ្ណោះ។អត្ថបទគួរអាន
ទន្ទឹមនេះ ដោយសារក្រុមហ៊ុន SpaceX របស់ Elon Musk ចំណាយថ្លៃដើមទាបបំផុត ទើបអង្គការណាសា សម្រេចចិត្តជ្រើសរើសយកក្រុមហ៊ុន SpaceX។ កាលពីខែ កក្កដា លោក Jeff Bezos ក៏បានយល់ព្រមនឹងផ្ដល់ថវិកាប្រមាណ ២ពាន់លានដុល្លារ ដើម្បីទូរទាត់ការចំណាយរបស់អង្គការណាសាដែរ ដើម្បីឲ្យអង្គការនេះចុះកុងត្រាជាមួយខ្លួន ប៉ុន្ដែ ត្រូវបានអង្គការនេះបដិសេធទៅវិញ។
បន្ទាប់ពីដេញថ្លៃចាញ់ SpaceX ក្រុមហ៊ុន Blue Origin បានតវ៉ាប្រឆាំងនឹងការិយាល័យគណនេយ្យភាពរដ្ឋាភិបាលសហរដ្ឋអាមេរិក ដោយចោទប្រកាន់អង្គការណាសាថា មានការសម្រេចចិត្តដោយអយុត្តិធម៌សម្រាប់ក្រុមហ៊ុន Blue Origin។ ជុំវិញបញ្ហាទាំងអស់នេះ បានធ្វើឱ្យមានការប្រឈមមុខដាក់គ្នាយ៉ាងតានតឹងលើកម្មវិធីប្រព័ន្ធចុះចតនៅឋានចន្ទ ដែលមានទឹកប្រាក់រាប់ពាន់លានដុល្លារ របស់ក្រុមហ៊ុនយាន្តអវកាសធំៗទាំងពីររបស់អាមេរិកនេះ៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
