ប្រធានាធិបតីអាមេរិកលោកចូ បៃឌិន លុបចោលបញ្ជារបស់លោកត្រាំ ដែលបានហាមឃាត់កម្មវិធី «TikTok» និង «WeChat» របស់ចិន

បន្ទាប់ពីបញ្ជាឲ្យដកហូត បទបញ្ជារបស់លោត្រាំរួចហើយ លោក ចូ បៃឌិនបានដាក់បញ្ជាថ្មីមួយទៀត ឲ្យការិយាល័យពាណិជ្ជកម្មរបស់សេតវិមានធ្វើការត្រួតពិនិត្យឡើងវិញពីបញ្ហាសន្តិសុខ សុវត្ថិភាពទិន្នន័យដែលបង្កឡើងដោយកម្មវិធីទូរស័ព្ទទាំងពីររបស់ចិននេះគឺកម្មវិធី TikTok និង WeChat បូករួមទាំងកម្មវិធីទូរស័ព្ទរបស់ចិនដទៃទៀតផងដែរ ហើយត្រូវធ្វើការសន្មតថ្មីមួយជុំវិញលទ្ធផលត្រួតពិនិត្យក្នុងរយៈពេល៣ខែក្រោយ។

គួររំឭកថា សហរដ្ឋអាមេរិកក្រោមរដ្ឋការអតីតប្រធានាធិបតីដូណាល់ ត្រាំ ធ្លាប់បានចេញបញ្ជាឲ្យបិទខ្ទប់ ការទាញយកកម្មវិធីទាំងពីរមកប្រើប្រាស់សម្រាប់អ្នកប្រើប្រាស់ថ្មី ហើយថែមទាំងមានបំណងចង់បិទការប្រើប្រាស់ទាំងស្រុងក្នុងសហរដ្ឋអាមេរិកថែមទៀតផង។

គេនៅចាំបានថាកាលនោះ តុលាការអាមេរិកពុំបានសម្រេចឲ្យធ្វើតាមបទបញ្ជាទាំងនោះទេ ដូចនេះហើយ ពុំមានការរាំងខ្ទប់ណាមួយបានកើតឡើងសម្រាប់កម្មវិធីទូរស័ព្ទរបស់ចិនទាំងពីរឡើយ។ 

យ៉ាងណាមិញ បើតាមសេតវិមានអាមេរិក បានឲ្យដឹងដំណើរការស៊ើបអង្កេត និងត្រួតពិនិត្យលើកម្មវិធីទូរស័ព្ទដៃរបស់ចិនបានចាប់ផ្តើមឡើងតាំងពីឆ្នាំ២០១៩មក ហើយគិតមកទល់ពេលនេះ ដំណើរការស៊ើបអង្កេតនៅតែបន្តធ្វើឡើងនៅឡើយ។ ប៉ុន្តែមន្ត្រីជាន់ខ្ពស់ដែលធ្វើការលើរឿងនេះ បានបដិសេធក្នុងការបំភ្លឺបន្ថែមជុំវិញដំណើរការស៊ើបអង្កេតនេះ។

លោក Gao Feng អ្នកនាំពាក្យក្រសួងពាណិជ្ជកម្មចិនបាននិយាយនៅក្នុងសន្និសីទសារព័ត៌មានមួយថា៖ ការសម្រេចរបស់អាមេរិកជាជំហានវិជ្ជមានមួយ ហើយលោកសង្ឃឹមថា អាមេរិកនឹងធ្វើការត្រួតពិនិត្យបញ្ហានេះឡើងវិញឲ្យបានគ្រប់ជ្រុងជ្រោយ កុំឲ្យមានរឿងអយុត្តិធម៌សម្រាប់ក្រុមហ៊ុនចិននៅអាមេរិក និងជៀសវាងការយកបញ្ហាសេដ្ឋកិច្ចពាណិជ្ជកម្មជាហេតុផលនយោបាយ។

សូមបញ្ជាក់ថា នៅសហរដ្ឋអាមេរិក កម្មវិធីទូរស័ព្ទដៃរបស់ចិន WeChat មានការទាញយកមកប្រើប្រាស់ជាង១៩លានដង ខណៈដែលមានអ្នកប្រើ TikTok មានដល់ទៅជាង ១០០លាននាក់ ៕