ស្ករត្នោតកំពង់ស្ពឺមានទីផ្សារល្អនៅឆ្នាំនេះ តែថយចុះចំនួនអ្នកឡើងត្នោត

លោក វី វាសនា បុគ្គលិកជំនួយការសមាគមស្ករត្នោតកំពង់ស្ពឺបានប្រាប់ខេមបូណូមីសថា ឆ្នាំនេះស្ករត្នោតកំពង់ស្ពឺប្រមូលបានក្នុងបរិមាណ២៥៧តោនប៉ុណ្ណោះ ខណៈកាលពីឆ្នាំមុនមានចំនួន២៥៩តោន ថយចុះចំនួន២តោន។ តែយ៉ាងណា ការផ្គត់ផ្គង់ស្ករត្នោតកំពង់ស្ពឺមិនមានអ្វីជាបញ្ហាចោទនោះទេ។

លោក វី វាសនា បានគូសបញ្ជាក់ទៀតថា ស្របពេលការផលិតថយចុះ តែស្ករត្នោតកំពង់ស្ពឺឆ្នាំនេះមានតម្រូវការខ្ពស់មែនទែន បើធៀបនឹងឆ្នាំកន្លងមក។ ហើយទីផ្សារទៀតសោតក៏មានភាពទូលំទូលាយផងដែរ ជាក់ស្តែងនៅឆ្នាំនេះ ស្ករត្នោតកំពង់ស្ពឺ ត្រូវបាននាំចេញទៅកាន់ទីផ្សារអន្តរជាតិប្រមាណ២០ប្រទេស ភាគច្រើននាំចេញទៅទីផ្សារអឺរ៉ុប។ 

ទន្ទឹមនឹងនេះ លោក វី វាសនា ក៏បានលើកឡើងពីបញ្ហាប្រឈម ដែលខាងសមាគមស្ករត្នោតកំពង់ស្ពឺបានជួបប្រទះនៅឆ្នាំនេះផងដែរ។ បញ្ហាប្រឈមដែល លោក បានលើកឡើង គឺនៅឆ្នាំនេះចំនួនអ្នកឡើងត្នោតមានការថយចុះ ដ្បិតអ្នកឡើងត្នោតមួយចំនួនបានផ្លាស់ប្តូរការងារថ្មី និងមួយចំនួនបានបោះបង់ការងានេះ ដោយសារមានវ័យច្រើនពេកឡើងដើមត្នោតលែងរួចជាដើម។ ប៉ុន្តែលោក វាសនា អះអាងថា ការឡើងចុះចំនួនអ្នកឡើងត្នោត វារឿងធម្មតាប៉ុណ្ណោះ។

សូមបញ្ជាក់ថា ស្ករត្នោតកំពង់ស្ពឺចប់ផ្តើមប្រមូលផលពីខែវិច្ឆិកា ដល់ខែឧសភា ដោយស្ករត្នោតនេះមាន៤ប្រភេទ រួមមានស្ករពាង ស្ករផែន ស្ករល្ង និងស្ករម្សៅ(ស្ករហ៊ុយ)។ ក្នុងនោះ ស្ករពាងមានតម្លៃចន្លោះពី៥ទៅ៦ពាន់រៀលក្នុង១គីឡូក្រាម ខណៈស្ករម្សៅចន្លោះពី៦ទៅ៧ពាន់រៀល រីឯស្ករផែនតម្លៃចន្លោះពី៨ទៅ៩ពាន់រៀល ក្នុងមួយគីឡូក្រាម៕