លោកស្រី គីម យ៉ូជុង (Kim Yo Jong) ជាប្អូនស្រីបង្កើតរបស់មេដឹកនាំកូរ៉េខាងជើងលោក គីម ជុងអ៊ុន (Kim Jong Un) បាននិយាយក្នុងសេចក្តីថ្លែងការណ៍ថា ការលើកឡើងរបស់រដ្ឋមន្ត្រីការពារជាតិកូរ៉េខាងត្បូងនេះ«កាន់តែធ្វើឱ្យទំនាក់ទំនងរវាងប្រទេសទាំងពីរកូរ៉េ និងភាពតានតឹងផ្នែកយោធានៅឧបទ្វីបកូរ៉េ កាន់តែអាក្រក់ទៅៗ»។ នេះបើយោងតាមទីភ្នាក់ងារសារព័ត៌មានរដ្ឋKCNA។
ការអះអាងរបស់កូរ៉េខាងជើងនេះ បានកើតឡើងបន្ទាប់ពីរដ្ឋមន្ត្រីកូរ៉េខាងត្បូងលោក ស៊ូ វូក (Suh Wook) បាននិយាយពីថ្ងៃសុក្រថា យោធាកូរ៉េខាងត្បូងមានកាំជ្រួចជាច្រើនប្រភេទដែលអាចបាញ់បានកាន់តែឆ្ងាយ ត្រឹមត្រូវ និងមានថាមពលខ្លាំងប្រកបដោយ«សមត្ថភាពក្នុងការវាយលុកចំគោលដៅនៅក្នុងប្រទេសកូរ៉េខាងជើងបានយ៉ាងត្រឹមត្រូវ និងរហ័សជាទីបំផុត»។
លោក ស៊ូ ក៏បាននិយាយផងដែរថា ក្រសួងការពារជាតិកូរ៉េខាងត្បូងនឹងគាំទ្រយ៉ាងសកម្មដល់ វិស័យយោធាដើម្បីធានាថា ខ្លួនមានសមត្ថភាពឆ្លើយតបយ៉ាងលើសលប់ចំពោះការគំរាមកំហែងមីស៊ីលរបស់កូរ៉េខាងជើងដែលលោក ស៊ូ បានហៅថាជា«សត្រូវ»របស់ខ្លួន។
លោកស្រី គីម យ៉ូជុង ដែលជាអនុប្រធាននាយកដ្ឋាននៃគណៈកម្មាធិការកណ្តាលគណបក្សពលករកូរ៉េបាននិយាយថា ប្រទេសកូរ៉េខាងជើងនឹង«ពិចារណាឡើងវិញនូវរឿងជាច្រើន» ហើយថា កូរ៉េខាងត្បូង«អាចប្រឈមមុខនឹងការគំរាមកំហែងយ៉ាងធ្ងន់ធ្ងរ»ដោយសារតែការកត់សម្គាល់របស់ខ្លួនបែបនេះ។
នៅក្នុងសេចក្តីថ្លែងការណ៍ដាច់ឡែកមួយទៀតកាលពីថ្ងៃអាទិត្យ លោក ប៉ាក ជុងឆុន (Pak Jong Chon) លេខាធិការគណៈកម្មាធិការកណ្តាលនៃគណបក្សពលករកូរ៉េ បាននិយាយថា កូរ៉េខាងជើង«នឹងដឹកនាំកម្លាំងយោធាទាំងអស់របស់ខ្លួនដោយគ្មានមេត្តាក្នុងការបំផ្លាញគោលដៅសំខាន់ៗនៅទីក្រុងសេអ៊ូល និងកងទ័ពកូរ៉េខាងត្បូង»ប្រសិនបើកងទ័ពកូរ៉េខាងត្បូងហ៊ានធ្វើសកម្មភាពយោធាដ៏គ្រោះថ្នាក់ ដូចជាការវាយប្រហារទៅលើកូរ៉េខាងជើងមុនជាដើម។
អត្ថបទគួរអាន
ទោះយ៉ាងណាប្រទេសកូរ៉េខាងជើងមិនបានបញ្ជាក់ពីទីកន្លែងណាខ្លះ ដែលខ្លួនបានចាត់ទុកថាជាគោលដៅសំខាន់នៅក្នុងរដ្ឋធានីសេអ៊ូលនោះទេ។
ភាពតានតឹងនៅក្នុងឧបទ្វីបកូរ៉េបានកើនឡើងយ៉ាងខ្លាំងនៅក្នុងប៉ុន្មានសប្តាហ៍ថ្មីៗនេះបន្ទាប់ពីប្រទេសកូរ៉េខាងជើងបានសាកល្បងកាំជ្រួចផ្លោងចំនួន២កាលពីថ្ងៃទី២៦ ខែកុម្ភៈ និងថ្ងៃទី០៤ ខែមីនាដែលពាក់ព័ន្ធនឹងប្រព័ន្ធមីស៊ីល ICBM ស៊េរីថ្មី ដែលប្រទេសនេះកំពុងអភិវឌ្ឍ និងបានធ្វើតេស្តមីស៊ីល ICBM ពេញលេញជាលើកដំបូងតាំងពីឆ្នាំ២០១៧មក។
បន្ទាប់ពីការសាកល្បងនេះហើយ សហរដ្ឋអាមេរិកកាលពីថ្ងៃសុក្របានដាក់ទណ្ឌកម្មលើស្ថាប័នចំនួន ៥ ដែលអាមេរិកបានចោទប្រកាន់ថា បានផ្តល់ការគាំទ្រដល់ការអភិវឌ្ឍអាវុធប្រល័យលោក និងកម្មវិធីមីស៊ីលផ្លោងរបស់ប្រទេសកូរ៉េខាងជើងផងដែរ៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
