កម្ពុជាទិញវ៉ាក់សាំងចិន Sinovac ចំនួន ១,៥លានដូសទៀតនឹងមកដល់នៅថ្ងៃទី២៦មីនានេះ

ស្របពេលការឆ្លងជំងឺកូវីដ-១៩ នៅតែបន្តរីករាលខ្លាំងនៅតាមតំបន់មួយចំនួនជាពិសេសរាជធានីភ្នំពេញ កណ្តាល និងខេត្តព្រះសីហនុកម្ពុជាបានបញ្ជាទិញវ៉ាក់សាំងកូវីដ-១៩ ប្រភេទ Sinovac ចំនួន១,៥លានដូសពីប្រទេសចិន ដើម្បីចាក់ជូនពលរដ្ឋនៅតាមតំបន់ ដែលរងការរីករាលដាលខ្លាំងពីជំងឺកូវីដ-១៩។ 

សម្តេចតេជោនាយករដ្ឋមន្ត្រី ហ៊ុន សែន បានបញ្ជាក់ថា ភាគីចិនបានជូនដំណឹងមកកម្ពុជាថា វ៉ាក់សាំងកូវីដ-១៩ ដែលកម្ពុជាបញ្ជាទិញពីខ្លួននឹងដល់នៅចុងខែមីនា ឆ្នាំ២០២១ ខាងមុខនេះ។

សម្តេច ហ៊ុន សែន បានបញ្ជាក់ក្នុងការថ្លែងសារពិសេសយ៉ាងដូច្នេះថា៖«ក្នុងពេលដែលជំងឺរាតត្បាតនៅទីក្រុងភ្នំពេញធ្ងន់ធ្ងរ ហើយនៅក្នុងពេលខាងមុខនេះ បើគ្មានការផ្លាស់ប្តូរទេ វ៉ាក់សាំង Sinovac នឹងមកដល់កម្ពុជានៅថ្ងៃទី២៦ ខែមីនា នេះបើតាមការជូនដំណឹងពីភាគីមិត្តចិន ដែលយើងបានទិញ Sinovac ចំនួន១លាន៥សែនដូស»។

ទន្ទឹមនឹងនេះសម្តេច ហ៊ុន សែន រំពឹងថា វ៉ាក់សាំងកូវីដ-១៩ ប្រភេទ Sinopharm ចំនួន៤០ម៉ឺនដូស ដែលជាជំនួយរបស់ចិនក្នុងដំណាក់កាលទី២ នឹងមកដល់នៅមុនថ្ងៃបុណ្យចូលឆ្នាំថ្មីប្រពៃណីខ្មែរ។

សម្តេចបានបន្ថែមថា៖«ខ្ញុំសូមគូសបញ្ជាក់អំពី​អាទិភាពនៃការប្រើប្រាស់ AstraZeneca ដែលយើងត្រូវប្រមូលផ្តុំចាក់សម្រាប់អ្នកដែលមានអាយុ​លើសពី ៦០ឆ្នាំឡើង។ ប៉ុន្តែក្នុងរយៈពេលកន្លងមកនេះ នៅតាមមន្ទីរពេទ្យមួយចំនួនក្នុងរាជធានីភ្នំពេញ ក៏បានផ្តល់ឲ្យអ្នកមានអាយុក្រោម ៦០ឆ្នាំបានចាក់ AstraZeneca ផងដែរ ដែលបញ្ហានេះធ្វើឲ្យខុសជាមួយគោលនយោបាយវ៉ាក់សាំងរបស់រាជរដ្ឋាភិបាល»។

សម្តេច ស្នើឲ្យមន្ទីរពេទ្យមួយចំនួននៅក្នុងរាជធានីភ្នំពេញ ដែលយកវ៉ាក់សាំងកូវីដ-១៩ ប្រភេទ AstraZeneca ចាក់ឲ្យអ្នកមានអាយុក្រោម​៦០ឆ្នាំ ផ្អាកការចាក់ជាបណ្តោះអាសន្ន។ បច្ចុប្បន្នកម្ពុជានៅសល់​វ៉ាក់សាំងកូវីដ-១៩ Astra Zeneca ជាង១០ម៉ឺនដូស ដែលអាចចាក់ឲ្យពលរដ្ឋបានចំនួនជាង៥ម៉ឺននាក់។

ជាមួយគ្នានេះ សម្តេច ជំរុញឲ្យលោកជំទាវ ឱ វណ្ណឌីន ប្រធានគណៈកម្មការ​ចំពោះ​កិច្ចចាក់វ៉ាក់សាំងកូវីដ-១៩ នៅទូទាំងប្រទេស ដែលបង្កើតឡើងថ្មីៗ រួមជាមួយឯកឧត្តម ឃួង ស្រេង អភិបាលរាជធានីភ្នំពេញ ចាត់ចែងរៀបចំចាក់សាំងកូវីដ-១៩ AstraZeneca ដែលនៅសល់​ដល់ពលរដ្ឋរស់នៅរាជធានីភ្នំពេញ ដែលមានអាយុចាប់ពី៦០ឆ្នាំឡើងទៅ៕