ជាក់ស្ដែង នៅក្នុងឆ្នាំ២០២២ កន្លងទៅ អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ បានប្រមូលចំណូលពន្ធដារផ្ទៃក្នុងជូនរដ្ឋបានគ្រប់និងលើសផែនការដែលកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ ចំនួន១២២,៥៤% ស្មើនឹង ៦៣៥លានដុល្លារ ដែលជាកំណត់ត្រាចំណូលពន្ធលើសផែនការច្រើនជាងគេរបស់កម្ពុជា។
យោងតាមលិខិតរបស់សម្ដេច ហ៊ុន សែន នៅថ្ងៃទី១ ខែកុម្ភៈ ឆ្នាំ២០២៣ ផ្ញើជូនអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ សម្ដេច ហ៊ុន សែន នាយករដ្ឋមន្រ្តីនៃកម្ពុជា បានសម្តែងនូវការកោតសរសើរ ជូនឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្តី និងជាប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដា្ឋនពន្ធដារ ព្រមទាំងមន្ត្រីរាជការ នៃអគ្គនាយកដ្ឋានពន្ធដារនៃក្រសួងសេដ្ឋកិច្ចនិងហិរញ្ញវត្ថុ ទាំងអស់ចំពោះការខិតខំ ក្នុងការបំពេញបេសកកម្មដោយជោគជ័យ។ ដ្បិតថា នៅឆ្នាំ២០២១ និងឆ្នាំ២០២២ ជារយៈពេលដែលកម្ពុជា ស្ថិតក្នុងស្ថានភាពលំបាកដោយសារការរាតត្បាតជំងឺកូវីដ១៩ តែអគ្គនាយកដ្ឋានពន្ធដារ បានប្រមូលចំណូលពន្ធដារផ្ទៃក្នុងជូនរដ្ឋបានគ្រប់ និងលើសផែនការដែលកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២១ និង២០២២។ ជាក់ស្ដែង កាលពីឆ្នាំ២០២១ អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ បានប្រមូលចំណូលពន្ធដារផ្ទៃក្នុងជូនរដ្ឋលើសផែនការកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២១ ចំនួន ១២៤,០២% នៃផែនការប្រចាំឆ្នាំ។ ដោយឡែក សម្រាប់ឆ្នាំ២០២២ ដែលទើបតែបញ្ចប់ថ្មីៗនេះវិញ អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ បានប្រមូលចំណូលពន្ធដារផ្ទៃក្នុងជូនរដ្ឋបានគ្រប់និងលើសផែនការដែលកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ ចំនួន ១២២,៥៤%។
អត្ថបទគួរអាន
សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានចាត់ទុកការប្រមូលចំណូលលើសផែនការរបស់អគ្គនាយកដ្ឋានពន្ធដារ គឺជាលទ្ធផលគួរឲ្យស្ញប់ស្ញែង និងជាសមិទ្ធផលដ៏ធំធេងសម្រាប់ជាតិ និងប្រជាជនកម្ពុជា ក្នុងគ្រាដ៏លំបាក ស្របពេលដែលកម្ពុជាបានជួបប្រទះនូវបញ្ហាប្រឈមជាបន្តបន្ទាប់ ដូចជា ការរីករាលដាលនៃជំងឺកូវីដ-១៩, ភាពតានតឹងភូមិសាស្ត្រនយោបាយសាកល, ការកើនឡើងសម្ពាធអតិផរណា, និងផលប៉ះពាល់ពីសង្គ្រាម និងគោលនយោបាយបរទេស ជាដើម។ សមិទ្ធផលគួរជាទីមោទនៈនេះ បានចូលរួមចំណែកយ៉ាងសំខាន់ក្នុងការជួយគាំទ្រដល់សេដ្ឋកិច្ចជាតិ និងជីវភាពប្រជាជន ក្នុងអំឡុងពេលដែលសេដ្ឋកិច្ចសកលលោក ក៏ដូចជាសេដ្ឋកិច្ចកម្ពុជា បាននិងកំពុងជួបនឹងវិបត្តិ និងភាពមិនប្រាកដប្រជាច្រើន។
បើតាមការបញ្ជាក់របស់សម្ដេច ហ៊ុន សែន នាយករដ្ឋមន្រ្តីនៃកម្ពុជា កាលពីពេលថ្មីៗ ក្នុងរយៈពេលពេញ១ឆ្នាំ២០២២ កម្ពុជា ទទួលបានថវិកាជាតិសរុបជាង ៦ពាន់លានដុល្លារ ឬស្មើនឹង ១២៧% នៃផែនការច្បាប់ដែលបានកំណត់។ ក្នុងនោះ ថវិកាដែលទទួលបានពីការប្រមូលចំណូលរបស់អគ្គនាយកដ្ឋានពន្ធដារ មានជាង ៣ពាន់លានដុល្លារ ស្មើនឹងជាង១២២%នៃច្បាប់ថវិកាឆ្នាំ២០២២។ ចំណែកឯ ថវិកាដែលប្រមូលបានពីអគ្គនាយកដ្ឋានគយ និងរដ្ឋាករកម្ពុជា មានជាង ២ពាន់លានដុល្លារ ស្មើនឹងជិត១០៥%នៃច្បាប់ថវិកាសម្រាប់២០២២៕
