នៅក្នុងសេចក្តីប្រកាសព័ត៌មានដដែលបានបញ្ជាក់ទៀតថា ជំងឺឆ្លងរាលដាលជ្រូក ដែលក្រសួងបានរកឃើញនោះរួមមានដូចជា ជំងឺជ្រូកត្រចៀកខៀវ ជំងឺអុតក្តាម ជំងឺប៉េស្តជ្រូក ជំងឺប្រូស៊ែឡុស៊ីស និងជំងឺប៉េស្តជ្រូកអាហ្រ្វិកជាដើម ដែលកំពុងដែលតែរីករាលដាលនៅប្រទេសជិតខាងកម្ពុជា ដោយជំងឺទាំងនេះ អាចបង្កគ្រោះមហន្តរាយដល់ផលិតកម្មជ្រូក និងទីផ្សារសាច់-សត្វរបស់កម្ពុជាបាន។
ហើយចំពោះមូលហេតុ ដែលក្រសួងមិនទាន់អនុញ្ញាតឲ្យក្រុមហ៊ុនថៃ JET CAPITAL COMPANY LIMITED អាចនាំចូលជ្រូកមកកាន់ទីផ្សារកម្ពុជាបាន ដោយសារតែក្រុមហ៊ុននេះ មិនទាន់បានបំពេញលក្ខខណ្ឌតម្រូវ ក្នុងការនាំជ្រូកមកផ្គត់ផ្គង់នៅកម្ពុជាដូចជា ការរៀបចំកន្លែងចត្តាឡីស័កជ្រូកមិនទាន់បានត្រឹមត្រូវ និងមិនទាន់មានឆ្លើយតបច្បាស់លាស់ពីនាយកដ្ឋានអភិវឌ្ឍន៍ការចិញ្ចឹមសត្វរបស់ថៃនៅឡើយដែរ។
អត្ថបទទាក់ទង!
គួររម្លឹកថា កាលពីថ្ងៃទី២៣ ខែកុម្ភៈ ឆ្នាំ២០២១ ក្រុមហ៊ុនថៃខាងលើនេះ បានស្នើសុំការអន្តរាគម ពីសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ជុំវិញការមិនអនុញ្ញាតឲ្យនាំជ្រូកចូលពីសំណាក់អគ្គនាយកដ្ឋានសុខភាពសត្វ និងផលិតកម្មសត្វ ដោយបាន លើកឡើងថា ក្រុមហ៊ុនរបស់ខ្លួន មានសម្បទាពេញលេញស្របច្បាប់ និងធ្លាប់មានបទពិសោធន៍គ្រប់គ្រាន់ ក្នុងការផ្គត់ផ្គង់សត្វជ្រូករស់នៅក្នុងប្រទេសថៃ ។
ក្រុមហ៊ុននេះ អះអាងថា អគ្គនាយកដ្ឋានផលិតកម្មសត្វ និងសុខភាពសត្វរបស់កម្ពុជា បានកំណត់យកក្រុមហ៊ុនផ្គត់ផ្គង់នៅក្នុងប្រទេសថៃ ចំនួន៥ក្រុមហ៊ុន និងនៅថ្ងៃទី១៨ ខែធ្នូ ឆ្នាំ ២០២០ បានជ្រើសរើសចំនួន ៥ក្រុមហ៊ុនទៀត សរុបមានចំនួន១០ក្រុមហ៊ុន ប៉ុន្តែជាក់ស្តែងបច្ចុប្បន្ននេះ ការផ្គត់ផ្គង់សត្វជ្រូកចេញពីប្រទេសថៃ មានតែ២ ទៅ៣ក្រុមហ៊ុនប៉ុណ្ណោះ ចំពោះ០៧ក្រុមហ៊ុនដទៃទៀត គឺមានតែឈ្មោះពុំដែលបានផ្គត់ផ្គង់ឡើយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
