លោក ឡុង សុភ័ក្ត្រ ៖ "រក្សាទំនាក់ទំនងជាមួយអតិថិជនគឺជារឿងសំខាន់"ក្នុងបរិបទកូវីដ-១៩"

ដោយសារតែឥទ្ធិពលពីជំងឺ Covid-19 ពួកយើងត្រូវគោរពតាមគោលការណ៍រក្សាគម្លាតសង្គម តម្រូវឲ្យឃ្លាតពីគ្នា និងមិនអាចប្រាស្រ័យទាក់ទងគ្នាងាយស្រួលដូចមុនបាន ដែលនេះជាមូលហេតុដ៏ធំមួយក្នុងការធ្វើឲ្យអាជីវកម្មជួបនឹងការលំបាក ។

តាមការដកស្រង់ ជាមធ្យម Covid-19 បានធ្វើឲ្យអាជីវកម្មមួយចំនួនធំត្រូវបានប្រឈមមុខនឹងបញ្ហាជាច្រើន ដូចជា ខាតបង់អតិថិជន ពិបាកក្នុងការធ្វើទីផ្សារ បាត់បង់ប្រាក់ចំណូល និងអាចឈានទៅដល់ការបិទទ្វារអាជីវកម្មទៀតផង ។

ក្នុងកាលទេសៈនេះ ម្ចាស់អាជីវកម្មភាគច្រើនបានខិតខំពុះពារគ្រប់បែបយ៉ាងដោយគ្រាន់តែសង្ឃឹមថា អាចនឹងឆ្លងកាត់ដំណាក់កាលដ៏លំបាកមួយនេះតែប៉ុណ្ណោះ ។ អាស្រ័យហេតុនេះហើយ ម្ចាស់អាជីវកម្មនីមួយៗបានរិះរកវិធីសាស្រ្តថ្មីៗ ក្នុងការលក់ ការធ្វើទីផ្សារ និងជាពិសេស គឺការសម្របខ្លួនទៅនឹងបរិបទសម័យកាល Covid-19 នេះ ដោយរៀនទទួលយកនូវបទពិសោធន៍និងបច្ចេកវិទ្យាថ្មីៗ ដែលអាចជួយដល់អាជីវកម្មរបស់ពួកគាត់ ហើយស័ក្តិសមទៅនឹងប្រភេទអាជីវកម្មរបស់គាត់ទៀតផង ។

សេវាកម្មដឹកជញ្ជូនដោយកុំម្មង់តាមរយៈ App ទូរសព្ទដៃ

លើសពីនេះទៅទៀត អាជីវកម្មមួយចំនួនបានផ្លាស់ប្តូរពីការលក់តាមផ្ទះ មកជាការលក់បែបឌីជីថល (Digital) ដោយសហការជាមួយក្រុមហ៊ុនដែលមានសេវាកម្មដឹកជញ្ជូន ដូចជា “Food Panda” ឬ “Nham 24” ដើម្បីអាចជួយពង្រឹងការលក់និងនាំផលិតផលរបស់គាត់ទៅកាន់អតិថិជនចាស់ និងថ្មី បូកផ្សំជាមួយនឹងការប្រើប្រាស់បច្ចេកវិទ្យាផ្សេងៗ ដើម្បីផ្សារភ្ជាប់ទំនាក់ទំនងជាមួយអតិថិជនដូចជាការប្រើប្រាស់ Telegram Channel និង Facebook Page ជាដើម ។

បើតាមលោក ឡុង សុភ័ក្ត្រ នាយកប្រត្តិបត្តិក្រុមហ៊ុន SL SUPPLIER Co., Ltd ហើយក៏ជាម្ចាស់ពានរង្វាន់សហគ្រិនវ័យក្មេងឆ្នើមផ្នែកអាជីវកម្មទើបបង្កើតថ្មី នាឆ្នាំ២០១៩ បានបញ្ជាក់ថា ៖ “ក្នុងពេលវេលានេះ ការរក្សាការទំនាក់ទំនងជាមួយអតិថិជនគឺជារឿងចាំបាច់បំផុតដែលម្ចាស់អាជីវកម្មគ្រប់រូបគួរតែយកចិត្តទុកដាក់ ។ Covid-19 បានធ្វើឲ្យយើងឃ្លាតពីគ្នាមួយកម្រិតហើយ ប៉ុន្តែ ប្រសិនបើម្ចាស់អាជីវកម្មទាំងអស់មិនស្វះស្វែងក្នុងការរកវិធីសាស្ត្រថ្មីណាមួយដើម្បីនិយាយទៅកាន់អតិថិជនខ្លួននៅក្នុងដំណាក់កាលនេះទេ អតិថិជននឹងកាន់តែឃ្លាតពីយើងទៅមួយកម្រិតទៀតហើយ។ កាលណាដែលអាជីវកម្មមួយមិនអាចបន្តក្នុងការប្រាស្រ័យទាក់ទងជាមួយភ្ញៀវបាន អាជីវកម្មនោះនឹងពិបាកឈរជើងក្នុងបរិបទ Covid នេះ ជាក់ជាមិនខាន ”។

ការរក្សាទំនាក់ទំនងជាមួយអតិថិជនគឺជារឿងសំខាន់"ក្នុងបរិបទកូវីដ-១៩"

យ៉ាងណាមិញ ជំងឺ Covid-19 រីករាលដាលគឺស្របពេលបច្ចេកវិទ្យាកំពុងរីកលូតលាស់ ហើយបើតាមការសង្កេតឃើញថា មនុស្សជាមធ្យមក្នុងប្រទេសកម្ពុជា អាចមានលទ្ធភាពល្មមក្នុងការប្រើប្រាស់ Internet ជាប្រចាំបាន ដែលជាកត្តាដ៏សំខាន់ជួយឲ្យម្ចាស់អាជីវកម្ម និងអតិថិជនមានការប្រាស្រ័យទាក់ទងគ្នាតាមបែបឌីជីថល (Digital) បានយ៉ាងងាយស្រួល ។

ដោយឡែកជាអ្នកជំនាញនៅក្នុងវិស័យ Premium Gifts ស្រាប់ លោក សុភ័ក្ត្រ បានបន្តថា សម្រាប់អតិថិជនរបស់គាត់មួយចំនួនធំមានភាពឆ្លាតវ័យយ៉ាងខ្លាំងក្នុងការប្រើប្រាស់សម្ភារៈ និងវត្ថុអនុស្សាវរីយ៍ដែលមាន logo របស់គាត់ (Premium Gifts) ដើម្បីអាចរក្សាទំនាក់ទំនងជាមួយអតិថិជនរបស់គាត់ ។ ក្រុមហ៊ុនខ្លះបានប្រើ Premium Gifts សម្រាប់ Give away, ធ្វើប្រ៉ូម៉ូសិន និងក្រុមហ៊ុនខ្លះទៀតប្រើសម្រាប់ជួយទៅដល់ការលក់ផងដែរ ។

លោកបានបន្ថែមទៀតថា សម្ភារៈទាំងនេះមិនត្រឹមតែអាចឲ្យអតិថិជនថ្មីមានឱកាសស្គាល់អាជីវកម្មរបស់គាត់នោះទេ ប៉ុន្តែ វាអាចជួយរំឭកការចងចាំរបស់អតិថិជនចាស់ បើទោះបីជាពួកគេខានទិញ ឬក៏ប្រើប្រាស់សេវាកម្មរបស់គាត់យូរយ៉ាងណាក្តី ។