នាសន្និសីទជាតិស្តីពីទីផ្សារមូលបត្រកម្ពុជាក្រោមប្រធានបទ«១ទសវត្សរ៍នៃការអភិវឌ្ឍទីផ្សារមូលបត្រកម្ពុជា និងដំណើរឆ្ពោះទៅមុខ»នៅថ្ងៃទី១៦ ឧសភា ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានវាយតម្លៃខ្ពស់ចំពោះភាពរីកចម្រើននៃទីផ្សារមូលបត្រកម្ពុជានាពេលកន្លងមក និងការប្តេជ្ញាចិត្តរបស់ថ្នាក់ដឹកនាំផ្សារមូលបត្រ និងនិយ័តករមូលបត្រកម្ពុជាក្នុងការអភិវឌ្ឍវិស័យមួយនេះនៅថ្ងៃអនាគត។ ដើម្បីចូលរួមចំណែកអភិវឌ្ឍន៍ទីផ្សារមូលបត្រកម្ពុជា ឯកឧត្តមអគ្គបណ្ឌិតសភាចារ្យ បានដាក់ចេញនូវយុទ្ធសាស្ត្រ៣ចំណុច ដែលសំដៅដល់ការពន្លឿន និងពង្រីកការអភិវឌ្ឍទីផ្សារមូលបត្រកម្ពុជាឲ្យកាន់តែរីកចម្រើនបន្ថែមទៀត។
ក្នុងចំណោមយុទ្ធសាស្ត្រទាំងនោះ គឺថ្នាក់ដឹកនាំក្រសួងសេដ្ឋកិច្ច និងហិរញ្ញវត្ថុ ជំរុញឲ្យថ្នាក់ដឹកនាំផ្សារមូលបត្រកម្ពុជាបង្កើនការផ្សព្វផ្សាយពីអត្ថប្រយោជន៍ ដែលក្រុមហ៊ុន និងអ្នកវិនិយោគនឹងទទួលបានពីការចូលរួមជួញដូរក្នុងទីផ្សារភាគហ៊ុន ក៏ដូចជាចាប់យកកាលានុវត្តភាពនៃប្រព័ន្ធបច្ចេកវិទ្យាថ្មីៗក្នុងការអភិវឌ្ឍផ្សារមូលបត្រកម្ពុជា ដើម្បីឆ្លើយតបនឹងការរីកចម្រើននៃប្រព័ន្ធបច្ចេកវិទ្យានាពេលបច្ចុប្បន្ន និងទៅអនាគត។ មួយវិញទៀត ថ្នាក់ដឹកនាំក្រសួង ជំរុញមានការរៀបចំផែនការយុទ្ធសាស្ត្រ១០ឆ្នាំបន្ទាប់ក្នុងការអភិវឌ្ឍទីផ្សារមូលបត្រកម្ពុជា។
ទោះយ៉ាងណា ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានគូសបញ្ជាក់ថា ដើម្បីអភិវឌ្ឍផ្សារមូលបត្រកម្ពុជាឲ្យកាន់តែមានភាពរីកចម្រើន គឺវាទាមទារពេលវេលា និងការចូលរួមសហការពីគ្រប់ភាគពាក់ព័ន្ធទាំងវិស័យរដ្ឋ និងឯកជន។ ជាមួយគ្នានេះឯកឧត្តមឧបនាយករដ្ឋមន្ត្រីស្នើឲ្យឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលផ្សារមូលបត្រកម្ពុជា និងឯកឧត្តម រស់ ស៊ីលវ៉ា រដ្ឋលេខាធិការក្រសួងសេដ្ឋកិច្ច ធ្វើការជាមួយភាគីពាក់ព័ន្ធ និងខិតខំរៀបចំគោលនយោបាយយុទ្ធសាស្ត្រ ឲ្យបានឆាប់រហ័សជាមួយចំណុចយុទ្ធសាស្ត្រ និងវិធានការគន្លឹះក៏ដូចជាផែនការសកម្មភាពចាំបាច់នានា ដែលវានឹងក្លាយជាឧបករណ៍ដ៏មានសារសំខាន់មួយទៀតសម្រាប់អភិវឌ្ឍន៍វិស័យហិរញ្ញវត្ថុ និងផ្សារមូលបត្រកម្ពុជា។
អត្ថបទគួរអាន
ទន្ទឹមនឹងនេះឯកឧត្តម ស៊ូ សុជាតិ ប្រតិភូរាជរដ្ឋាភិបាល ទទួលបន្ទុកជាអគ្គនាយកនិ យ័តករមូលបត្រកម្ពុជាបានបង្ហាញពីផែនការរបស់និយ័តករមូលបត្រ ក្នុងការរួមចំណែកធ្វើឲ្យប្រសើរឡើងនូវទីផ្សារមូលបត្រកម្ពុជា តាមរយៈគម្រោងដាក់ឲ្យដំណើរការទីផ្សារគម្រោងវិនិយោគរួមក្នុងរយៈពេលដ៏ខ្លីខាងមុខនេះ។ បន្ថែមលើនេះនិយ័តករមូលបត្រកម្ពុជា ក៏កំពុងសម្លឹងមើលក្នុងការជំរុញការបោះផ្សាយលក់សញ្ញាបណ្ណ ឬបណ្ណបំណុលឲ្យស្របតាមនិន្នាការថ្មីៗរបស់ពិភពលោកផងដែរ។
ជាមួយគ្នានេះ ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជាបានអះអាងថា ក្រោយដាក់ឲ្យដំណើរការក្នុងរយៈពេល១ទសវត្សរ៍កន្លងមកនេះផ្សារមូលបត្រកម្ពុជាមានការរីកចម្រើនជាបន្តបន្ទាប់ ជាមួយក្រុមហ៊ុនចុះបញ្ជីដំបូង១កើនដល់១៦ក្រុមហ៊ុននាពេលបច្ចុប្បន្ន។ ឯកឧត្តមបានបន្តថា ចាប់ពីដាក់ឲ្យដំណើរការដល់ឆ្នាំ២០១៨ ទំហំជួយដូរក្នុងទីផ្សារមូលបត្រកម្ពុជាខ្ពស់បំផុតមានត្រឹមជាង២ម៉ឺនដុល្លារក្នុង១ថ្ងៃ ហើយបានកើនឡើងជាមធ្យមដល់១៦ម៉ឺនដុល្លារក្នុង១ថ្ងៃនៅឆ្នាំ២០១៩។ នៅឆ្នាំ២០២១ ការជួញដូរបានកើនឡើងជាធម្យមដល់២៧ម៉ឺនដុល្លារក្នុង១ថ្ងៃ និងកើនដល់ជាមធ្យម១លានដុល្លារក្នុង១ថ្ងៃនៅឆ្នាំ២០២២។
ឯកឧត្តម ហុង សុហួរ រំពឹងថា ផ្សារមូលបត្រកម្ពុជានឹងទទួលបានក្រុមហ៊ុនចុះបញ្ជីកើនឡើងជាបន្តបន្ទាប់ទៀតនៅឆ្នាំក្រោយ ដែលនឹងអាចជំរុញឲ្យការជួញដូរជាមធ្យមកើនឡើងដល់៥០លានដុល្លារក្នុង១ថ្ងៃនៅក្នុងរយៈពេលពី៥ទៅ៦ឆ្នាំខាងមុខនេះ។ តាមរយៈការរីកចម្រើននេះ គួបផ្សំការបន្តជួយជ្រោមជ្រែងពីរាជរដ្ឋាភិបាល ឯកឧត្តម ជឿជាក់ថា ផ្សារភាគហ៊ុនកម្ពុជាមិនត្រឹមតែជាប្រភពកៀគរទុនសម្រាប់ក្រុមហ៊ុនចុះបញ្ជីនោះទេ ថែមទាំងជាប្រភពចំណូលដ៏ធំមួយសម្រាប់អ្នកវិនិយោគនាពេលអនាគត ជាមួយការទាក់ទាញក្រុមហ៊ុនឲ្យចុះបញ្ជីកាន់តែច្រើន។
គួរបញ្ជាក់ផងដែរថា សន្និសីទជាតិស្តីពីទីផ្សារមូលបត្រកម្ពុជាក្រោមប្រធានបទ«មួយទសវត្សរ៍នៃការអភិវឌ្ឍទីផ្សារមូលបត្រកម្ពុជានិងដំណើរឆ្ពោះទៅមុខ»ដែលរៀបចំឡើងដើម្បីអបអរខួប១០ឆ្នាំនៃការដាក់ឲ្យដំណើរការផ្សារមូលបត្រកម្ពុជា ក៏មានការរៀបចំកម្មវិធីប្រគល់ពាន់រង្វាន់ដល់ក្រុមហ៊ុនចុះបញ្ជី ដែលភាគហ៊ុនរបស់ខ្លួនទទួលបានការគាំទ្រច្រើនជាងគេ និងអ្នកគាំទ្រសកម្ម ក៏ដូចជាសារព័ត៌មាន ដែលសកម្មក្នុងការផ្សព្វផ្សាយពីផ្សារមូលបត្រកម្ពុជាផងដែរ។ លើសពីនេះក្នុងកម្មវិធីនោះ ក៏បានប្រកាសដាក់ឲ្យប្រើប្រាស់កម្មវិធីទូរសព្ទ CSX Trade ទៀតផង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
