ឯកឧត្តម ចាន់ ហេង អនុរដ្ឋលេខាធិការនៃក្រសួងកសិកម្ម រុក្ខាប្រមាញ់ និងនេសាទ មានក្ដីរំពឹងថា ដំណើរទស្សនកិច្ចបស់ឯកឧត្តម វ៉ាង យី ជាក្ដីរំពឹងមួយរបស់កម្ពុជា ដែលជំរុញឱ្យផលិតផលកសិកម្ម កម្ពុជា អាចឆ្ពោះទៅកាន់ទីផ្សារប្រទេសចិន បានឆាប់រហ័សជាងមុន។ បើតាមអនុរដ្ឋលេខាធិការរូបនេះ បានបញ្ជាក់ប្រាប់សារព័ត៌មានខេមបូណូមីស ថាក្រសួងកសិកម្ម បានរៀបចំឯកសារពាក់ព័ន្ធមួយចំនួន សម្រាប់ត្រៀមដាក់ជូនទៅទីប្រឹក្សារដ្ឋរបស់ចិនរូបនេះ ដើម្បីជំរុញនីតិវិធីក្នុងការនាំចេញផលិតផលកសិកម្មកម្ពុជា ទៅប្រទេសចិន ពិសេសផ្លែមៀនប៉ៃលិន របស់កសិករនៅតាមបណ្ដាខេត្តមួយចំនួន ដែលបាននិងកំពុងជួបបញ្ហាទីផ្សារ មិនអាចនាំចេញទៅថៃ នាពេលកន្លងមក។
អត្ថបទទាក់ទង
ដោយឡែក លោកឧកញ៉ា ហ៊ុន ឡាក់ ប្រធានក្រុមប្រឹក្សាភិបាលសហព័ន្ធស្រូវ-អង្ករ កម្ពុជា ក៏មានក្ដីរំពឹងខ្ពស់ផងដែរ ពាក់ព័ន្ធការជំរុញឱកាសទីផ្សារផលិតផលកសិកម្ម កម្ពុជា តាមរយៈដំណើរទស្សនកិច្ចរបស់ឯកឧត្តម វ៉ាង យី។ លោកឧកញ៉ា ហ៊ុន ឡាក់ បានបញ្ជាក់ប្រាប់សារព័ត៌មានខេមបូណូមីស យ៉ាងដូច្នេះ កន្លងមក ក្រសួងកសិកម្ម និងក្រសួងពាណិជ្ជកម្ម បានស្នើទៅភាគីចិន រួចមកហើយ ដើម្បីឱ្យផលិតផលកសិកម្ម អាចនាំចេញទៅទីផ្សារចិនដោយផ្ទាល់ តែរហូតមកដល់នេះ កម្ពុជា ទើបអាចនាំចេញកសិផលទៅចិនផ្ទាល់ចំនួនតែ ២មុខ ប៉ុណ្ណោះ។ ដូច្នេះ លោកឧកញ៉ា យល់ថា ដំណើរបំពេញទស្សនកិច្ចនេះ នឹងជួយបើកឱកាសទីផ្សារបន្ថែមទៀតសម្រាប់កសិផលកម្ពុជា។
យោងតាមរបាយការណ៍នាំចេញផលិតផលកសិកម្ម របស់ក្រសួងកសិកម្ម រុក្ខាប្រមាញ់ និងនេសាទ បានបង្ហាញថា ក្នុងរយៈពេល ៨ខែ ឆ្នាំ២០២១ កម្ពុជា បាននាំចេញផលិតផលកសិកម្ម សរុបជាង ៥លានតោន ទៅកាន់ទីផ្សារអន្តរជាតិ ដែលគិតជាទឹកប្រាក់ជាង ៣ពាន់លានដុល្លារ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
