លោក ប៉ុក បូរក្ស ប្រធាននាយកដ្ឋានសិល្បៈភាពយន្តនិងផ្សព្វផ្សាយវប្បធម៌នៃក្រសួងវប្បធម៌ បានប្រាប់ថា ជាគោលការណ៍រាជរដ្ឋាភិបាល បានអនុញ្ញាតឲ្យបើកហើយ តែមុននឹងបើកជាផ្លូវការឡើងវិញនូវរោងភាពយន្តទាំងនោះ ក្រសួងវប្បធម៌ និងក្រសួងសុខាភិបាល បានដាក់ចេញនូវគោលការណ៍ស្តង់ដារប្រតិបត្តិចំនួន៨ចំណុច (SOP) ឲ្យរោងភាពយន្តក្នុងរាជធានីអនុវត្តដើម្បីឈានទៅរកការអនុញ្ញាតឲ្យបើកដំណើរការឡើងវិញនាពេលឆាប់ៗខាងមុខនេះ។
លោក ប៉ុក បូរក្សបានបន្តថា « ជាគោលការណ៍រាជរដ្ឋាភិបាលបានអនុញ្ញាតហើយ ប៉ុន្តែត្រូវតែគោរព និងអនុវត្តឲ្យបានត្រឹមត្រូវតាមវិធានការការពារបង្ការទប់ស្កាត់កូវីដ-១៩ អញ្ចឹងទេ នីតិវិធីបន្តហ្នឹង នៅពេលដែលយើងចុះហើយហ្នឹង គឺបានន័យថា មានការស្នើសុំហើយ បានយើងចុះ (ស្នើសុំពីតំណាងរោងភាពយន្ត) ចុះមើលហើយ បើឃើញថា គាត់អនុវត្តត្រឹមត្រូវហើយ បានយើងធ្វើជាសំណើរួមមួយទៀត ដើម្បីសុំបើកដំណើរការរោងកុននោះវិញ»។
អត្ថបទទាក់ទង!
ប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌រូបនេះ បន្ថែមថា បច្ចុប្បន្នមានរោងភាពយន្តចំនួន៤ហើយ នៅរាជធានីភ្នំពេញ រួមមានរោងភាពយន្ត Legend សាខាអេឌិន, Legend សាខាអ៊ិចឆេង, រោងភាពយន្ត Major Cineplex សាខាសុរិយា, Major Cineplex សាខាអ៊ីអន១ ដែលក្រុមការងារចម្រុះបានចុះត្រួតពិនិត្យ ដែលអាចនឹងអនុញ្ញាតឲ្យបើកដំណើរការឡើងវិញក្នុងខែសីហានេះ។
រោងភាពយន្តផ្សេងទៀត ដែលចង់បើកឡើងវិញ អាចស្នើសុំទៅកាន់នាយកដ្ឋានសិល្បៈភាពយន្តនិងផ្សព្វផ្សាយវប្បធម៌នៃក្រសួងវប្បធម៌ ដើម្បីឲ្យការងារចម្រុះត្រួតពិនិត្យដូចគ្នា មុនបើកវិញបាន។
គួររម្លឹកថា បើគិតមកទល់នឹងពេលនេះ មានរយៈជាង ៤ខែហើយ ដែលរោងភាពយន្តទូទាំងប្រទេសត្រូវបានផ្អាកដំណើរការជាបណ្តោះអាសន្ន ដោយសារជំងឺកូវីដ-១៩ ដែលបានធ្វើឲ្យភាពយន្តខ្មែរ និងបរទេសជាច្រើនរឿងត្រូវបានកកស្ទះមិនបានចាក់បញ្ជាំង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
