យើងផ្តើមនិយាយដំបូងពីគម្រោងរបស់ Moderna ក្នុងប្រទេសជប៉ុនជាមុនសិន។ ក្រុមហ៊ុន Moderna បានបង្ហើបឲ្យដឹងថា ខ្លួនកំពុងពិចារណាផលិតវ៉ាក់សាំងកូវីដ-១៩នៅក្នុងប្រទេសជប៉ុន ខណៈដែលប្រទេសជប៉ុននេះ កំពុងរងសភាពជាប់គាំងខ្លាំងមែនក្នុងការទទួលបានការផ្គត់ផ្គង់វ៉ាក់សាំងសម្រាប់ប្រជាជនរបស់ខ្លួន។ ផែនការផលិតវ៉ាក់សាំងនៅជប៉ុននេះ ត្រូវបានលើកឡើងនៅក្នុងកិច្ចសម្ភាសន៍តាមទូរសព្ទ័រវាងប្រធាននាយកប្រតិបត្តិក្រុមហ៊ុន Moderna និងសារព័ត៌មានជប៉ុន Nikkei។
ថ្មីៗនេះ ក្រសួងសុខាភិបាលជប៉ុន កាលពីថ្ងៃសុក្រសប្តាហ៍មុន បានអនុញ្ញាតជាផ្លូវការហើយដែរ ក្នុងការបើកផ្លូវឲ្យមានការ ផលិតនិងធ្វើអាជីវកម្មលើវ៉ាក់សាំង Moderna និង AstraZeneca។
លោក Stephane Bancel ប្រធាននាយកប្រតិបត្តិក្រុមហ៊ុន Moderna បាននិយាយថា៖ ក្រុមហ៊ុនលោកកំពុងចរចាបន្ថែមរោងចក្រផលិតវ៉ាក់សាំង ជាមួយប្រទេសមួយចំនួនទៀតក្នុងតំបន់អាស៊ី ក្នុងនោះ ប្រទេសជប៉ុនជាគោលដៅមួយសំខាន់សម្រាប់ការពង្រីកផលិតកម្ម ។
អត្ថបទទាក់ទង!
លោកបន្តថា ក្រុមហ៊ុននឹងព្យាយាមរកកិច្ចសហការជាមួយក្រុមហ៊ុននៅក្នុងប្រទេសជប៉ុន ដើម្បីអាចផ្តល់អាជ្ញាបណ្ណផ្លូវការមួយ សម្រាប់ផលិតកម្មវ៉ាក់សាំងនៅក្នុងប្រទេសមួយនេះ។ យ៉ាងណាមិញ នាយកប្រតិបត្តិរូបនេះ បានគូសបញ្ជាក់ថា ការពិភាក្សាជាមួយភាគីជប៉ុននេះ កំពុងធ្វើឡើងនៅក្នុងដំណាក់កាលដំបូងប៉ុណ្ណោះ។
មូលហេតុដែល Moderna ចាប់អារម្មណ៍ផលិតវ៉ាក់សាំងនៅប្រទេសជប៉ុន ក៏ដោយសារតែ ជប៉ុនជាប្រទេសមានកម្លាំងពលកម្ម ដែលមានគុណភាពខ្ពស់ បូករួមនឹងជប៉ុនមានមន្ទីរពិសោធន៍ និងការស្រាវជ្រាវវេជ្ជសាស្រ្តកម្រិតខ្ពស់។
សូមបញ្ជាក់ថាជប៉ុន បានសម្រេចនាំយកវ៉ាក់សាំង Moderna មួយប្រភេទទៀតមកប្រើប្រាស់ ក្រៅតែពីវ៉ាក់សាំង Pfizer ដែលខ្លួនកំពុងប្រើបច្ចុប្បន្ន។ វ៉ាក់សាំង Moderna រំពឹងនឹងដឹកមកដល់ទឹកដីជប៉ុននៅខែក្រោយនេះ ដោយរដ្ឋាភិបាលជប៉ុនគ្រោងនឹងរៀបចំកម្មវិធីចាក់វ៉ាក់សាំងទ្រង់ទ្រាយធំមុនគេដល់ពលរដ្ឋរស់នៅក្រុងតូក្យូ និងអូសាកា។
ក្រៅតែពីកំពុងចរចារជាមួយជប៉ុន Moderna បានចុះកិច្ចព្រមព្រៀងជាមួយ Samsung សម្រាប់ការផលិតនៅកូរ៉េខាងត្បូងផងដែរ។
ក្រុមហ៊ុនSamsung ផ្នែកជីវសាស្រ្តរបស់កូរ៉េខាងត្បូង កាលពីថ្ងៃសៅរ៍សប្តាហ៍មុនបានចុះហត្ថលេខាលើកិច្ចព្រមព្រៀងជាមួយក្រុមហ៊ុន Moderna រួចហើយ ស្តីអំពីដំណើរការផលិតវ៉ាក់សាំងកូវីដ-១៩។
ក្រោមកិច្ចព្រមព្រៀងនេះ ក្រុមហ៊ុន Samsung នឹងអនុញ្ញាតឲ្យ Moderna ផលិតវ៉ាក់សាំងប្រភេទ mRNA ក្នុងទឹកដីកូរ៉េខាងត្បូង។
គួរជម្រាបថា ភាគីទាំងពីរបានចុះកិច្ចព្រមព្រៀងនេះជាមួយគ្នា អំឡុងពេលទស្សនកិច្ចផ្លូវការរបស់លោកប្រធានាធិបតីកូរ៉េ ម៉ូនជេអ៊ីន ទៅកាន់សហរដ្ឋអាមេរិក ដែលជាជំនួបលើកដំបូងរបស់លោកជាមួយប្រធានាធិបតីអាមេរិក ចូបៃឌិន កាលពីសប្តាហ៍មុន។
ក្រៅតែពីកិច្ចព្រមព្រៀងផលិតវ៉ាក់សាំង Moderna ក៏បានចុះហត្ថលេខាលើអនុស្សរណៈនៃការយោគយល់គ្នាជាមួយក្រសួងពាណិជ្ជកម្មឧស្សាហកម្ម និងថាមពលរបស់កូរ៉េខាងត្បូងផងដែរ។
អនុស្សរណៈនៃការយោគយល់គ្នានេះ និងតម្រូវឲ្យរោងចក្រ Moderna ជ្រើសរើសកម្លាំងពលកម្មក្នុងស្រុករបស់កូរ៉េ បូករួមនឹងការប្រើប្រាស់បរិក្ខារ និងហេដ្ឋារចនាសម្ព័ន្ធទាំងអស់ចេញពីប្រទេសកូរ៉េ។
សូមបញ្ជាក់ដែរថា កូរ៉េខាងត្បូងបានក្លាយជាប្រទេសដ៏ពេញនិយមមួយនៅទ្វីបអាស៊ី ដែលបានទាក់ទាញក្រុមហ៊ុនផលិតវ៉ាក់សាំងធំៗ ឲ្យមកផលិតនៅក្នុងប្រទេសខ្លួន ក្នុងនោះរួមមាន វ៉ាក់សាំង អាមេរិក AstraZeneca , Novavax និងវ៉ាក់សាំងរុស្សី Sputnik V ជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
