ជាអ្នកជំនាញកសិកម្ម និងជាអគ្គនាយកនៃក្រុមហ៊ុន ម៉ុង ឫទ្ធី គ្រុប កញ៉ាបណ្ឌិត ម៉ុង ឫទ្ធី យល់ឃើញថា បើទោះបីកម្ពុជា ជាប្រទេសកសិកម្មក៏ពិតមែន តែការប្រែក្លាយកម្ពុជា ទៅប្រទេស កសិ-ពាណិជ្ជកម្ម វាមិនមែនជារឿងងាយស្រួលទេ។ ក្នុងន័យនេះ ឧកញ៉ាបណ្ឌិត ម៉ុង ឫទ្ធី បានបញ្ជាក់ប្រាប់សារព័ត៌មានខេមបូណូមីស ថា សម្រាប់កម្ពុជា ការជំរុញធ្វើ កសិ-ពាណិជ្ជកម្ម មានកត្តាសំខាន់ៗ ជាច្រើន ក្នុងនោះ កត្តាពូជ ជាកត្តាចម្បងបំផុតមួយ ក្នុងការឈានទៅជំរុញការធ្វើ កសិ-ពាណិជ្ជកម្ម។ មហាសេដ្ឋីកសិកម្មរូបនេះ បានគូសបញ្ជាក់បន្ថែមថា រហូតមកដល់ពេលនេះ កម្ពុជា នៅតែមានការនាំចូលផលិតផលកសិកម្មពីក្រៅប្រទេស នោះក៏ព្រោះតែការផ្គត់ផ្គង់របស់កម្ពុជា មិនទាន់គ្រប់គ្រាន់តាមតម្រូវការ ទីផ្សារនៅឡើយ ពិសេស គឺការផ្គត់ផ្គង់ពូជ។
អ្នកជំនាញចាស់វស្សាផ្នែកកសិកម្មរូបនេះ បានពន្យល់ប្រាប់សារព័ត៌មានខេមបូណូមីសទៀតថា សព្វថ្ងៃ មិនត្រឹមតែការនាំចូលផលិតផលកសិកម្ម នោះទេ សូម្បីតែពូជ ក៏កម្ពុជា មិនទាន់មានលទ្ធភាពគ្រប់គ្រាន់ សម្រាប់ផ្គត់ផ្គង់ខ្លួនឯងដែរ ដូច្នេះ រឿងជំរុញការធ្វើ កសិ-ពាណិជ្ជកម្មទៀតនោះ វាអាចពិបាក និងត្រូវប្រើពេលបន្ថែមទៀត។ ដោយឡែក ចំពោះទីផ្សារកសិកម្មកម្ពុជា ឯណោះវិញ បណ្ឌិតកសិកម្មរូបនេះ យល់ថា គឺមានស្ថានភាពល្អ។
អត្ថបទគួរអាន
សូមបញ្ជាក់ថា វិស័យកសិកម្ម គឺស្ថិតនៅក្នុងចំណោមវិស័យឆ្អឹងខ្នងសេដ្ឋកិច្ចរបស់កម្ពុជា ហើយវាបាននិងកំពុងដើរតួនាទីរឹតតែសំខាន់នៅអំឡុងពេលប្រទេសកំពុងជួបបញ្ហាវិបត្តិកូវីដ-១៩ ដែលកំពុងបន្ដអូសបន្លាយនេះ។ វិស័យកសិកម្ម ត្រូវបានអ្នកជំនាញសេដ្ឋកិច្ចអះអាងថា គឺជាវិស័យមួយ ដែលមានភាពធន់ជាងគេក្នុងអំឡុងពេលកូវីដ-១៩ ដែលបាននិងកំពុងបង្កឲ្យសេដ្ឋកិច្ចមានការធ្លាក់ចុះ។
តួលេខពីក្រសួងកសិកម្មបង្ហាញថា នៅ៨ខែដំបូងនៅឆ្នាំ២០២១ កម្ពុជាសម្រេចបានការនាំចេញផលិតផលកសិកម្មជាង ៥លាន៥សែនតោន កើនឡើងដល់ទៅជាង ៨៩% ធៀបនឹងរយៈពេលដូចគ្នាកាលពីឆ្នាំមុន ជាមួយនឹងទឹកប្រាក់នាំចេញសរុបជាង៣ពាន់លានដុល្លារអាមេរិក។ តាមការព្យាករពីធនាគារអភវិឌ្ឍន៍អាស៊ី វិស័យកសិកម្មរបស់កម្ពុជានៅឆ្នាំ២០២១នេះ នឹងកើនឡើង ១,៥% នៅគ្រាដែលសេដ្ឋកិច្ចកម្ពុជាត្រូវបានព្យាករដែរថា នឹងកើន ១,៩%៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
