រដ្ឋម៉ុនតាណា នឹងចាត់ទុកថាខុសច្បាប់ បើឃ្លាំងកម្មវិធីរបស់ក្រុមហ៊ុន ហ្គូហ្គល និងក្រុមហ៊ុន អេពភល ផ្តល់កម្មវិធី ទិកតុក ឱ្យប្រជាជនក្នុងរដ្ឋនេះទាញយកមកប្រើ ប៉ុន្តែនឹងមិនដាក់ពិន័យលើបុគ្គលដែលប្រើកម្មវិធីនេះទេ។ បម្រាមនេះនឹងមានសុពលភាពចាប់ពីថ្ងៃទី ១ ខែមករា ឆ្នាំ ២០២៤ តទៅ ខណៈដែលមានការរិះគន់ជាច្រើន ឬអាចមានបណ្ដឹងជំទាស់ផង។
មិនទាន់ឃើញមានការឆ្លើយតបណាមួយពីក្រុមហ៊ុន បៃត៍ដានស៍ ដែលជាម្ចាស់កម្មវិធី ទិកតុក នៅឡើយទេ ប៉ុន្តែកាលពីមុន ទិកតុក បាននិយាយនៅក្នុងសេចក្តីថ្លែងការណ៍មួយថា ច្បាប់ថ្មីនេះរំលោភបំពានលើវិសោធនកម្មច្បាប់សិទ្ធមនុស្សក្នុងរដ្ឋម៉ុនតាណា តាមរយៈការហាមឃាត់ដោយខុសច្បាប់ចំពោះកម្មវិធី ទិកតុក ហើយ ទិកតុក នឹងបន្តធ្វើការដើម្បីការពារសិទ្ធិអ្នកប្រើប្រាស់ទាំងនៅក្នុង ទាំងនៅក្រៅរដ្ឋម៉ុនតាណា។
លោក ហ្គ្រេក ចៃអ៊ឹនហ្វ័រតេ អភិបាលរដ្ឋម៉ុនតាណា ដែលមកពីគណបក្សសាធារណរដ្ឋ បាននិយាយថា ច្បាប់នេះនឹងពង្រឹងអាទិភាពរួមក្នុងការជួយការពារអ្នករស់នៅក្នុងរដ្ឋម៉ុនតាណាទល់នឹងការតាមដានរបស់បក្សកុម្មុយនិស្តចិន។
អត្ថបទគួរអាន
អភិបាលរដ្ឋនេះថ្លែងថា ទិកតុក នឹងប្រឈមមុខនឹងទណ្ឌកម្មចំពោះការបំពានច្បាប់ថ្មីនេះម្ដង ហើយក៏ប្រឈមមុខនឹងការផាកពិន័យបន្ថែមជាប្រាក់ចំនួន ១ ម៉ឺនដុល្លារ ក្នុងមួយថ្ងៃ ប្រសិនបើកម្មវិធីនេះហ៊ានល្មើសនឹងបម្រាមទៀត។
ទិកតុក ដែលជាកម្មវិធីរចនាខ្សែវីដេអូខ្លីៗ អាចទាញយកមកប្រើបានពីឃ្លាំងកម្មវិធីរបស់ក្រុមហ៊ុន អេពភល និងក្រុមហ៊ុន ហ្គូហ្គល។ ក្រុមហ៊ុនទាំងពីរនេះ ដែលជាផ្នែកមួយរបស់ក្រុមហ៊ុន អាល់ហ្វាបិត ក៏អាចប្រឈមនឹងការផាកពិន័យចំនួន ១ ម៉ឺនដុល្លារដែរ ចំពោះអំពើល្មើសម្ដង ក្នុងមួយថ្ងៃ ប្រសិនបើពួកគេរំលោភលើបម្រាមនេះ។
យោងតាមមជ្ឈមណ្ឌលស្រាវជ្រាវ ព្យូ, ក្មេងជំទង់អាមេរិកដែលមានអាយុពី ១៣ ដល់ ១៧ ឆ្នាំ ជាង ៦៧% ប្រើប្រាស់កម្មវិធី ទិកតុក ហើយ ១៦% ក្នុងចំណោមមនុស្សវ័យជំទង់ទាំងអស់ បាននិយាយថា ខ្លួនលេង ទិកតុក ជាប់ជាប្រចាំ។ ក្រុមហ៊ុន ទិកតុក និយាយថា អ្នកប្រើប្រាស់ច្រើនលើសលុបមានអាយុលើសពី ១៨ ឆ្នាំ។
ទោះយ៉ាងណា ច្បាប់នេះ ក៏មានរិះគន់មិនតិចដែរ ដោយក្នុងនោះ អង្គការសហភាពសេរីភាពប្រជាជនអាមេរិកបានលើកឡើងថា ច្បាប់នេះគឺ«ផ្ទុយនឹងរដ្ឋធម្មនុញ្ញ្» ហើយបានកត់សម្គាល់ថា វានឹងមានសុពលភាពនៅថ្ងៃទី ១ ខែមករា ឆ្នាំក្រោយ ប្រសិនបើតុលាការនានាមិនធ្វើសកម្មភាពរារាំងទេនោះ៕
