រដ្ឋមន្ត្រីក្រសួងសាធារណការថា «នឹងមិនលើកលែងរថយន្តដឹកជញ្ជូនលើសទម្ងន់ឡើយ»

នៅក្នុងសន្និសីទសារព័ត៌មានស្តីអំពី វឌ្ឍនភាពនៃការអនុវត្តគ្រប់គ្រង ទប់ស្កាត់យានយន្តដឹកជញ្ជូនលើសទម្ងន់កម្រិតកំណត់ កាលពីព្រឹកថ្ងៃទី១ ខែតុលា នេះ ឯកឧត្តមទេសរដ្ឋមន្ត្រី ស៊ុន ចាន់ថុល បានអះអាងថា ក្រសួងសាធារណការនិងដឹកជញ្ជូន បានអនុវត្តវិធានការត្រួតពិនិត្យលើយានយន្ដដឹកជញ្ជូនលើសទម្ងន់កម្រិតកំណត់យ៉ាងម៉ត់ចត់បំផុតពុំមានការលើកលែងឡើយ។ ឯកឧត្តម សង្កត់ធ្ងន់ថា កន្លងមកក្រសួងមិនដែលដោះលែងយានយន្តដឹកទំនិញលើសទម្ងន់កំណត់ ក្រោមការអន្តរាគមន៍ពីអ្នកណាម្នាក់ឡើយ។

ឯកឧត្តម បានបន្តថា សម្រាប់ការដោះលែងរថយន្តដឹកទំនិញលើសទម្ងន់កំណត់ចំនួន២២៩គ្រឿង ក្រោយមានការស្នើសុំពីសម្តេចតេជោនាយករដ្ឋមន្ត្រី ហ៊ុន សែន កាលពីពេលថ្មីៗ វាជាយន្តការរួម ហើយការបន្ធូរបន្ថយ និង ផ្តល់ឱកាសជាថ្មីដល់ម្ចាស់យានយន្តដឹកលើសទម្ងន់កំណត់នេះ គឺដោយសារ សម្តេច ចង់ឲ្យម្ចាស់យានយន្តទាំងនោះអាចប្រកមអាជីវកម្មឡើងវិញក្នុងឱកាសបុណ្យភ្ជុំបិណ្ឌ ដែលវាស្របតាមផែនការស្តារសេដ្ឋកិច្ចឡើងវិញក្នុងអំឡុងនៃវិបត្តិកូវីដ-១៩។ 

តែយ៉ាងណា រដ្ឋមន្ត្រីក្រសួងសាធារណការ និងដឹកជញ្ជូនរូបនេះ ទទួលស្គាល់ថា ទោះបីក្រសួងបានដាក់ចេញវិធានការ និងរឹតបន្តឹងការអនុវត្តយ៉ាងតឹងរ៉ឹងក៏ដោយ តែក្រសួងមិនអាចចាប់រថយន្តដឹកលើកទម្ងន់កំណត់បាន១០០% នោះទេ។ សម្រាប់ ឯកឧត្តម ស៊ុន ចាន់ថុលមានតែការចូលរួមពីម្ចាស់ក្រុមហ៊ុន អាជីវកម្ម និងប្រជាពលរដ្ឋប៉ុណ្ណោះ ទើបកម្ពុជាអាចលុបបំបាត់ការដឹកទំនិញលើសទម្ងន់កំណត់នេះបានលឿន។ ជាមួយគ្នានេះ ឯកឧត្តម ប្តេជ្ញាថា នឹងបន្តអនុវត្តវិធានការឲ្យកាន់តែតឹងរ៉ឹងបន្ថែមទៀតក្នុងការលុបបំបាត់រថយន្តដឹកទំនិញលើសទម្ងន់កំណត់ ដើម្បីចូលរួមថែរក្សាហេដ្ឋារចនាសម្ព័ន្ធនៅកម្ពុជា៕